ఆరోగ్యంగా ఉండాలని చాలామంది ఉప్పును పూర్తిగా మానేస్తుంటారు. ముఖ్యంగా అధిక రక్తపోటు భయంతో ఉప్పు లేని ఆహారం తీసుకోవడం అలవాటు చేసుకుంటారు. అయితే, ఇది శరీరానికి మేలు కంటే నష్టమే ఎక్కువ చేస్తుంది. ఉప్పు కేవలం రుచికోసమే కాదు, శరీరానికి అవసరమైన ఖనిజాలు అందించే ముఖ్యమైన పదార్థం. ఇందులోని సోడియం, క్లోరైడ్‌లు శరీరంలోని ప్రతి కణానికి శక్తిని అందించడంలో, జీవక్రియ సక్రమంగా నడపడంలో కీలక పాత్ర పోషిస్తాయి.
ఉప్పు లేకుండా ఒక నెల జీవిస్తే మొదట గమనించే మార్పు శరీర శక్తి తగ్గడం. సోడియం లోపం వల్ల ‘హైపోనాట్రేమియా’ అనే పరిస్థితి వస్తుంది. ఇది కణాల్లో ద్రవాల సమతుల్యతను దెబ్బతీస్తుంది. దాంతో కండరాలు, మెదడు సరైన శక్తిని పొందలేవు. ఎంత విశ్రాంతి తీసుకున్నా అలసట, బలహీనత, నిద్రాహారం కలగడం వంటి సమస్యలు వస్తాయి.
తదుపరి సమస్య రక్తపోటు పతనం. ఉప్పు మానేయడం వల్ల రక్తనాళాల్లో నీరు నిలవకపోవడంతో రక్త పరిమాణం తగ్గి రక్తపోటు పడిపోతుంది. ఇది ‘హైపోటెన్షన్’ అనే ప్రమాదకర స్థితిని కలిగిస్తుంది. తలనొప్పి, తలతిరుగుడు, కళ్లు బైర్లు కమ్మడం, తీవ్రమైన సందర్భాల్లో స్పృహ కోల్పోవడం వంటి పరిస్థితులు తలెత్తవచ్చు.
అదే విధంగా కండరాల పనితీరుపై కూడా ఉప్పు ప్రభావం చూపిస్తుంది. చెమట ద్వారా కోల్పోయిన సోడియంను తిరిగి భర్తీ చేయకపోతే కండరాలు సరిగ్గా కుదురవు, విశ్రాంతి పొందవు. దాంతో కండరాల తిమ్మిర్లు, నొప్పులు, కాళ్ల ముక్కు పట్టడం వంటి ఇబ్బందులు ఎదురవుతాయి. అంతేకాదు, సోడియం లోపం నాడీ వ్యవస్థ పనితీరును కూడా దెబ్బతీస్తుంది. మెదడుకు సిగ్నల్స్ సరిగా చేరకపోవడం వల్ల ఏకాగ్రత లోపం, గందరగోళం, చిరాకు వంటి సమస్యలు ఉత్పన్నమవుతాయి.
ఇక జీర్ణక్రియలో కూడా ఉప్పు కీలకం. ఉప్పులోని క్లోరైడ్ పదార్థం కడుపులో హైడ్రోక్లోరిక్ ఆమ్లం తయారికి అవసరం. ఇది సరిగా ఉత్పత్తి కాకపోతే ఆహారం జీర్ణం కావడం కష్టమవుతుంది. అజీర్ణం, ఉబ్బరం, ఆకలి లేకపోవడం వంటి సమస్యలు వస్తాయి. అందుకే నిపుణులు ఉప్పును పూర్తిగా మానేయకుండా పరిమిత మోతాదులో తీసుకోవాలని సూచిస్తున్నారు. ప్రపంచ ఆరోగ్య సంస్థ ప్రకారం రోజుకు 5 గ్రాములకన్నా ఎక్కువ ఉప్పు తీసుకోవద్దు. ఉప్పు శత్రువు కాదు — కానీ దాని పరిమితి పాటించకపోతే అది శత్రువుగా మారుతుంది.
