తిరుమల వెంకన్న దర్శనానికి వెళ్ళే ఉభయ గోదావరి జిల్లాల భక్తులకు ఈ దసరా పండుగ ప్రత్యేక కానుక లభించింది. అక్టోబర్ 1 నుంచి రాజమహేంద్రవరం–తిరుపతి మధ్య కొత్త విమాన సర్వీసును అలయన్స్ ఎయిర్ ప్రారంభించింది. ఇప్పటివరకు హైదరాబాద్, బెంగళూరు, చెన్నై, ఢిల్లీ, ముంబై వంటి నగరాలకే విమాన సౌకర్యం ఉండగా, ఇప్పుడు తిరుపతి కూడా ఈ జాబితాలో చేరింది. దీంతో భక్తులు తక్కువ సమయంలోనే తిరుమల శ్రీవారి దర్శనానికి చేరుకునే అవకాశం లభించడంతో సంతోషం వ్యక్తం చేస్తున్నారు.
సాధారణంగా రాజమహేంద్రవరం నుంచి తిరుపతికి రోడ్డు మార్గంలో వెళ్లాలంటే ఎనిమిది నుండి పది గంటల సమయం పట్టేది. కానీ ఇప్పుడు ఈ విమాన సర్వీస్‌తో కేవలం గంటన్నరలోనే తిరుపతి చేరుకోవచ్చు. వారానికి మూడు రోజులు—మంగళవారం, గురువారం, శనివారం—ఈ సర్వీసు నడుస్తుంది. తిరుపతి నుంచి ఉదయం 7:40కి బయలుదేరిన విమానం 9:25కి రాజమహేంద్రవరం చేరుతుంది. తిరిగి 9:50కి రాజమహేంద్రవరం నుంచి బయలుదేరిన విమానం 11:20కి తిరుపతి చేరుతుంది. ఈ సమయాలు భక్తులకు అత్యంత అనుకూలంగా ఉండటంతో డిమాండ్ కూడా పెరుగుతోంది.
మొదటి రెండు రోజుల్లోనే ఈ విమానానికి మంచి స్పందన లభించింది. మొదటి రోజు రాజమహేంద్రవరం నుంచి 66 మంది భక్తులు తిరుపతికి వెళ్ళగా, రెండో రోజు 67 మంది ప్రయాణించారు. తిరుపతి నుంచి కూడా వరుసగా 38, 40 మంది ప్రయాణికులు వచ్చారు. మొత్తం 70 సీట్లు ఉన్న ఈ విమానంలో సగం టికెట్లు కేవలం రూ.1,999కి అందుబాటులో ఉండటం, మిగతా టికెట్లు రూ.4,000 వరకు మాత్రమే ఉండటంతో ప్రయాణికులు సంతృప్తి వ్యక్తం చేస్తున్నారు. రైలు లేదా బస్సు ప్రయాణంతో పోలిస్తే సమయం, శ్రమ రెండూ ఆదా అవుతున్నాయని ప్రయాణికులు అంటున్నారు.
ఈ కొత్త విమాన సర్వీస్ ప్రారంభం వల్ల భక్తులకు భౌతిక, మానసిక అలసట లేకుండా తక్కువ సమయంలోనే తిరుమల శ్రీవారి దర్శనానికి వెళ్లే అవకాశం ఏర్పడింది. ప్రత్యేకించి పండుగ కాలంలో భక్తుల సంఖ్య అధికంగా ఉండే పరిస్థితిలో ఈ విమాన సేవలు వారికి గొప్ప ఊరటగా నిలుస్తున్నాయి. భవిష్యత్తులో ఈ సర్వీసు వారానికి మరిన్ని రోజులు నడుస్తుందనే అంచనాలు వ్యక్తమవుతున్నాయి. తక్కువ ఖర్చుతో, తక్కువ సమయంతో ప్రయాణం పూర్తి చేసుకునే వీలుండటం వల్ల గోదావరి జిల్లాల భక్తులు ఈ కొత్త సౌకర్యాన్ని ఆనందంగా స్వాగతిస్తున్నారు.
