విదేశాల్లో చదవాలనే ఆలోచన భారతీయ విద్యార్థుల్లో రోజురోజుకీ పెరుగుతోంది. ముఖ్యంగా 2026 విద్యా సంవత్సరం లక్ష్యంగా అనేక మంది యువత జర్మనీ, జపాన్ వంటి దేశాల వైపు దృష్టి పెడుతున్నారు. ప్రస్తుతం అమెరికా యొక్క నిబంధన నిబంధనల ద్వారా జన్మని చెప్పాను అంటే సూపర్ ఫాస్ట్ కంట్రీస్ వైపే ముగ్గు చూపుతున్నారు విద్యార్థులు. అయితే ఈ రెండింటిలో ఏ దేశం తమకు సరిపోతుందో అనే సందేహం చాలామందిని కలవరపెడుతోంది. ఖర్చులు, భాష, సంస్కృతి, స్కాలర్షిప్లు, చదువు పూర్తయ్యాక అవకాశాలు వంటి అంశాలు ఈ నిర్ణయంలో కీలక పాత్ర పోషిస్తున్నాయి.
జర్మనీ గురించి మాట్లాడుకుంటే తక్కువ ఫీజుతో ఉన్నత విద్య అందుబాటులో ఉండటమే ఈ దేశం యొక్క ప్రాముఖ్యతగా నిలబెడుతోంది. ప్రభుత్వ యూనివర్సిటీల్లో చదువుకునే విద్యార్థులకు ట్యూషన్ ఫీజులు చాలా తక్కువగా ఉంటాయి. కొన్ని యూనివర్సిటీల్లో అయితే పూర్తిగా ఉచిత విద్య కూడా లభిస్తోంది. ఇంగ్లిష్లోనే బోధించే కోర్సులు కూడా ఎక్కువగా ఉండటం వల్ల జర్మన్ భాష ముందుగా పూర్తిగా రాకపోయినా చదువుకోవచ్చు. టెక్నాలజీ, ఇంజినీరింగ్, సైన్స్ రంగాల్లో జర్మనీకి ఉన్న పేరు విద్యార్థులను ఆకర్షిస్తోంది.
అయితే జర్మనీలో జీవన ఖర్చులు మాత్రం తక్కువేమీ కావు. నివాసం, ఆహారం, రవాణా, ఇతర అవసరాలన్నీ కలిపి ఏడాదికి సగటున 12 నుంచి 14 లక్షల రూపాయల వరకు ఖర్చవుతుందని అంచనా. అయినా చదువు ఖర్చు లేకపోవడం వల్ల మొత్తం భారం కొంత తగ్గుతుంది. చదువు పూర్తయ్యాక అక్కడే ఉద్యోగం వెతుక్కునేందుకు 18 నెలల సమయం ఇవ్వడం కూడా జర్మనీకి ఉన్న మరో పెద్ద ప్లస్ పాయింట్.
ఇక జపాన్ విషయానికి వస్తే, ఇది పూర్తిగా భిన్నమైన అనుభవాన్ని అందించే దేశంగా నిలుస్తుంది. సాంకేతికంగా ఎంతో అభివృద్ధి చెందిన దేశమైన జపాన్లో చదవడం అనేది కేవలం డిగ్రీ పొందడమే కాదు, ఒక ప్రత్యేకమైన సంస్కృతిని నేర్చుకోవడమని విద్యార్థులు చెబుతారు. అయితే ఇక్కడ ప్రధాన సవాలు భాషే. జపనీస్ భాషపై పట్టు లేకుండా రోజువారీ జీవితం సాగించడం కష్టం. యూనివర్సిటీల్లో ఇంగ్లిష్లో బోధించే కోర్సులు ఉన్నప్పటికీ, అవి పరిమితంగానే ఉంటాయి.
జపాన్లో ట్యూషన్ ఫీజులు జర్మనీతో పోలిస్తే ఎక్కువ. ప్రభుత్వ యూనివర్సిటీల్లోనే అండర్గ్రాడ్యుయేట్ లేదా పీజీ కోర్సులకు సుమారు నాలుగు నుంచి ఐదు లక్షల రూపాయల వరకు ఫీజులు ఉంటాయి. అలాగే జీవన ఖర్చులు కూడా నెలకు దాదాపు 80 వేల నుంచి రెండు లక్షల రూపాయల వరకు ఉండవచ్చు. అయినప్పటికీ, జపాన్ ప్రభుత్వం అందించే స్కాలర్షిప్లు కొందరు ప్రతిభావంతులైన విద్యార్థులకు పెద్ద ఊరటనిస్తాయి. ముఖ్యంగా మెక్స్ స్కాలర్షిప్ ద్వారా ట్యూషన్ ఫీజులు, నెలవారీ భత్యం, ప్రయాణ ఖర్చులు వంటి సదుపాయాలు లభిస్తాయి.
సంస్కృతి పరంగా చూస్తే, జర్మనీ విద్యార్థులకు ఓపెన్ వాతావరణాన్ని అందిస్తే, జపాన్ క్రమశిక్షణ, సంప్రదాయాలపై ఎక్కువగా దృష్టి పెడుతుంది. ఎవరు దీర్ఘకాలం జపాన్లోనే జీవించాలనుకుంటారో, జపనీస్ భాష నేర్చుకోవడానికి సిద్ధంగా ఉంటారో వారికి జపాన్ సరైన ఎంపికగా మారుతుంది. ఖర్చులు ఎక్కువైనా, అక్కడ ఉద్యోగ అవకాశాలు, స్థిర జీవితం ఆశించే వారికి ఇది ఉపయోగపడుతుంది.
జర్మనీ జపాన్ రెండింటికీ తమ తమ ప్రత్యేకతలు ఉన్నాయి. తక్కువ ఖర్చుతో నాణ్యమైన విద్య, ఇంగ్లిష్లో కోర్సులు, ఉద్యోగ అవకాశాలు కోరుకునే వారు జర్మనీని ఎంచుకోవచ్చు. కొత్త సంస్కృతి, సాంకేతిక ప్రపంచం, దీర్ఘకాల లక్ష్యాలతో ముందుకు వెళ్లాలనుకునే వారు జపాన్ వైపు అడుగులు వేయవచ్చు. చివరికి ఏ దేశాన్ని ఎంచుకోవాలన్నది విద్యార్థి లక్ష్యాలు, ఆర్థిక పరిస్థితి, భవిష్యత్ ప్రణాళికలపై ఆధారపడి ఉంటుంది. సరైన సమాచారం, స్పష్టమైన ఆలోచనతో తీసుకున్న నిర్ణయమే విదేశీ చదువుల్లో విజయానికి బాట వేస్తుంది.
