Peddi Movie Review: 'పెద్ది' మూవీ రివ్యూ: గెలుపు శబ్దం వినిపించిందా?.. రామ్ చరణ్ వన్‌మెన్ షో ఎలా ఉందంటే!

• క్రికెట్, కుస్తీ, రన్నింగ్.. మూడు ఆటల జాతరగా 'పెద్ది'.. బుచ్చిబాబు సానా సాహసం ఫలించిందా?
   
• Cinema: 'పెద్ది' రివ్యూ: ఊరి గుర్తింపు కోసం ఒక యోధుడి పోరాటం.. ఏఆర్ రెహ్మాన్ సంగీతం మేజర్ ప్లస్!

Peddi Movie Review: గ్లోబల్ స్టార్ రామ్ చరణ్ టాలెంటెడ్ డైరెక్టర్ బుచ్చిబాబు సానా కాంబినేషన్‌లో ఎంతో ప్రతిష్టాత్మకంగా తెరకెక్కిన రూరల్ స్పోర్ట్స్ యాక్షన్ డ్రామా ‘పెద్ది’ ఈరోజు జూన్ 4వ తేదీన భారీ అంచనాల మధ్య ప్రపంచవ్యాప్తంగా థియేటర్లలోకి వచ్చింది. ఈ కథను పకడ్బందీగా సిద్ధం చేయడానికి బుచ్చిబాబు చాలా కాలం పాటు శ్రమించగా, కథలోని వైవిధ్యం మరియు దర్శకుడిపై ఉన్న నమ్మకంతో గ్రీన్ సిగ్నల్ ఇవ్వడానికి రామ్ చరణ్ కూడా తగినంత సమయం తీసుకున్నారు. చరణ్ సరసన బాలీవుడ్ బ్యూటీ జాన్వీ కపూర్ తొలిసారిగా నటిస్తుండటం, దీనికి ఆస్కార్ విజేత ఏఆర్ రెహ్మాన్ సంగీతం తోడవడంతో మొదటి నుంచే ఈ సినిమాపై ట్రేడ్ వర్గాల్లోను, ప్రేక్షకుల్లోను భారీ ఆసక్తి నెలకొంది. విజయనగరం జిల్లా నేపధ్యంలోని ‘కొండకింద ఊరు’ అనే గుర్తింపు లేని ఒక పల్లెటూరి చుట్టూ ఈ కథ తిరుగుతుంది. దాదాపు 450 కుటుంబాలు నివసిస్తున్న ఆ గ్రామానికి కనీసం ఓటు హక్కు గానీ, ఊరి మీదుగా వెళ్లే రైలు ఆగేందుకు స్టేషన్ గానీ ఉండదు. తమ ఊరి ప్రజల కష్టాలను చూసి చలించిపోయిన అప్పల సూరి (జగపతిబాబు) అనే వ్యక్తి ఎలాగైనా అక్కడ రైలు ఆగేలా చేయాలని ముప్పై ఏళ్లుగా ప్రభుత్వ కార్యాలయాల చుట్టూ తిరుగుతూ పోరాటం చేస్తుంటాడు. అదే ఊరిలో ఉంటూ బెల్లం బట్టీలో పనిచేసే ‘పెద్ది’ (రామ్ చరణ్) స్థానికంగా ‘ఆటకూలి’గా క్రికెట్ ఆడుతూ అజేయమైన ఆటగాడిగా పేరు తెచ్చుకుంటాడు. ఈ క్రమంలోనే ఆ ప్రాంతపు పలకబడి ఉన్న రాజకీయ నాయకుడు సుభద్రరాజు (రావు రమేశ్) కుమార్తె అయిన అచ్చియమ్మ (జాన్వీ కపూర్)తో పెద్ది ప్రేమలో పడతాడు.

