ఆంధ్రప్రదేశ్ ప్రభుత్వం నుంచి వాహనదారులకు పెద్ద సంతోషకరమైన వార్త వచ్చింది. పాత వాహనాలపై వసూలు చేసే గ్రీన్ ట్యాక్స్ తగ్గింపు బిల్లుకు రాష్ట్ర అసెంబ్లీ ఆమోదం తెలిపింది. ఈ బిల్లును రవాణాశాఖ మంత్రి మండిపల్లి రాంప్రసాద్ రెడ్డి ప్రవేశపెట్టగా, సభ అంగీకరించింది. దీంతో వాహనదారులు చెల్లించే ట్యాక్స్ భారం గణనీయంగా తగ్గనుంది.
ఇప్పటివరకు పాత వాహనాలకు గ్రీన్ ట్యాక్స్ గరిష్టంగా రూ.20 వేల వరకూ ఉండేది. కానీ తాజా బిల్లుతో ఆ మొత్తం కేవలం రూ.3000కు తగ్గించబడింది. వాహనదారులకు ఇది భారీ ఉపశమనం కానుంది. గతంలో ఎన్నికల సమయంలో టీడీపీ కూటమి ఈ ట్యాక్స్ తగ్గిస్తామని హామీ ఇచ్చింది. అధికారంలోకి వచ్చిన తర్వాత ఆర్డినెన్స్ ద్వారా తగ్గింపు ఉత్తర్వులు ఇచ్చి, ఇప్పుడు అసెంబ్లీలో చట్టబద్ధం చేశారు.
సాధారణంగా లారీలు, బస్సులు వంటి పెద్ద వాహనాలకు ఏడు సంవత్సరాల తర్వాత ఫిట్‌నెస్ సర్టిఫికెట్ తీసుకోవాలంటే గ్రీన్ ట్యాక్స్ తప్పనిసరిగా చెల్లించాలి. వాహన రకం, వయసును బట్టి ఈ ట్యాక్స్ రూ.800 నుంచి రూ.20 వేల వరకూ ఉండేది. ప్రభుత్వం ఈ పన్ను ద్వారా కూడా కోట్ల రూపాయల ఆదాయం పొందుతూ వచ్చేది. అయితే వాహనదారులు ఇది అధికంగా ఉందని తరచూ ఫిర్యాదు చేశారు.
తెలంగాణ, తమిళనాడు వంటి పొరుగు రాష్ట్రాలతో పోలిస్తే ఆంధ్రప్రదేశ్‌లో గ్రీన్ ట్యాక్స్ ఎక్కువగా ఉందనే అభ్యంతరాలు లారీ యజమానులు, డ్రైవర్లు వ్యక్తం చేశారు. ఎన్నికల సమయంలో వాహనదారులు ఈ సమస్యను చంద్రబాబు, పవన్ కళ్యాణ్, నారా లోకేష్‌లకు తెలియజేశారు. వారు అధికారంలోకి వస్తే గ్రీన్ ట్యాక్స్ తగ్గిస్తామని హామీ ఇచ్చారు. ఆ మాట ప్రకారం ఇప్పుడు ఆ హామీ నెరవేర్చబడింది.
ఈ నిర్ణయం వల్ల పాత వాహనాల యజమానులకు భారీ ఉపశమనం లభించనుంది. ఇకపై ఫిట్‌నెస్ సర్టిఫికెట్ కోసం పెద్ద మొత్తం చెల్లించాల్సిన అవసరం లేదు. కేవలం రూ.3000తోనే సరిపెట్టుకోవచ్చు. దీనివల్ల వాహనదారులపై ఉన్న ఆర్థిక భారాన్ని తగ్గించడమే కాకుండా, ప్రభుత్వంపై నమ్మకం పెరిగే అవకాశం కూడా ఉంది.
