first hydrogen train: పర్యాటకులకు గుడ్ న్యూస్.. 8 చారిత్రక రూట్ల రూపురేఖలు మార్చనున్న రైల్వే! రేపే భారత రైల్వే హిస్టరీలో..
first hydrogen train: భారతీయ రైల్వే రంగంలో సరికొత్త పర్యావరణ హిత విప్లవానికి కౌంట్డౌన్ షురూ అయింది. దేశంలోనే మొట్టమొదటి హైడ్రోజన్ ఇంధన ఆధారిత రైలు పట్టాలెక్కేందుకు సర్వం సిద్ధమైంది. హర్యానాలోని జింద్ రైల్వే స్టేషన్ వేదికగా ప్రధాని మోదీ రేపు (జూలై 17) ఈ ప్రతిష్ఠాత్మక రైలుకు పచ్చజెండా ఊపి, జాతికి అంకితం చేయనున్నారు.
- గరిష్ఠంగా గంటకు 75 కిలోమీటర్ల వేగంతో ప్రయాణించనున్న రైలు..
- రేపు హైడ్రోజన్ రైలును ప్రారంభించనున్న ప్రధాని మోదీ..
first hydrogen train: భారతీయ రైల్వే (Indian Railways) చరిత్రలో సరికొత్త పర్యావరణ హిత విప్లవానికి కౌంట్డౌన్ షురూ అయింది. దేశ రవాణా రంగాన్ని కార్బన్ రహితంగా మార్చే లక్ష్యంలో భాగంగా.. భారత్లోనే మొట్టమొదటి హైడ్రోజన్ ఇంధన ఆధారిత రైలు (India's First Hydrogen Train) పట్టాలెక్కేందుకు సర్వం సిద్ధమైంది. హర్యానాలోని జింద్ (Jind) రైల్వే స్టేషన్ వేదికగా ప్రధానమంత్రి నరేంద్ర మోదీ రేపు (జూలై 17) ఈ ప్రతిష్ఠాత్మక రైలుకు పచ్చజెండా ఊపి, జాతికి అంకితం చేయనున్నారు. ఈ సరికొత్త అత్యాధునిక గ్రీన్ టెక్నాలజీతో జర్మనీ, జపాన్, చైనా వంటి ప్రపంచ అగ్రదేశాల సరసన భారత్ చేరబోతోంది.
జింద్ టు సోనిపట్: తొలి హైడ్రోజన్ రైలు రూట్, టైమింగ్స్ ఇవే...
భారతదేశపు మొట్టమొదటి హైడ్రోజన్ ప్యాసింజర్ రైలు హర్యానాలోని జింద్ నుంచి సోనిపట్ మధ్య ఉన్న 89 కిలోమీటర్ల దూరం పరుగులు పెట్టనుంది. ఈ రెండు కీలక స్టేషన్ల మధ్య రోజుకు రెండు రౌండ్ ట్రిప్పులు తిరుగుతూ ఈ రైలు ప్రయాణికులను చేరవేస్తుంది.
రైలు నెంబర్: 74010
సమయం: జింద్ స్టేషన్ నుండి ఉదయం 7:40 గంటలకు బయలుదేరి, ఉదయం 9:40 గంటలకు సోనిపట్ చేరుకుంటుంది.
స్టాపేజీలు: ఈ 89 కిలోమీటర్ల ప్రయాణంలో జింద్ సిటీ, పాండు పిండర, లలిత్ ఖేరా, భంబేవా, గోహనాతో సహా మొత్తం 12 స్టేషన్లలో ఈ రైలు ఆగుతుంది.
ఈ ప్రతిష్టాత్మక రైలును పూర్తిగా 10 కోచ్ల కాన్ఫిగరేషన్తో (2 డ్రైవింగ్ పవర్ కార్స్, 8 ప్యాసింజర్ కోచ్లు) చెన్నైలోని ఇంటిగ్రేటెడ్ కోచ్ ఫ్యాక్టరీ (ICF) లో స్వదేశీ సాంకేతికతతో డిజైన్ చేశారు. గరిష్ఠంగా గంటకు 75 కిలోమీటర్ల ఆపరేషనల్ వేగంతో ప్రయాణించే ఈ గ్రీన్ రైలులో ఒకేసారి 2,600 మంది ప్రయాణికులు కూర్చుని, నిలబడి ప్రయాణించవచ్చు.
