- అమెరికాలో ఇరాన్ స్లీపర్ సెల్స్ ఉన్నాయని ఆరోపణ…
- గంటలోనే ఇరాన్ విద్యుత్ వ్యవస్థను ధ్వంసం చేయగలమని ట్రంప్ హెచ్చరిక..
Donald Trump Comments On Iran: అమెరికా అధ్యక్షుడు డొనాల్డ్ ట్రంప్ ఇరాన్తో కొనసాగుతున్న ఉద్రిక్తతల నేపథ్యంలో అత్యంత శక్తిమంతమైన హెచ్చరికలు జారీ చేశారు. తాము గనుక తలచుకుంటే కేవలం ఒక గంట వ్యవధిలోనే ఇరాన్ దేశానికి చెందిన విద్యుత్ వ్యవస్థను పూర్తిగా ధ్వంసం చేయగలమని, దానిని తిరిగి నిర్మించుకోవడానికి వారికి కనీసం 25 ఏళ్ల సమయం పడుతుందని ఆయన సంచలన వ్యాఖ్యలు చేశారు. అయితే, అటువంటి తీవ్రమైన చర్యకు తాము సిద్ధంగా లేమని చెబుతూనే, ఇప్పటికే ఇరాన్ సైనిక శక్తిని గణనీయంగా నిర్వీర్యం చేశామని, వారి నౌకాదళం మరియు వాయుసేనలను తుడిచిపెట్టేశామని ట్రంప్ స్పష్టం చేశారు. అదే సమయంలో, కాలిఫోర్నియా తీరంలో ఒక పడవ నుండి డ్రోన్లతో దాడి చేసేందుకు ఇరాన్ పన్నుతున్న కుట్రపై తమ నిఘా వర్గాలు దర్యాప్తు చేస్తున్నాయని ఆయన వెల్లడించారు.
కెంటకీ, ఒహియో పర్యటనల అనంతరం జాయింట్ బేస్ ఆండ్రూస్లో విలేకరులతో మాట్లాడిన ట్రంప్, అమెరికా చేపడుతున్న సైనిక చర్యలకు ఇతర అగ్రరాజ్యాల నుంచి ప్రైవేట్గా మద్దతు లభిస్తోందని పేర్కొన్నారు. గత ప్రభుత్వ హయాంలో బైడెన్ అనుసరించిన 'ఓపెన్ బార్డర్' విధానాల వల్ల ఇరాన్కు చెందిన స్లీపర్ సెల్స్ అమెరికాలోకి ప్రవేశించాయని ఆయన తీవ్రంగా ఆరోపించారు. సరిహద్దుల ద్వారా చొరబడిన వారు ఎక్కడున్నారో తమకు తెలుసని, వారిపై నిరంతరం నిఘా ఉంచామని ఆయన భరోసా ఇచ్చారు. ఈ యుద్ధ వాతావరణం వల్ల అంతర్జాతీయ ఇంధన మార్కెట్లలో ధరలు పెరగకుండా ఉండేందుకు, అమెరికా వద్ద ఉన్న వ్యూహాత్మక నిల్వల (Strategic Petroleum Reserves) నుంచి చమురును విడుదల చేసేందుకు సిద్ధమవుతున్నామని, ఈ ప్రక్రియను అత్యంత వేగంగా ప్రారంభిస్తామని ట్రంప్ వివరించారు.
