Qatar Airways: వృద్ధ ప్రయాణికుడిపై కేబిన్ క్రూ ఆప్యాయత.. ఖతార్ ఎయిర్‌వేస్ సిబ్బందిపై ప్రశంసల వర్షం!

ఖతార్ ఎయిర్‌వేస్ కేబిన్ క్రూ మానవత్వం వైరల్.. వృద్ధుడికి ప్రత్యేక శ్రద్ధ..

వృద్ధ ప్రయాణికుడి కోసం కేబిన్ క్రూ చేసిన పని వైరల్.. నెటిజన్ల ప్రశంసలు..

దోహా: విమాన ప్రయాణంలో ఓ వృద్ధ ప్రయాణికుడిపై కేబిన్ క్రూ చూపిన ఆప్యాయత, మానవత్వం సోషల్ మీడియాలో ప్రశంసలు అందుకుంటోంది. సాధారణ విధుల్లో భాగంగానే కాకుండా.. నడవడానికి ఇబ్బంది పడుతున్న వృద్ధుడికి ఓపికగా, ప్రేమగా సాయం చేసిన విమాన సిబ్బంది తీరును తోటి ప్రయాణికుడు సోషల్ మీడియాలో పంచుకోవడంతో ఈ ఘటన వైరల్‌గా మారింది. షార్జా నుంచి దోహాకు ఖతార్ ఎయిర్ వేస్ విమానంలో ప్రయాణించిన మహ్మద్ అఫ్రీదీన్ ఈ ఘటనను ఇన్‌స్టాగ్రామ్‌లో వీడియోగా పంచుకున్నారు.

వృద్ధుడి కోసం ప్రత్యేక శ్రద్ధ
విమానంలో నడవడానికి ఇబ్బంది పడుతున్న ఓ వృద్ధ ప్రయాణికుడిని కేబిన్ క్రూ సభ్యురాలు ప్రత్యేకంగా చూసుకున్నారు. ఎంతో ఓపికగా అతనితో మాట్లాడటంతో పాటు చిరునవ్వుతో అతడికి ధైర్యం కల్పించారు.

వృద్ధుడు ప్రయాణమంతా సౌకర్యంగా, గౌరవంగా ఉండేలా ఆమె చూపిన శ్రద్ధ తనను ఆకట్టుకుందని అఫ్రీదీన్ తెలిపారు. కేవలం విధిని నిర్వర్తించడం మాత్రమే గొప్ప సేవ కాదని.. మానవత్వం, దయ, ఆప్యాయత చూపడమే నిజమైన సేవకు అర్థమని ఆయన పేర్కొన్నారు.

ఖతార్ ఎయిర్‌వేస్‌లో ఇలాంటి అద్భుతమైన సిబ్బంది ఉండటం అభినందనీయమని ఆయన ప్రశంసించారు. చిన్న చిన్న దయా చర్యలు కూడా ఇతరులపై ఎంతో పెద్ద ప్రభావాన్ని చూపుతాయని అన్నారు.

‘వీడియో తీస్తున్నారని నాకు తెలియదు’
ఈ వీడియో సోషల్ మీడియాలో వైరల్ కావడంతో అది సదరు కేబిన్ క్రూ సభ్యురాలి దృష్టికి కూడా వెళ్లింది. తన పేరు ఎయా చైడర్ (Eya Chhaider) అని వెల్లడించిన ఆమె.. ఆ సమయంలో ఎవరో వీడియో తీస్తున్నారనే విషయం తనకు తెలియదని తెలిపారు.

వీడియోను చూసినప్పుడు తనకు ఎంతో ఆనందంగా, భావోద్వేగంగా అనిపించిందని ఆమె చెప్పారు. తాను చూసుకున్న వృద్ధ ప్రయాణికుడితో జరిగిన ఆ చిన్న క్షణాన్ని ఎవరో రికార్డు చేసి పంచుకోవడం ఇప్పుడు మరింత ప్రత్యేకంగా అనిపిస్తోందని పేర్కొన్నారు.

‘ఇలాంటి మానవ సంబంధాలే ఉద్యోగాన్ని ప్రత్యేకం చేస్తాయి’
ఖతార్ ఎయిర్‌వేస్‌లో ప్రతి విషయంలోనూ అత్యుత్తమ సేవ అందించేందుకు ప్రయత్నిస్తామని ఎయా చైడర్ తెలిపారు. అయితే ప్రయాణికులతో ఏర్పడే చిన్న చిన్న మానవ సంబంధాలే తన ఉద్యోగాన్ని మరింత ప్రత్యేకంగా మారుస్తాయని చెప్పారు.

ప్రయాణికులు స్వాగతం పొందినట్లు, సౌకర్యంగా, నిజంగా తమను పట్టించుకుంటున్నారనే భావన కలిగించడం కేవలం ఉద్యోగ బాధ్యత కాదని.. తాను ఎంతో ఇష్టంగా చేసే పని అని ఆమె పేర్కొన్నారు.

తనను వీడియో తీసి ఈ క్షణాన్ని సోషల్ మీడియాలో పంచుకున్నందుకు అఫ్రీదీన్‌కు కృతజ్ఞతలు తెలిపారు. ఈ వీడియో తనకు ఎంతో ఆప్యాయమైన అనుభూతిని మళ్లీ గుర్తు చేసిందని, ఈ జ్ఞాపకాన్ని ఎప్పటికీ గుర్తుంచుకుంటానని చెప్పారు.

‘ఇదే నిజమైన ఆతిథ్యం’ అంటూ నెటిజన్ల ప్రశంసలు
ఈ వీడియోకు సోషల్ మీడియాలో భారీగా స్పందన వచ్చింది. కేబిన్ క్రూ సభ్యురాలు చూపిన మానవత్వాన్ని పలువురు నెటిజన్లు ప్రశంసించారు. ‘ఇదే నిజమైన ఆతిథ్యం’, ‘చిన్న చిన్న చర్యలు జీవితాంతం గుర్తుండిపోయే ప్రభావాన్ని చూపుతాయి’, ‘ఇలాంటి దయకు తప్పకుండా ప్రశంసలు దక్కాలి’ అంటూ పలువురు కామెంట్లు చేశారు. మరో నెటిజన్.. విధి పరిధిని దాటి నిజమైన శ్రద్ధతో వ్యవహరించడమే గొప్ప సేవకు నిదర్శనమని ప్రశంసించారు.

విమాన ప్రయాణం సాధారణంగా గమ్యస్థానానికి చేరుకోవడానికే పరిమితమైనా.. తోటి ప్రయాణికుడి పట్ల చూపిన చిన్నపాటి శ్రద్ధ, ఓపిక, మానవత్వం ఆ ప్రయాణాన్ని ప్రత్యేక జ్ఞాపకంగా మార్చింది. అందుకే ఈ ఘటన సోషల్ మీడియాలో పలువురి మనసులను తాకుతోంది. ఈ వైరల్ క్లిప్ ను చూసేందుకు ఇక్కడ క్లిక్ చేయండి.