పిల్లల్లో కాల్షియం (child calcium) లోపం రాకుండా చూసుకోవడం ప్రతి తల్లిదండ్రుల ప్రధాన బాధ్యత. చిన్న వయసులోనే సరైన పోషకాహారం అందకపోతే ఎముకల బలం తగ్గడం, దంత సమస్యలు, ఎదుగుదల మందగించడం వంటి సమస్యలు ఎదురయ్యే అవకాశం ఉంటుంది. ముఖ్యంగా కాల్షియం అనేది పిల్లల శరీరానికి అత్యంత అవసరమైన ఖనిజం. ఇది ఎముకలు, పళ్లు బలంగా ఉండటానికి మాత్రమే కాకుండా, కండరాల పనితీరు, నరాల సంకేతాల ప్రసారం, హార్మోన్ సమతుల్యతలో కూడా కీలక పాత్ర పోషిస్తుంది. అందుకే పిల్లల రోజువారీ ఆహారంలో కాల్షియం అధికంగా ఉండే పదార్థాలను తప్పనిసరిగా చేర్చాలి.
పిల్లలకు కాల్షియం అందించే ప్రధాన ఆహారాలు ( foods ) పాలు, (milk) పెరుగు, పన్నీర్, చీజ్ వంటి పాల ఉత్పత్తులు. రోజుకు కనీసం ఒక గ్లాస్ పాలు తాగడం అలవాటు చేయాలి. పాలు ఇష్టపడని పిల్లలకు పెరుగు, మజ్జిగ, పన్నీర్ కర్రీలు, మిల్క్ షేక్లు వంటి రూపాల్లో ఇవ్వవచ్చు. ఇవి జీర్ణానికి కూడా మంచివి. అలాగే ఆకుకూరలు కూడా కాల్షియం (Calcium) సమృద్ధిగా కలిగి ఉంటాయి. పాలకూర, తోటకూర, గోంగూర, మునగాకు వంటి ఆకుకూరలను వారానికి కనీసం రెండు నుంచి మూడు సార్లు వండించి పిల్లలకు పెట్టాలి. ఇవి కాల్షియంతో పాటు ఐరన్, విటమిన్లు కూడా అందిస్తాయి.
నల్ల నువ్వులు, బాదం, వేరుశెనగలు వంటి డ్రై ఫ్రూట్స్ కూడా కాల్షియం మంచి వనరులు. నల్ల నువ్వులతో చట్నీ, లడ్డూలు లేదా పొడి చేసి అన్నంలో కలిపి ఇవ్వవచ్చు. బాదం నానబెట్టి తినిపిస్తే పిల్లలకు శక్తి కూడా పెరుగుతుంది. అలాగే రాగి జావ, రాగి రొట్టెలు, రాగి లడ్డూలు వంటి సంప్రదాయ ఆహారాలు పిల్లల ఎముకల ఆరోగ్యానికి చాలా ఉపయోగపడతాయి. గుడ్లు, చేపలు కూడా కాల్షియం, ప్రోటీన్ సమృద్ధిగా కలిగి ఉండటంతో పిల్లల ఎదుగుదలకు తోడ్పడతాయి.
కాల్షియం శరీరానికి పూర్తిగా ఉపయోగపడాలంటే విటమిన్-D తప్పనిసరి. విటమిన్-D లోపం ఉంటే ఎంత కాల్షియం తీసుకున్నా అది ఎముకలకు చేరదు. అందుకే పిల్లలను ప్రతిరోజూ ఉదయం కొద్దిసేపు ఎండలో ఆడుకోనివ్వాలి. సహజంగా సూర్యకాంతి ద్వారా విటమిన్-D లభిస్తుంది. అలాగే వైద్యుల సూచనలతో అవసరమైతే విటమిన్-D సప్లిమెంట్లు కూడా ఇవ్వవచ్చు. మొత్తానికి, సమతుల్య ఆహారం, సరైన జీవనశైలి అలవాట్లు పాటిస్తే పిల్లల్లో కాల్షియం లోపం రాకుండా, వారు ఆరోగ్యంగా, బలంగా ఎదగడానికి మంచి పునాది వేయవచ్చు.
