Nri- అమెరికా తర్వాత కెనడాలోనూ గన్ కల్చర్ విలయం…
కారులో వెళ్తుండగా తూటాల వర్షం…
కెనడాలో ఆగని రక్తపాతం.. కాల్పుల దాడిలో అన్మోల్, అమృత్పాల్ మృతి…
Gun Shooting: కెనడాలో భారతీయ సంతతికి చెందిన ఇద్దరు టీనేజర్లు కాల్పులకు గురై ప్రాణాలు కోల్పోయిన ఘటన ప్రవాస భారతీయులను తీవ్ర దిగ్భ్రాంతికి గురిచేసింది. కెనడాలోని అబ్బోట్స్ఫోర్డ్లో జరిగిన ఈ ఘోర ప్రమాదంలో 18 ఏళ్ల అన్మోల్ సంధు, 19 ఏళ్ల అమృత్పాల్ సంధు అనే యువకులు మరణించినట్లు అక్కడి పోలీసులు గుర్తించారు. వీరు ప్రయాణిస్తున్న కారుపై దుండగులు ఒక్కసారిగా తూటాల వర్షం కురిపించడంతో వారు అక్కడికక్కడే మృతి చెందారు. స్థానిక కాలమానం ప్రకారం అర్థరాత్రి ఈ కాల్పులు చోటుచేసుకున్నట్లు సమాచారం.
ఈ కాల్పులు జరిగిన వెంటనే పోలీసులు రంగ ప్రవేశం చేసి దర్యాప్తు ప్రారంభించారు. మరణించిన యువకులకు ఎటువంటి నేర చరిత్ర లేదని, వారు చదువుకుంటున్న విద్యార్థులని ప్రాథమిక విచారణలో తేలింది. అయితే, ఇది ఉద్దేశపూర్వకంగా జరిగిన దాడియా లేక పొరపాటున ఇతరులకు బదులుగా వీరిపై కాల్పులు జరిపారా అనే కోణంలో పోలీసులు ఆరా తీస్తున్నారు. సంఘటనా స్థలం సమీపంలో ఉన్న సీసీటీవీ ఫుటేజీలను పరిశీలిస్తున్నామని, నిందితులను పట్టుకునేందుకు ప్రత్యేక బృందాలను రంగంలోకి దించామని అధికారులు వెల్లడించారు.
కెనడాలో ఇటీవల కాలంలో భారతీయ విద్యార్థులపై దాడులు పెరుగుతుండటం ఆందోళన కలిగిస్తోంది. మరణించిన యువకుల కుటుంబ సభ్యులు కన్నీరుమున్నీరవుతున్నారు. వారి మృతదేహాలను భారత్కు తరలించేందుకు భారత దౌత్య కార్యాలయం అధికారులతో సమన్వయం చేసుకుంటున్నట్లు సమాచారం. కెనడాలోని భారతీయ సంఘాలు ఈ ఘటనను తీవ్రంగా ఖండిస్తూ, భారతీయుల భద్రతపై అక్కడి ప్రభుత్వం తగిన చర్యలు తీసుకోవాలని డిమాండ్ చేస్తున్నాయి.
