బరువు తగ్గాలనే కోరిక ఈ రోజుల్లో చాలా మందిలో ఉంటుంది. ఉదయం లేచిన దగ్గర నుంచి రాత్రి పడుకునే వరకూ ఏది తింటే లావు అవుతామో, ఏది తింటే సన్నగా మారుతామో అన్న ఆలోచనలే ప్రస్తుత కాలంలో అధికంగా ఉంటుంది . జిమ్లు, డైట్లు, ఖరీదైన సప్లిమెంట్లు అంటూ ఎన్నో ప్రయత్నాలు చేసినా కొంతమందికి మాత్రం ఆశించిన ఫలితం రావడం లేదు. ఇలాంటి సమయంలో మన ఇంట్లోనే సులభంగా దొరికే కొబ్బరి బరువు తగ్గడంలో ఎంతగా సహాయపడుతుందో తెలుసుకుంటే ఆశ్చర్యమే వేస్తుంది.
సాధారణంగా కొబ్బరి అంటే చాలామందికి భయం. కొబ్బరి తింటే కొవ్వు పెరుగుతుందని, లావు అవుతామని అపోహలు ఉన్నాయి. కానీ పోషక నిపుణుల మాటల ప్రకారం ఇది పూర్తిగా నిజం కాదు. సరైన విధానంలో, సరైన పరిమాణంలో కొబ్బరిని తీసుకుంటే బరువు పెరగడం కాదు, తగ్గడం సాధ్యమే అంటున్నారు. కొబ్బరిలో ఉండే ఆరోగ్యకరమైన కొవ్వులు శరీరానికి హాని చేయవు. అవి శరీరంలోని జీవక్రియను వేగవంతం చేసి నిల్వ ఉన్న కొవ్వును కరిగించడంలో సహాయపడతాయి.
కొబ్బరిలో ముఖ్యంగా మీడియం చైన్ ఫ్యాటీ యాసిడ్స్ ఉంటాయి. ఇవి శరీరంలోకి వెళ్లిన వెంటనే కొవ్వుగా నిల్వ ఉండకుండా త్వరగా శక్తిగా మారిపోతాయి. దీనివల్ల శరీరం ఎక్కువ క్యాలరీలను ఖర్చు చేస్తుంది. ఉదయాన్నే పరగడుపున కొద్దిగా పచ్చి కొబ్బరి తినడం వల్ల ఎక్కువసేపు ఆకలి అనిపించదు. దీంతో అనవసరంగా పదే పదే తినే అలవాటు తగ్గి, మొత్తం క్యాలరీల వినియోగం తగ్గుతుంది. ఇది బరువు తగ్గాలనుకునే వారికి చాలా ఉపయోగకరంగా మారుతుంది.
ఇక కొబ్బరి నీళ్ల విషయానికి వస్తే, ఇది డైట్లో ఉన్నవారికి నిజంగా ఒక వరం లాంటిదే. కొబ్బరి నీళ్లలో క్యాలరీలు చాలా తక్కువగా ఉంటాయి. అదే సమయంలో శరీరానికి అవసరమైన లవణాలు, ఖనిజాలు అందుతాయి. వ్యాయామం చేసిన తర్వాత శరీరం అలసిపోయినప్పుడు చక్కెర కలిసిన డ్రింక్స్ తాగడం కంటే కొబ్బరి నీళ్లు తాగడం చాలా మంచిది. ఇది శరీరాన్ని చల్లబరచడమే కాకుండా, నీటి లోపాన్ని కూడా తీరుస్తుంది. పొట్ట నిండిన భావన కలగడంతో జంక్ ఫుడ్ వైపు మనసు పోకుండా అడ్డుకుంటుంది.
వంటల్లో ఉపయోగించే నూనె కూడా బరువు మీద ప్రభావం చూపుతుంది. రోజూ రిఫైన్డ్ నూనెలు వాడటం వల్ల శరీరంలో కొవ్వు పేరుకుపోతుంది. అలాంటి సమయంలో కొద్దిగా కొబ్బరి నూనెను వంటల్లో ఉపయోగించడం మంచిదని నిపుణులు చెబుతున్నారు. కొబ్బరి నూనె ఆకలిని నియంత్రించే హార్మోన్లపై ప్రభావం చూపి ఎక్కువగా తినాలనే కోరికను తగ్గిస్తుంది. ముఖ్యంగా పొట్ట చుట్టూ పేరుకుపోయే మొండి కొవ్వును తగ్గించడంలో ఇది సహాయపడుతుంది. అయితే ఎంత మంచిదైనా మితంగా తీసుకోవడం చాలా అవసరం.
పచ్చి కొబ్బరిలో ఉండే పీచు పదార్థం జీర్ణవ్యవస్థను ఆరోగ్యంగా ఉంచుతుంది. మలబద్ధకం, గ్యాస్ వంటి సమస్యలు తగ్గుతాయి. జీర్ణక్రియ బాగా జరిగితే బరువు తగ్గడం కూడా సులభమవుతుంది. కానీ కొబ్బరితో చేసిన తీపి పదార్థాలు, ఎక్కువ చక్కెర కలిపిన వంటకాలు మాత్రం బరువు తగ్గే లక్ష్యానికి అడ్డుగా మారుతాయి. అందుకే సహజ రూపంలో కొబ్బరిని తీసుకోవడం ముఖ్యం.
క్రమం తప్పకుండా వ్యాయామం చేయడం, సమతుల్యమైన ఆహారం తీసుకోవడం, తగిన నిద్ర ఉండడం వంటి అలవాట్లతో పాటు కొబ్బరిని చేర్చుకుంటే కొద్ది రోజుల్లోనే శరీరంలో మార్పులు కనిపించవచ్చని నిపుణులు సూచిస్తున్నారు. ప్రకృతి మనకు అందించిన ఈ సరళమైన ఆహార పదార్థాన్ని తెలివిగా ఉపయోగించుకుంటే ఆరోగ్యం, అందం రెండూ సొంతం చేసుకోవచ్చని చెప్పొచ్చు. ఈ సమాచారం కేవలం మాత్రమే మీ డాక్టర్ సలహా తీసుకొని పాటించడం మంచిది