కథలో ఊరి కోసం పోరాడుతున్న అప్పల సూరి ఆశయం నెరవేరకుండానే ప్రాణత్యాగం చేయాల్సి వస్తుంది. అతని మరణం పెద్దిని తీవ్రంగా ఆలోచింపజేయడమే కాకుండా, ఒక గ్రామానికి సమాజంలో గుర్తింపు అనేది ఎంత అవసరమో గ్రహించేలా చేస్తుంది. తన ఊరికి గుర్తింపు రావాలంటే ముందు తాను ఎంచుకున్న క్రీడా రంగంలో అంతర్జాతీయ స్థాయి విజయాన్ని సాధించాలని పెద్ది నిర్ణయించుకుని పోరాటం ప్రారంభిస్తాడు. పాతికేళ్ల వయసులోనే జీవితాన్ని వృథా చేయకుండా, అనుకున్నది ఇప్పుడే సాధించాలనే పట్టుదల గల యువకుడి ప్రయాణమే ఈ చిత్రం. దర్శకుడు బుచ్చిబాబు ఈ స్పోర్ట్స్ డ్రామాలో క్రికెట్, కుస్తీ, పరుగు పందెం అనే మూడు భిన్నమైన క్రీడలను కథలో ఎమోషనల్‌గా మిక్స్ చేసి భారీ స్థాయిలో ఆవిష్కరించడంలో సఫలీకృతుడయ్యారు. అయితే సినిమా అంతా ఆటలకే ఎక్కువ సమయం కేటాయించడంతో మాస్ ఆడియన్స్ ఆశించే లవ్, రొమాన్స్, వినోదం వంటి వాటా తగ్గడం కాస్త అసంతృప్తిని కలిగిస్తుంది. అలాగే కథలో ఒక పవర్‌ఫుల్ విలన్ అంటూ లేకుండా హీరో చుట్టూ ఉన్న పరిస్థితులనే విలన్‌గా చూపించడం వల్ల ప్రేక్షకులు పెద్దగా టెన్షన్ లేకుండా కథను ఫాలో అవుతారు. హీరోయిన్ జాన్వీ కపూర్ పాత్ర కేవలం అప్పుడప్పుడు మాత్రమే కనిపిస్తూ, ఆమెపై పెద్దగా ఫోకస్ పెట్టనట్టు అనిపిస్తుంది. ప్రేమానురాగాలు పెద్దగా ముదరక ముందే ఆమె హీరో పేరుతో తాళి కట్టేసుకోవడం ప్రేక్షకులను కాస్త బిత్తరపోయేలా చేస్తుంది. రావు రమేశ్ పాత్ర కూడా కేవలం తండ్రిగా వచ్చి వెళ్ళిపోతుంది.

తెరపై అప్పటికప్పుడు వచ్చి అదృశ్యమయ్యే పాత్రలు కొన్ని ఉన్నప్పటికీ, హీరోగా రామ్ చరణ్ పాత్రను డిజైన్ చేసిన విధానం మరియు అతని అద్భుతమైన నటన, శారీరక కష్టం ప్రతి ఫ్రేమ్‌లోనూ స్పష్టంగా కనిపిస్తాయి. జగపతిబాబు, కన్నడ స్టార్ శివరాజ్‌కుమార్ తమ నటనతో ప్రభావితం చేయగా, శ్రుతి హాసన్ చేసిన స్పెషల్ సాంగ్ ఆశించిన స్థాయిలో విజిల్స్ వేయించలేకపోయింది. మైత్రీ మూవీ మేకర్స్ నిర్మాణ విలువలు చాలా రిచ్‌గా ఉన్నాయి మరియు రత్నవేలు సినిమాటోగ్రఫీ విజువల్స్‌ను గ్రాండ్‌గా చూపించింది. ఏఆర్ రెహ్మాన్ అందించిన బ్యాక్‌గ్రౌండ్ స్కోర్ మరియు సంగీతం ఈ సినిమాకు అతిపెద్ద బలంగా నిలిచాయి. నవీన్ నూలి ఎడిటింగ్, యాక్షన్ సీక్వెన్స్ కొరియోగ్రఫీ అద్భుతంగా కుదిరాయి. ‘నీకంటూ ఒక గుర్తింపు దక్కాలంటే నీ గెలుపు శబ్దం వినిపించాలి, అంతవరకు పరిగెడుతూనే ఉండాలి’ అనే సందేశం ప్రేక్షకులను ఆకట్టుకుంటుంది. కమర్షియల్ ఎలిమెంట్స్ కొంత తగ్గినప్పటికీ, ఒక మంచి కంటెంట్ ఉన్న క్రీడా నేపథ్య చిత్రంగా వచ్చిన ‘పెద్ది’కి ఫ్యామిలీ ఆడియన్స్ గనుక థియేటర్లకు క్యూ కడితే చరణ్ పడిన కష్టానికి తగిన ప్రతిఫలం దక్కడం ఖాయం.

Movie Details

Movie Name: Peddi
Release Date: 2026-06-04
Cast: Ram Charan,,Janhvi Kapoor ,Jagapathi Babu,Shiva Rajkumar ,,Divyenndu ,
Director: Buchi Babu Sana
Music: A R Rahman
Banner: Mythri Movie Makers - Sukumar Writings
Review By: Peddinti
Peddi Rating: 3 out of 5