డిజిటల్ చెల్లింపులలో యూపీఐ దుమ్మురేపుతోంది.
భారత్‌లో యూనిఫైడ్ పేమెంట్ ఇంటర్‌ఫేస్‌ (యూపీఐ) వినియోగం ప్రతీ నెల కొత్త రికార్డులు సృష్టిస్తోంది. 2016లో ప్రారంభమైనప్పటి నుంచి రోజువారీ జీవితంలో భాగమైపోయిన యూపీఐ, ఇప్పుడు చిన్న షాపింగ్‌ నుంచి కోట్ల విలువైన లావాదేవీల వరకు వాడబడుతోంది. తాజాగా, ఆగస్టు నెలలోనే తొలిసారిగా 2000 కోట్ల లావాదేవీల మైలురాయిని అధిగమించి చరిత్ర సృష్టించింది. ఈ లావాదేవీల మొత్తం విలువ రూ.24.85 లక్షల కోట్లకు చేరింది.
ఫోన్‌పే ఆధిపత్యం కొనసాగుతోంది.
యూపీఐ మార్కెట్‌లో ఫోన్‌పే, గూగుల్ పే, పేటీఎం మధ్య ఎప్పటిలాగే గట్టి పోటీ కొనసాగుతోంది. కానీ తాజా గణాంకాలు చూస్తే ఫోన్‌పే స్పష్టమైన ఆధిక్యాన్ని ప్రదర్శిస్తోంది. ఒక్క ఆగస్టు నెలలోనే 960 కోట్ల లావాదేవీలు జరిపిన ఫోన్‌పే వాటా 48.64 శాతానికి చేరింది. వీటి విలువ ఏకంగా రూ.12 లక్షల కోట్లకు పైగా ఉండటం గమనార్హం.
గూగుల్ పే రెండో స్థానం.. పేటీఎం వెనకంజ.
మొత్తం యూపీఐ లావాదేవీలలో గూగుల్ పే 35.53 శాతం వాటాతో రెండో స్థానంలో నిలిచింది. ఆగస్టు నెలలో 740 కోట్ల లావాదేవీలు గూగుల్ పే ద్వారా జరిగాయి. వీటి విలువ రూ.8.83 లక్షల కోట్లుగా నమోదైంది. ఒకప్పుడు టాప్ కాంపిటీటర్‌గా ఉన్న పేటీఎం మాత్రం ఇప్పుడు వెనకబడింది. దాని మార్కెట్ వాటా 8.5 శాతానికి పడిపోవడం గమనించదగ్గ విషయం.
కొత్త యాప్‌లకు కూడా చోటు.
ప్రముఖ యాప్‌లతో పాటు క్రెడ్‌, నవీ వంటి కొత్త ప్లేయర్లు కూడా తమకంటూ కొంత శాతం మార్కెట్‌ను సంపాదించుకున్నాయి. అయినా, ఫోన్‌పే ప్రదర్శన చూస్తే యూపీఐ రంగంలో తన ఆధిపత్యాన్ని మరింత బలంగా స్థిరపరచుకుంటోందని స్పష్టమవుతోంది. ఎన్‌పీసీఐ విడుదల చేసిన ఈ గణాంకాలు భవిష్యత్తులో డిజిటల్ చెల్లింపులు ఇంకా పెరుగుతాయనే సంకేతాలు ఇస్తున్నాయి.
