సౌదీలో భారతీయుల దుర్భర పరిస్థితి! 33 వేల మందిపై కేసులు, 14 వేల మంది అరెస్టు, 10,431 దేశ బహిష్కరణ!
Saudi Arabia: సౌదీ అరేబియా వ్యాప్తంగా నివాస, కార్మిక మరియు సరిహద్దు భద్రతా నిబంధనలను ఉల్లంఘించిన వారిపై చేపట్టిన ప్రత్యేక ఆపరేషన్లలో వారం రోజుల్లో దాదాపు 14,000 మందిని అరెస్టు చేయగా, 10,431 మందిని ఇప్పటికే స్వదేశాలకు బహిష్కరించారు. చట్టవిరుద్ధంగా నివసిస్తున్న వారికి రవాణా, ఆశ్రయం లేదా ఉపాధి కల్పిస్తే 15 ఏళ్ల వరకు జైలు శిక్షతో పాటు 10 లక్షల రియాళ్ల వరకు భారీ జరిమానా, ఆస్తుల జప్తు వంటి కఠిన చర్యలు ఉంటాయని సౌదీ హోం శాఖ హెచ్చరించింది. మిగిలిన ఉల్లంఘనులకు రాయబార కార్యాలయాల ద్వారా ట్రావెల్ డాక్యుమెంట్లు సిద్ధం చేసి డిపోర్ట్ చేసే ప్రక్రియ కొనసాగుతోంది.
ఇఖామా, బోర్డర్ సెక్యూరిటీ, లేబర్ రూల్స్ అతిక్రమించిన వారిపై పంజా.. సౌదీ హోం శాఖ వెల్లడి!
సరిహద్దుల గుండా అక్రమ ప్రవేశ యత్నాలు భగ్నం.. పట్టుబడిన వారిలో అధిక శాతం ఇథియోపియన్లు, యెమెనీలు!
ఆశ్రయం, రవాణా, ఉద్యోగం ఇస్తే 15 ఏళ్ల జైలు.. రూ. 2.2 కోట్ల భారీ జరిమానా హెచ్చరిక!
Saudi Arabia: సౌదీ అరేబియాలో చట్టవిరుద్ధంగా నివసిస్తున్న విదేశీయులు, కార్మిక మరియు సరిహద్దు భద్రతా నిబంధనలను ఉల్లంఘించిన వారిపై అక్కడి ప్రభుత్వం ఉక్కుపాదం మోపుతోంది. సౌదీ అంతర్గత వ్యవహారాల మంత్రిత్వ శాఖ (Ministry of Interior) ఆధ్వర్యంలో భద్రతా బలగాలు నిర్వహించిన సంయుక్త తనిఖీల్లో కేవలం వారం రోజుల వ్యవధిలోనే దాదాపు 14,000 మంది నిబంధనల ఉల్లంఘనులను అదుపులోకి తీసుకున్నారు. దేశవ్యాప్తంగా వివిధ ప్రాంతాలు, నగరాలు మరియు పని ప్రదేశాల్లో ఈ ముమ్మర ఆపరేషన్లు కొనసాగాయి.
నివాస, సరిహద్దు, కార్మిక చట్టాల ఉల్లంఘనలు
తాజా నివేదిక ప్రకారం అరెస్టయిన వారిలో అత్యధికులు రెసిడెన్సీ చట్టాలను (ఇఖామా నిబంధనలు) ఉల్లంఘించిన వారే ఉన్నారు. వీటితో పాటు సరిహద్దు భద్రతా నియమాలు (Border Security Regulations) మరియు కార్మిక చట్టాల (Labor Laws) పరిధిలోని పలు నిబంధనలను అతిక్రమించిన వేలాది మందిని అధికారులు గుర్తించారు. చెల్లుబాటు అయ్యే నివాస అనుమతులు లేకపోవడం, స్పాన్సర్ల పరిధిని దాటి బయట అక్రమంగా పనిచేస్తుండటం వంటి ఉల్లంఘనలపై కఠిన చర్యలు తీసుకున్నారు.
సరిహద్దుల్లో చొరబాటు యత్నాల భగ్నం
సౌదీ సరిహద్దుల గుండా అక్రమంగా దేశంలోకి ప్రవేశించేందుకు యత్నించిన వందలాది మందిని భద్రతా దళాలు అదుపులోకి తీసుకున్నాయి. ఇలా సరిహద్దులను దాటేందుకు ప్రయత్నించిన వారిలో ప్రధానంగా ఇథియోపియా, యెమెన్ దేశాల పౌరులు ఉన్నట్లు అధికారులు గుర్తించారు. అదే విధంగా సౌదీ సరిహద్దుల నుంచి ఇరుగుపొరుగు దేశాలకు అక్రమ మార్గాల్లో పారిపోయేందుకు యత్నించిన వారిని కూడా అడ్డుకుని అదుపులోకి తీసుకున్నారు.
