ఇండియన్ ఎయిర్ ఫోర్స్ (IAF) తన 93వ వార్షికోత్సవాన్ని ఘనంగా జరుపుకుంది. ఈ సందర్భంగా జరిగిన విందు కార్యక్రమంలో పాకిస్తాన్‌పై జరిగిన “ఆపరేషన్ సిందూర్” విజయాన్ని సృజనాత్మకంగా ప్రతిబింబిస్తూ ప్రత్యేకమైన మెనూ సిద్ధం చేసింది. ఈ మెనూలో ‘రావల్పిండి చికెన్ టిక్కా మసాలా’, ‘రఫీకి రారా మటన్’, ‘జాకోబాబాద్ మేవా పులావ్’, ‘బాలాకోట్ తిరామిసు’ వంటి వంటకాలను చేర్చారు. ఇవన్నీ పాకిస్తాన్‌లోని ఎయిర్ బేస్‌ల పేర్లతో ఉండటం గమనార్హం. ఈ విధంగా భారత వైమానిక దళం పాకిస్తాన్‌పై గెలుపును చమత్కారంగా గుర్తుచేసుకుంటూ, తన సాహసాన్ని ఆహార సాంస్కృతిక రూపంలో ప్రదర్శించింది.
ఈ వినూత్న మెనూ సోషల్ మీడియాలో విపరీతంగా వైరల్ అయింది. ఆర్మీ, ఎయిర్ ఫోర్స్ అధికారులే కాకుండా సామాన్య ప్రజలు కూడా ఈ సృజనాత్మక ఆలోచనను ప్రశంసించారు. పాకిస్తాన్ నెటిజన్లు కూడా దీనిపై వ్యాఖ్యలు చేశారు. “నూర్ ఖాన్ ఎయిర్ బేస్ వంటకం మెనూలో లేదు, ఎందుకంటే అది దెబ్బతిన్నది కదా” అంటూ కొందరు వ్యంగ్యంగా రాశారు. మరికొందరు అమెరికా మాజీ అధ్యక్షుడు డొనాల్డ్ ట్రంప్‌ను ట్రోల్ చేస్తూ “నోబెల్ పీస్ హల్వా?” అంటూ సరదాగా స్పందించారు. ఈ మెనూ రాజకీయ వ్యంగ్యం, సైనిక గౌరవం, దేశభక్తి అన్నీ కలిపిన వినూత్న రూపం అని చెప్పవచ్చు.
“ఆపరేషన్ సిందూర్” నేపథ్యంలో ఈ ట్రోల్‌కి ప్రత్యేక ప్రాధాన్యం ఉంది. ఏప్రిల్ 22న పహల్గామ్‌లో జరిగిన ఉగ్రదాడికి ప్రతీకారంగా భారత్ మే 6, 7 తేదీల్లో పాక్ ఆక్రమిత కాశ్మీర్ (PoK)లోని తొమ్మిది ఉగ్రశిబిరాలపై వైమానిక దాడులు జరిపింది. ఆ తర్వాత పాక్ భారత్‌పై దాడి చేయడానికి ప్రయత్నించగా, భారత వైమానిక రక్షణ దళం వాటిని తిప్పికొట్టింది. మే 9, 10 తేదీల్లో భారత్ పాకిస్తాన్‌లోని నూర్ ఖాన్, సర్గోధా, జకోబాబాద్ వంటి 11 ఎయిర్ బేస్‌లను లక్ష్యంగా చేసుకుని దాడులు చేసింది. ఈ ఆపరేషన్ ముగిసిన తర్వాత మే 10న కాల్పుల విరమణ ఒప్పందం కుదిరింది.
ఈ నేపధ్యంలో IAF వార్షికోత్సవ మెనూ కేవలం భోజన జాబితా కాదు — అది దేశ గౌరవానికి, వైమానిక శౌర్యానికి ప్రతీక. భారత వైమానిక దళం సృజనాత్మకంగా దేశ ప్రజలలో దేశభక్తి స్పూర్తిని మళ్లీ రగిలించింది. ఈ మెనూ ఇప్పుడు దేశవ్యాప్తంగా చర్చనీయాంశమవుతోంది.