అసలు హైడ్రోజన్ రైలు ఎలా పనిచేస్తుంది?
ఈ రైలు నడవడానికి సంప్రదాయ డీజిల్ కానీ లేదా ఓవర్హెడ్ ఎలక్ట్రిక్ వైర్లు (ఓహెచ్ఈ) కానీ అవసరం లేదు. రైలు పైభాగంలో అమర్చిన ఫ్యూయల్ సెల్స్ (ఇంధన కణాలు) సహాయంతో ఆన్బోర్డ్లోనే సొంతంగా విద్యుత్ తయారవుతుంది. నిల్వ ఉంచిన హైడ్రోజన్ గ్యాస్, వాతావరణంలోని ఆక్సిజన్తో కెమికల్ రియాక్షన్ (రసాయన ప్రక్రియ) జరిపి కరెంట్ను ఉత్పత్తి చేస్తుంది. ఈ కరెంట్ నేరుగా రైలు మోటార్లను నడుపుతుంది.
100% పర్యావరణ హితం: ఈ రసాయన ప్రక్రియలో ఎలాంటి హానికర కార్బన్ ఉద్గారాలు విడుదల కావు. సంప్రదాయ ఇంధనాలలా పొగకు బదులుగా కేవలం నీటి ఆవిరి (Water Vapor), వేడి మాత్రమే బై-ప్రోడక్ట్స్గా బయటకు వస్తాయి. అందువల్ల ఇది పర్యావరణానికి 100 శాతం మేలు చేస్తుంది.
ఈ రైలుకు నిరంతరాయంగా ఇంధనాన్ని అందించడం కోసం హర్యానాలోని జింద్లో ప్రత్యేకంగా 3,000 కేజీల కెపాసిటీ గల గ్రీన్ హైడ్రోజన్ జనరేషన్ మరియు రీఫ్యూయలింగ్ స్టేషన్ను కూడా రైల్వే శాఖ విజయవంతంగా ఏర్పాటు చేసింది. భారత రైల్వేను 2030 నాటికి 'నెట్ జీరో కార్బన్ ఎమిటర్'గా మార్చాలనే ప్రభుత్వ సంకల్పానికి ఈ హైడ్రోజన్ రైలు ప్రయోగం ఒక మైలురాయిగా నిలవనుంది.
రాబోయే రూట్లు (Upcoming Routes):
తొలి దశలో భాగంగా దేశవ్యాప్తంగా ఉన్న 8 చారిత్రక హెరిటేజ్ రూట్లలో ఈ హైడ్రోజన్ రైళ్లను ప్రవేశపెట్టేందుకు రైల్వే శాఖ ప్రణాళికలు సిద్ధం చేసింది. ఆ రూట్లు ఇవే:
కల్కా - షిమ్లా రైల్వే (హిమాచల్ ప్రదేశ్) - 96 కిలోమీటర్లు
డార్జిలింగ్ హిమాలయన్ రైల్వే (పశ్చిమ బెంగాల్) - 88 కిలోమీటర్లు
నీలగిరి మౌంటైన్ రైల్వే (తమిళనాడు) - 46 కిలోమీటర్లు
మాథెరాన్ హిల్ రైల్వే (మహారాష్ట్ర) - 20 కిలోమీటర్లు
కాంగ్రా వ్యాలీ రైల్వే (హిమాచల్ ప్రదేశ్) - 164 కిలోమీటర్లు
మార్వార్ - దేవ్ ఘర్ మదారియా రైల్వే (రాజస్థాన్) - 52 కిలోమీటర్లు
మహూ - పాతాళపానీ రైల్వే (మధ్యప్రదేశ్) - 30 కిలోమీటర్లు
బిలిమోరా - వాఘై రైల్వే (గుజరాత్) - 63 కిలోమీటర్లు
ఈ హెరిటేజ్ రూట్లలో నడిచే ప్రతి హైడ్రోజన్ రైలులోనూ అత్యాధునిక సౌకర్యాలతో పాటు, పర్యాటకులు ప్రకృతి అందాలను చూసి ఆస్వాదించడానికి వీలుగా పెద్ద గ్లాస్ విండోస్ (విస్టాడోమ్ తరహా కోచ్లు) ఉండేలా రైల్వే శాఖ ప్రత్యేకంగా డిజైన్ చేస్తోంది.
Be the first to react
