మన తెలుగు వారి భోజనంలో 'ఆవకాయ' లేనిదే ముద్ద దిగదు. అది కేవలం ఒక పచ్చడి మాత్రమే కాదు, మన సంస్కృతిలో ఒక భాగం. ఇప్పుడు అదే పేరుతో ఆంధ్రప్రదేశ్ పర్యాటక శాఖ ఒక వినూత్నమైన ఉత్సవానికి తెరలేపింది. అమరావతి రాజధాని ప్రాంతం యొక్క వైభవాన్ని ప్రపంచానికి చాటిచెప్పేందుకు, తెలుగు కళలన్నింటినీ ఒకే తాటిపైకి తెస్తూ 'ఆవకాయ' (AVAKAYA) అనే పేరుతో ఒక మెగా ఫెస్టివల్ను ప్రభుత్వం నిర్వహించబోతోంది.
అమరావతి బ్రాండ్ను జాతీయ, అంతర్జాతీయ స్థాయిలో బలంగా నిలబెట్టేందుకు ఆంధ్రప్రదేశ్ ప్రభుత్వం ప్రత్యేక దృష్టి సారించింది. ఇందులో భాగంగా పర్యాటక శాఖ 'ఆవకాయ' పేరుతో సరికొత్త ఉత్సవానికి శ్రీకారం చుట్టింది. సినిమా, సంస్కృతి, సాహిత్యాన్ని ఒకే వేదికపైకి తీసుకొచ్చే ఈ ఫెస్టివల్ను జనవరి 8 నుంచి 10 వరకు విజయవాడ కేంద్రంగా నిర్వహించనున్నట్లు ప్రకటించింది.
ఈ కార్యక్రమం వివరాలను రాష్ట్ర పర్యాటక శాఖ మంత్రి కందుల దుర్గేశ్ వెల్లడించారు. "తెలుగు నేలపై పుట్టిన కథ, కవిత, సినిమా, సంగీతం, నాటకం వంటి అన్ని కళారూపాలను ఒకే వేదికపైకి తీసుకొచ్చే ప్రయత్నమే 'ఆవకాయ'. తెలుగు సినిమా, సాహిత్యం, కళల వైభవాన్ని ప్రజలకు మరింత చేరువ చేయడమే ఈ ఉత్సవం లక్ష్యం" అని ఆయన తెలిపారు. ఏపీ పర్యాటక శాఖ, టీమ్వర్క్ ఆర్ట్స్ సంయుక్తంగా ఈ కార్యక్రమాన్ని నిర్వహిస్తున్నాయి.
విజయవాడలోని పున్నమి ఘాట్, భవానీ ఐలాండ్లో ఈ వేడుకలు జరగనున్నాయి. సాధారణంగా ఇండోర్ హాళ్లకే పరిమితమయ్యే ఇలాంటి కార్యక్రమాలను తొలిసారిగా బహిరంగ ప్రదేశాల్లో, ప్రజల భాగస్వామ్యంతో నిర్వహించడం 'ఆవకాయ' ప్రత్యేకత అని మంత్రి దుర్గేష్ వివరించారు. ఈ ఫెస్టివల్ ద్వారా తెలుగు సాంస్కృతిక వారసత్వాన్ని ప్రదర్శించడంతో పాటు, సమకాలీన సృజనాత్మక ఆలోచనలకు కూడా పెద్దపీట వేయనున్నట్లు ఆయన పేర్కొన్నారు.
సంక్రాంతి పండుగకు ముందుగా వచ్చే ఈ 'ఆవకాయ' ఉత్సవం తెలుగు వారికి ఒక మంచి వినోదాన్ని మరియు గతాన్ని నెమరువేసుకునే అవకాశాన్ని ఇస్తుంది. మీ కుటుంబ సభ్యులతో కలిసి జనవరి 8న విజయవాడ పున్నమి ఘాట్కు చేరుకుని, మన తెలుగు సంస్కృతిని ఆస్వాదించండి.
