Iphone Updates: యాపిల్ సంచలన నిర్ణయం - అద్దెకు ఐఫోన్.. తక్కువ బడ్జెట్‌లో ఐఫోన్ వాడాలనుకునే వారికి బెస్ట్ ఆప్షన్!

• గడువు తర్వాత కొనుగోలు లేదా అప్‌గ్రేడ్‌ అవకాశం..
  
  
• gadgets: ఐఫోన్‌, ఐప్యాడ్‌, మ్యాక్‌లకు నెలవారీ లీజు..

Iphone Updates: యాపిల్ లవర్స్‌కు టెక్ దిగ్గజం యాపిల్ (Apple) సరికొత్త వార్త అందించింది. అమెరికాలో ఉన్న తమ వినియోగదారుల కోసం ఒక విప్లవాత్మకమైన ఫైనాన్సింగ్ సదుపాయాన్ని అందుబాటులోకి తీసుకొచ్చింది. ఇకపై ఐఫోన్, ఐప్యాడ్, మ్యాక్‌బుక్ వంటి అత్యంత ఖరీదైన గ్యాడ్జెట్లను ఒకేసారి వేలాది డాలర్లు వెచ్చించి కొనుగోలు చేయాల్సిన అవసరం లేకుండా, సులభమైన నెలవారీ లీజు (Monthly Lease) పద్ధతిలో వాడుకునే అవకాశాన్ని కల్పించింది.

ఇటీవల గ్లోబల్ మార్కెట్‌లో మెమరీ చిప్‌ల ధరలు గణనీయంగా పెరగడం మరియు ఆర్టిఫిషియల్ ఇంటెలిజెన్స్ (AI) ఫీచర్ల అనుసంధానం కారణంగా యాపిల్ తన పలు ఉత్పత్తుల ధరలను 100 నుండి 500 డాలర్ల వరకు పెంచిన నేపథ్యంలో, వినియోగదారులపై ఒకేసారి పడే తీవ్ర ఆర్థిక భారాన్ని తగ్గించడమే లక్ష్యంగా ఈ కీలక నిర్ణయం తీసుకుంది.

‘అప్‌గ్రేడ్’ లీజు పథకం ఎలా పనిచేస్తుంది?
‘బై నౌ.. పే లేటర్’ (Buy Now, Pay Later) సేవల్లో అంతర్జాతీయంగా పేరుగాంచిన 'క్లార్నా' (Klarna) సంస్థతో కలిసి యాపిల్ ఈ పథకాన్ని ‘అప్‌గ్రేడ్’ (Upgrade) పేరుతో మార్కెట్లోకి తెచ్చింది. వినియోగదారులు ఆన్‌లైన్ లేదా యాపిల్ అధికారిక స్టోర్లలో అత్యంత సులభంగా ఈ లీజు కోసం దరఖాస్తు చేసుకోవచ్చు. అయితే దరఖాస్తు ప్రక్రియలో భాగంగా వినియోగదారుడి క్రెడిట్ స్కోర్‌ను పరిశీలించేందుకు 'సాఫ్ట్ క్రెడిట్ చెక్' (Soft Credit Check) తప్పనిసరి చేశారు.

• ఐఫోన్‌లు & యాపిల్ వాచ్‌లకు: 12 లేదా 24 నెలల లీజు కాలపరిమితి ఉంటుంది.

• మ్యాక్‌బుక్స్ & ఐప్యాడ్‌లకు: 24 లేదా 36 నెలల సుదీర్ఘ లీజు కాలపరిమితిని నిర్ణయించారు.

• కనీస ఛార్జీలు: ఈ ప్లాన్ కింద అత్యంత తక్కువ ధర కలిగిన ఐఫోన్ మోడల్‌ను నెలకు కేవలం 17.99 డాలర్ల (సుమారు ₹1,500) నామమాత్రపు లీజు రుసుము చెల్లించి పొందవచ్చు.

లీజు గడువు ముగిసాక ఉండే ఆప్షన్లు..
లీజు ఒప్పందం గడువు పూర్తయిన తర్వాత వినియోగదారులకు యాపిల్ మూడు వెసులుబాట్లను కల్పించింది:

1. సొంతం చేసుకోవడం: మిగిలిన బ్యాలెన్స్ మొత్తాన్ని ఒకేసారి చెల్లించి సదరు డివైజ్‌ను పూర్తిగా తన సొంతం చేసుకోవచ్చు. (యాపిల్ స్పష్టం చేసిన దాని ప్రకారం లీజు గడువు ముగిసేసరికి అయ్యే మొత్తం వ్యయం డివైజ్ అసలు ధరను మించదు).

2. వాపస్ ఇవ్వడం: గ్యాడ్జెట్‌ను కంపెనీకి తిరిగి ఇచ్చేసి లీజు ఒప్పందం నుంచి పూర్తిగా బయటకు రావచ్చు.

3. కొత్త మోడల్‌కు మారడం: పాత పరికరాన్ని ఇచ్చేసి, మార్కెట్లో కొత్తగా వచ్చిన లేటెస్ట్ యాపిల్ మోడల్‌తో మరొక నూతన లీజు ఒప్పందాన్ని చేసుకోవచ్చు.

పథకంలో అందుబాటులో ఉన్న డివైజ్‌ల జాబితా..

ఇప్పటివరకు అమల్లో ఉన్న పాత 'ఐఫోన్ అప్‌గ్రేడ్ ప్రోగ్రామ్' స్థానంలో యాపిల్ ఈ నూతన విధానాన్ని ప్రవేశపెట్టింది. త్వరలోనే కంపెనీ నుంచి రాబోతున్న సరికొత్త ఫ్లాగ్‌షిప్ ఐఫోన్‌లతో పాటు, మార్కెట్ తీవ్రంగా నిరీక్షిస్తున్న యాపిల్ తొలి ‘ఫోల్డబుల్ ఐఫోన్’ (Foldable iPhone) మార్కెట్లోకి అడుగుపెట్టనున్న తరుణంలో ఈ లీజు పథకాన్ని ప్రకటించడం గ్లోబల్ టెక్ వర్గాల్లో విశేష ప్రాధాన్యత సంతరించుకుంది.