కాశ్మీర్ సరస్సులలో కనిపించే హౌస్బోట్ షికారా రైడ్‌ ఇప్పుడు బీహార్‌లోనూ అందుబాటులోకి రానుంది. ఇకపై షికారా అనుభవం కోసం కాశ్మీర్ వెళ్ళాల్సిన అవసరం లేదు. బీహార్‌లోని కైమూర్ జిల్లా దుర్గావతి జలాశయం వద్ద కరంచట్ ఆనకట్టలో తొలిసారిగా ఆధునిక సౌకర్యాలతో హౌస్బోట్ ప్రారంభించారు.
ఆగస్టు 24న పర్యావరణ, అటవీ మరియు వాతావరణ మార్పుల శాఖ మంత్రి డా. సునీల్ కుమార్ దీనిని ప్రారంభించారు. ప్రస్తుతం ఇది ట్రయల్ దశలో ఉండగా, త్వరలోనే సాధారణ ప్రజలకు అందుబాటులోకి రానుంది.
ఈ హౌస్‌బోట్‌లో ప్రయాణించే వారికి ప్రకృతి అద్భుతాలు ప్రత్యక్షమవుతాయి. 10–12 జలపాతాల సౌందర్యం, చుట్టూ విస్తరించిన పచ్చదనం ఈ ప్రయాణాన్ని మరింత ప్రత్యేకం చేస్తాయి. అలలపై తేలియాడే ఈ హౌస్బోట్ విశ్రాంతి, సంతోషం, సహజసిద్ధమైన అనుభూతిని పర్యాటకులకు అందిస్తుంది.
హౌస్‌బోట్‌లో AC గదులు, ఆధునిక బాత్రూమ్‌లు, వంటశాల వంటి అన్ని సౌకర్యాలు కల్పించబడతాయి. ఇక్కడ 8–10 మంది సౌకర్యవంతంగా గడపగలుగుతారు. ప్రకృతి ఒడిలో ఆహారం, పానీయాలతో ఆనందించడానికి ఇది ఒక విలాసవంతమైన కొత్త గమ్యస్థానంగా మారబోతోంది.
ఈ సదుపాయం స్థానిక యువతకు ఉపాధి అవకాశాలు కల్పించడమే కాకుండా హోటళ్లు, రెస్టారెంట్లు, రవాణా, గైడ్‌లు, హస్తకళలు వంటి రంగాలకు కూడా ఊతమిస్తుంది. దీంతో కరంచట్ ఆనకట్ట ఇకపై పిక్నిక్ స్పాట్‌గానే కాకుండా పర్యాటక పటంలో ఒక ప్రధాన విలాసవంతమైన అనుభవంగా నిలుస్తుంది.
