Mangala Kuppa: భారత సంతతికి మరో అరుదైన గౌరవం! అమెరికా కార్మిక శాఖ సీఐవోగా మంగళ కుప్పా!
US Chief AI Officer: అమెరికా ప్రభుత్వంలో భారత సంతతికి చెందిన నిపుణులు కీలక స్థానాలు.. మరో మహిళా సాంకేతిక నిపుణురాలు విశిష్ట స్థానం. అమెరికా కార్మిక శాఖ (US Department of Labor) ముఖ్య సమాచార అధికారిగా నియామకం.
అమెరికాలో భారత సంతతికి అరుదైన గౌరవం..
అమెరికా కార్మిక శాఖలో కీలక పదవి..
అమెరికా ప్రభుత్వంలో భారత సంతతికి చెందిన నిపుణులు కీలక స్థానాలను అధిరోహిస్తూ ముందుకు సాగుతున్న నేపథ్యంలో, మరో మహిళా సాంకేతిక నిపుణురాలు విశిష్ట స్థానాన్ని దక్కించుకున్నారు. భారత సంతతికి చెందిన మంగళ కుప్పాను అమెరికా కార్మిక శాఖ (US Department of Labor) ముఖ్య సమాచార అధికారి (Chief Information Officer – CIO)గా అధికారికంగా నియమించారు.
గత ఏడాది అక్టోబర్ నుంచి తాత్కాలిక హోదాలో ఈ బాధ్యతలను నిర్వహిస్తున్న ఆమెకు, తాజాగా పూర్తిస్థాయి బాధ్యతలను అప్పగించడం విశేషం.
ఏఐ విభాగానికి కూడా నేతృత్వం
సీఐవోగా బాధ్యతలు చేపట్టడంతో పాటు, ఈ నెల ప్రారంభం నుంచి మంగళ కుప్పా కార్మిక శాఖలో ముఖ్య కృత్రిమ మేధస్సు (Chief AI Officer)గా కూడా నియమితులయ్యారు. ఈ రెండు కీలక బాధ్యతల్లో భాగంగా, సమాచార సాంకేతిక వ్యూహాలు, డిజిటల్ మార్పులు, అలాగే ఏఐ వినియోగంపై ఆమె సమగ్ర పర్యవేక్షణ వహించనున్నారు.
మంగళ కుప్పాకు టెక్నాలజీ రంగంలో 25 ఏళ్లకు పైగా అనుభవం ఉంది. 2010లో అమెరికా కార్మిక శాఖలో చేరిన ఆమె, అప్పటి నుంచి అనేక కీలక బాధ్యతలను సమర్థంగా నిర్వహించారు. చీఫ్ టెక్నాలజీ ఆఫీసర్, డైరెక్టర్ ఆఫ్ బిజినెస్ అప్లికేషన్ సర్వీసెస్ వంటి ఉన్నత హోదాల్లో సేవలందించి, తన ప్రతిభను చాటుకున్నారు.
మంగళ కుప్పా ఈ ఉన్నత స్థానాన్ని అధిరోహించడం భారతీయులకు గర్వకారణంగా నిలిచింది. సాంకేతిక రంగంలో ఆమె చూపుతున్న ప్రతిభ, నాయకత్వ లక్షణాలు యువతకు ప్రేరణగా నిలుస్తాయని పలువురు అభిప్రాయపడుతున్నారు. ఈ నియామకం ద్వారా అమెరికా ప్రభుత్వంలో భారతీయుల ప్రతిభకు మరొక గుర్తింపు లభించినట్టైంది.
Be the first to react
