2025 ఆగస్టు 28న బాలి (డెన్పసార్) నుంచి బ్రిస్బేన్‌కు బయల్దేరిన వర్జిన్ ఆస్ట్రేలియా VA50 విమానం ప్రయాణికులకు జీవితంలో మరిచిపోలేని అనుభవాన్ని కలిగించింది. బోయింగ్ 737 MAX 8 విమానంలో ప్రయాణం ఆరు గంటల పాటు సాగింది. కానీ టాయిలెట్లు పనిచేయకపోవడంతో ఈ ప్రయాణం ప్రయాణికులకు ఒక భయంకరమైన, అవమానకరమైన అనుభవంగా మారింది. పరిశుభ్రత, సదుపాయాలపై విమానయాన సంస్థ నిర్లక్ష్యం ఎక్కడానికి ఈ ఘటన కారణమైంది.
డెన్పసార్ నుంచి బయలుదేరే ముందు నుంచే ఒక టాయిలెట్ పనిచేయడం లేదని సిబ్బందికి తెలిసింది. అయినా సాంకేతిక సహాయం అందుబాటులో లేదని, మిగిలిన రెండు టాయిలెట్లతో ప్రయాణికులు సర్దుకుంటారని భావించి, ఫ్లైట్ ఆలస్యం చేయకుండా నడిపించారు. అయితే పూర్తిగా నిండిన విమానంలో రెండు టాయిలెట్లు సరిపోవని స్పష్టమే. టేకాఫ్ అయిన కొద్ది సేపటికే రెండవ టాయిలెట్ కూడా పనిచేయకపోవడంతో పరిస్థితి మరింత కఠినమైంది.
మొదట్లో ఒకటే టాయిలెట్ మిగిలి ఉండటంతో పెద్ద క్యూలు ఏర్పడ్డాయి. ఒక్కసారి వాడిన తర్వాత మరొకరు ఉపయోగించడానికి 30–40 నిమిషాల వరకు వేచి చూడాల్సి వచ్చింది. దాదాపు మూడు గంటల తర్వాత చివరి టాయిలెట్ కూడా పనిచేయకపోవడంతో పరిస్థితి దారుణంగా మారింది. అటెండెంట్లు బాటిల్స్ వాడాలని సూచించాల్సి వచ్చింది. ఒక వృద్ధురాలు భరించలేక బట్టల్లోనే టాయిలెట్ చేయగా, మరొకరు వాష్ బేసిన్ వాడిన సంఘటనలు జరిగాయి. దీనివల్ల విమానం మొత్తం దుర్వాసనతో నిండిపోయింది.
ఈ సమస్యకు కారణం నీటి సరఫరా లేకపోవడమే. టాయిలెట్‌లో ఫ్లష్ పని చేయకపోవడంతో వ్యర్థాలు అలాగే పేరుకుపోయాయి. పిల్లలు, వృద్ధులు, మహిళలు తీవ్రంగా ఇబ్బంది పడ్డారు. అయితే ఈ పరిస్థితుల్లోనూ క్యాబిన్ సిబ్బంది శ్రమించి, వ్యర్థాలను మాన్యువల్గా తొలగించేందుకు ప్రయత్నించారు. ప్రయాణికుల ఇబ్బందులు తగ్గించేందుకు చేసిన ఈ కృషి వారికి ప్రశంసలు తెచ్చిపెట్టింది.
ఈ ఘటనపై వర్జిన్ ఆస్ట్రేలియా స్పందించింది. తమ తప్పును అంగీకరించి, ప్రయాణికులకు బహిరంగ క్షమాపణలు తెలిపింది. అంతేకాదు, ఫ్లైట్ ఖర్చులను పూర్తిగా తిరిగి ఇస్తామని, వ్యక్తిగతంగా సంప్రదిస్తామని హామీ ఇచ్చింది. కష్టకాలంలో కర్తవ్యాన్ని నిర్వర్తించిన క్యాబిన్ సిబ్బందిని అభినందించింది. భవిష్యత్తులో ఇలాంటి సమస్యలు మళ్లీ రాకుండా కఠిన చర్యలు తీసుకుంటామని కూడా వెల్లడించింది.
