UAE: ప్రవాసులకు యూఏఈ బంపర్ ఆఫర్.. నివాస స్థితిని మార్చుకునేందుకు నివాసితులకు గోల్డెన్ ఛాన్స్.!

• వీసా ఎక్స్‌పైర్ అయ్యిందని ఆందోళన వద్దు: ప్రవాసుల కోసం ఐసీపీ (ICP) కీలక నిర్ణయం..
   
• విదేశాల్లో చిక్కుకున్న వారికి ఊరట: వీసా గడువు ముగిసినా యూఏఈకి వెళ్లే మార్గం సుగమం..

UAE bumper offer: యునైటెడ్ అరబ్ ఎమిరేట్స్‌లో (UAE) నివసిస్తున్న ప్రవాసులకు అక్కడి ప్రభుత్వం ఒక అద్భుతమైన ఊరటనిచ్చింది. సాధారణంగా రెసిడెన్సీ వీసా గడువు ముగిసిన వారు దేశంలోకి తిరిగి ప్రవేశించాలంటే కొత్త అనుమతులు తప్పనిసరి, కానీ ఇప్పుడు ఆ నిబంధన నుంచి తాత్కాలికంగా మినహాయింపునిచ్చారు. ఫెడరల్ అథారిటీ ఫర్ ఐడెంటిటీ, సిటిజన్ షిప్, కస్టమ్స్ అండ్ పోర్ట్స్ సెక్యూరిటీ (ICP) తీసుకున్న ఈ కీలక నిర్ణయం ప్రకారం, కొత్త ప్రవేశ అనుమతి (Entry Permit) లేకపోయినా ప్రవాసులు తిరిగి యూఏఈకి చేరుకోవచ్చు. ఈ ప్రత్యేక వెసులుబాటు ఫిబ్రవరి 28 నుంచి మార్చి 31 వరకు, అంటే ఒక నెల రోజుల పాటు మాత్రమే అందుబాటులో ఉంటుంది. వివిధ కారణాల వల్ల విదేశాలకు వెళ్లి, వీసా గడువు ముగిసేలోపు తిరిగి రాలేకపోయిన వేలాది మంది భారతీయులతో సహా ఇతర దేశాల ప్రవాసులకు ఇది గొప్ప అవకాశంగా మారింది.

ఈ చర్య ద్వారా ప్రవాస నివాసితులు తమ నివాస ప్రాంతాలకు తిరిగి రావడాన్ని సులభతరం చేయడమే కాకుండా, వారి ప్రయాణాలను మరింత సౌకర్యవంతం చేయడం లక్ష్యంగా పెట్టుకున్నామని ఐసీపీ తన అధికారిక ప్రకటనలో స్పష్టం చేసింది. ఈ గడువులోగా యూఏఈలో ప్రవేశించిన అర్హులైన నివాసితులు, ఆ తర్వాత సంబంధిత అధికారిక విధానాలను అనుసరించి తమ నివాస స్థితిని (Residency Status) చట్టబద్ధంగా క్రమబద్ధీకరించుకోవడానికి అవకాశం ఉంటుంది. దీనివల్ల వీసా గడువు ముగిసిందనే ఆందోళనతో విదేశాల్లో చిక్కుకుపోయిన వారికి విమాన ప్రయాణాల్లో ఎటువంటి ఇబ్బందులు ఎదురుకావు.