గత ఏడాది జరిగిన అసెంబ్లీ ఎన్నికల్లో ప్రజలు ఇచ్చిన విశేషమైన మద్దతుతో కూటమి ప్రభుత్వం విజయపథంలో అడుగుపెట్టింది. ఈ విజయానికి ఎన్నారైల సహకారం విశేషమైంది అన్నది అందరికీ తెలిసిందే. దేశం వెలుపల ఉన్నా, తమ ఊరిని, రాష్ట్రాన్ని గుర్తు పెట్టుకొని, రాజకీయంగా, ఆర్థికంగా సాయం అందించిన ఎన్నారైలు ఈ విజయానికి బలమైన ఆధార స్తంభాలుగా నిలిచారు. ఈ సహకారాన్ని గుర్తిస్తూ ముఖ్యమంత్రి చంద్రబాబు నాయుడు ప్రతీ వారం ఎన్నారైలతో భేటీ అవుతూ, వారి సేవలను అభినందిస్తున్నారు.
ఈ వారంలో కూడా కువైట్, ఖతార్, సౌదీ అరేబియా వంటి గల్ఫ్ దేశాల నుండి వచ్చిన ఎన్నారైలు ముఖ్యమంత్రి గారిని సచివాలయంలో మర్యాదపూర్వకంగా కలిశారు. ఈ సమావేశాన్ని ఎన్ఆర్ఐ టీడీపీ సెల్ కోఆర్డినేటర్ చప్పిడి రాజశేఖర్ సమన్వయం చేశారు. ముఖ్యమంత్రి గారు ఈ సందర్భంగా అందరినీ ఆత్మీయంగా పలకరించి, వారి కుటుంబ సభ్యుల గురించి, అక్కడి ఉద్యోగ పరిస్థితులు, జీవనశైలి, ఎదురవుతున్న సవాళ్లు వంటి విషయాలను ఆసక్తిగా అడిగి తెలుసుకున్నారు.
కువైట్ నుండి విజయ్ భాస్కర్ మరియు ఆయన భార్య, ఖతార్ నుండి నరేష్, సౌదీ అరేబియాలోని "సౌదీ అరేబియా తెలుగు అసోసియేషన్" (SATA) టీం సభ్యులు ముజామిల్, శిల్ప ముఖ్యమంత్రిని కలిసిన వారిలో ఉన్నారు. వారితో సరదాగా మాట్లాడుతూ ముఖ్యమంత్రి ప్రత్యేకంగా సమయం కేటాయించారు. ఎన్నారైలు తమ అనుభవాలను పంచుకుంటూ, రాష్ట్రాభివృద్ధిలో తమ వంతు పాత్రను ఉత్సాహంగా కొనసాగించాలని తెలిపారు.
ఈ సందర్భంలో ఎన్నారైలు ఇటీవల జరిగిన "P4" ప్రోగ్రామ్‌లో పాల్గొన్న విషయాన్ని సీఎం గారికి వివరించారు. తమవంతు సాయం రూపంలో కొన్ని కుటుంబాలను దత్తత తీసుకొని వారికి అవసరమైన సాయం అందిస్తున్నామని చెప్పారు. అదేకాకుండా, ఈ కార్యక్రమం గురించి మరికొందరికి తెలియజేసి వారిని కూడా ఈ సేవా కార్యక్రమంలో భాగస్వాములను చేయాలనే ఉద్దేశ్యంతో కృషి చేస్తున్నామని తెలిపారు. ఈ స్ఫూర్తిదాయకమైన సేవా భావం చూసి ముఖ్యమంత్రి చంద్రబాబు వారిని హృదయపూర్వకంగా అభినందించారు.
సమావేశంలో ముఖ్యమంత్రి గారి వినమ్రత, ఆత్మీయత, సాదాసీదా స్వభావం ఎన్నారైల హృదయాలను గెలుచుకుంది. దేశం వెలుపల ఉన్నప్పటికీ రాష్ట్రంతో తమ అనుబంధాన్ని కొనసాగించడం పట్ల సీఎం గారు వారికి కృతజ్ఞతలు తెలిపారు. ఈ భేటీ అనంతరం ఎన్నారైలు తమ అనుభవాన్ని పంచుకుంటూ, ముఖ్యమంత్రితో ముఖాముఖి మాట్లాడటం జీవితంలో ఎప్పటికీ మరువలేని ప్రత్యేక క్షణమని అభివర్ణించారు.
మొత్తం మీద, ఈ సమావేశం ఎన్నారైలు మరియు రాష్ట్ర ప్రభుత్వం మధ్య ఉన్న ఆప్యాయత, పరస్పర గౌరవాన్ని మరింత బలపరిచింది. రాష్ట్ర అభివృద్ధి పథంలో ఎన్నారైలు చూపిస్తున్న చొరవ, సేవా దృక్పథం ప్రభుత్వం ముందుకు సాగడానికి ఒక ప్రేరణగా నిలుస్తోంది. భవిష్యత్తులో కూడా ఎన్నారైలతో ఇలాంటి స్నేహపూర్వక సమావేశాలు కొనసాగుతాయని, వారి సూచనలు, సహకారం రాష్ట్రానికి మరింత మేలు చేస్తుందని ఈ సమావేశం ద్వారా స్పష్టమైంది.
