MATA Convention 2026: అమెరికాలో భద్రాద్రి రాముడి కల్యాణం..‘మాటా’ ఆధ్వర్యంలో వైభవంగా ఏర్పాట్లు..!!

MATA Convention 2026: తెలుగు వారందరినీ ఒకచోట చేర్చుతూ మన అమెరికా తెలుగు సంఘం మాటా తన రెండో మహాసభలను అత్యంత ఘనంగా నిర్వహించేందుకు సిద్ధమైంది. ఈ వేడుకల్లో భాగంగా జూన్ 20వ తేదీ శనివారం నాడు పెన్సిల్వేనియాలోని గ్రేటర్ ఫిలడెల్ఫియా ఎక్స్‌పో సెంటర్‌లో శ్రీ సీతారామ కల్యాణం, శ్రీరామ పట్టాభిషేక మహోత్సవాలను నిర్వహించనున్నారు. ఈ ఆధ్యాత్మిక కార్యక్రమం ఉదయం 8 గంటల నుండి 11 గంటల వరకు కొనసాగుతుందని నిర్వాహకులు వెల్లడించారు.

ఈ కార్యక్రమం యొక్క ప్రత్యేకత ఏమిటంటే, సాక్షాత్తూ భద్రాచలం పుణ్యక్షేత్రం నుండి అర్చక స్వాములు విచ్చేసి ఈ కల్యాణాన్ని జరిపించనున్నారు. భద్రాద్రి నుండి తీసుకువచ్చిన పవిత్ర విగ్రహాలకు వేద మంత్రాల సాక్షిగా, శాస్త్రోక్తంగా కల్యాణ క్రతువును పూర్తి చేస్తారు. విదేశాల్లో ఉన్నా సరే, మన ఊరి గుడిలో జరుగుతున్నంత భక్తిశ్రద్ధలతో ఈ వేడుకను నిర్వహించేందుకు మాటా కార్యవర్గం అన్ని ఏర్పాట్లు చేస్తోంది.

ఈ వేడుకకు హాజరయ్యే భక్తులకు భద్రాచలం నుండి ప్రత్యేకంగా తీసుకువచ్చిన పవిత్ర ప్రసాదం, అక్షింతలు  అందజేయనున్నారు. అంతేకాకుండా ఈ కార్యక్రమంలో మరో ప్రధాన ఆకర్షణగా 'రామసేతు' వంతెనలోని పవిత్రమైన 'రామశిల'ను భక్తుల దర్శనం కోసం ఉంచనున్నారు. రాముడి అడుగుజాడలను స్మరించుకుంటూ ఈ శిలను దర్శించుకోవడం భక్తులకు ఒక మరపురాని అనుభూతిని మిగుల్చుతుందని నిర్వాహక ప్రతినిధులు తెలిపారు.

ప్రవాస భారతీయుల్లో ఆధ్యాత్మిక చింతనను పెంపొందించడమే కాకుండా, మన తెలుగు సంస్కృతి, సంప్రదాయాలను తర్వాతి తరాలకు అందించాలనే లక్ష్యంతో ఈ కార్యక్రమాన్ని రూపొందించారు. అమెరికాలోని వివిధ రాష్ట్రాల నుండి తెలుగు వారు పెద్ద ఎత్తున తరలివచ్చి, సీతారాముల ఆశీస్సులు పొందాలని మాటా కమిటీ సభ్యులు కోరుతున్నారు. ఈ చారిత్రాత్మక ఘట్టాన్ని కళ్లారా చూసేందుకు కుటుంబ సమేతంగా రావాలని వారు విజ్ఞప్తి చేశారు.

ఈ కార్యక్రమానికి హాజరు కావాలనుకునే భక్తులు ముందుగానే తమ పేర్లను నమోదు చేసుకోవాలని నిర్వాహకులు సూచించారు. సరైన ఏర్పాట్లు చేసేందుకు, భక్తుల రద్దీని దృష్టిలో ఉంచుకుని ఈ రిజిస్ట్రేషన్ ప్రక్రియను చేపట్టినట్లు తెలిపారు. భక్తి భావంతో సాగే ఈ మహోత్సవంలో పాలుపంచుకుని, అమెరికా గడ్డపై భద్రాద్రి రాముడి వైభవాన్ని చాటాలని తెలుగు సమాజానికి పిలుపునిచ్చారు.