స్వదేశాలకు తిప్పి పంపే ప్రక్రియ – 10,431 మంది బహిష్కరణ
అరెస్టు చేసిన వారిలో చట్టపరమైన ప్రక్రియ పూర్తయిన 10,431 మందిని కేవలం వారం రోజుల్లోనే స్వదేశాలకు బహిష్కరించారు (Deported). మిగిలిన వేలాది మందిని సంబంధిత విదేశీ రాయబార కార్యాలయాల (Embassies) ద్వారా ప్రయాణ పత్రాలు (Travel Documents / Outpasses) సిద్ధం చేసేందుకు ఆయా డిపోర్టేషన్ సెంటర్లలో ఉంచారు. విమాన టికెట్ల రిజర్వేషన్లు పూర్తయిన వెంటనే వారందరినీ దశలవారీగా వారి స్వదేశాలకు తరలించేందుకు ఏర్పాట్లు ముమ్మరంగా సాగుతున్నాయి.
సహకరించే వారికి 15 ఏళ్ల జైలు, రూ.2.2 కోట్ల భారీ జరిమానా
అక్రమంగా నివసిస్తున్న విదేశీయులకు ఆశ్రయం కల్పించినా, రవాణా సదుపాయాలు సమకూర్చినా, లేదా ఉద్యోగాలు ఇచ్చి సహకరించినా అత్యంత కఠినమైన శిక్షలు తప్పవని సౌదీ హోం మంత్రిత్వ శాఖ తీవ్ర హెచ్చరికలు జారీ చేసింది. ఉల్లంఘనులకు తోడ్పడే వ్యక్తులకు గరిష్టంగా 15 సంవత్సరాల వరకు జైలు శిక్ష, 10 లక్షల సౌదీ రియాళ్లు (సుమారు రూ.2.2 కోట్లు) వరకు భారీ జరిమానా విధిస్తారు. అదనంగా వారి నేరాలకు ఉపయోగించిన రవాణా వాహనాలు, అద్దెకు ఇచ్చిన నివాస ప్రాంగణాలను ప్రభుత్వం స్వాధీనం చేసుకుంటుంది.
జాతీయ భద్రత, ఆర్థిక క్రమశిక్షణే ధ్యేయం
విదేశీయులు సౌదీ చట్టాలను గౌరవించాలని, లైసెన్స్ పొందిన సరైన పద్ధతుల్లోనే ఉపాధి పొందాలని అధికారులు స్పష్టం చేస్తున్నారు. అనుమానాస్పద లేదా అక్రమ కార్యకలాపాలు కనిపిస్తే టోల్ ఫ్రీ నంబర్ల ద్వారా అధికారులకు సమాచారం అందించాలని ప్రజలకు సూచించారు. జాతీయ భద్రతను కాపాడటంతో పాటు అనధికార శ్రామిక మార్కెట్‌ను నియంత్రించి, పారదర్శకమైన ఆర్థిక వాతావరణాన్ని నెలకొల్పేందుకే ఈ నిరంతర ఆపరేషన్లు నిర్వహిస్తున్నట్లు సౌదీ యంత్రాంగం తేల్చి చెప్పింది.
సౌదీ అరేబియాలో అధికారులు చేపడుతున్న మెగా క్రాక్‌డౌన్‌తో అక్కడ చిన్న చిన్న కిరాణా కొట్లు, వర్క్‌షాపులు, హోటళ్లలో చిరుద్యోగాలు చేసుకుంటున్న వేలాది మంది ప్రవాస భారతీయులు తీవ్ర భయాందోళనల్లో గడుపుతున్నారు. ఇఖామా గడువు ముగిసి సరైన పత్రాలు లేక అక్రమంగా తలదాచుకుంటున్న వారు, స్పాన్సర్లతో చిన్నపాటి వివాదాలు లేదా తప్పుడు ఫిర్యాదులు (హురూబ్) నమోదైన పేద కార్మికులు ఏ క్షణాన పోలీసులు వచ్చి అరెస్టు చేస్తారోనని బిక్కుబిక్కుమంటూ జీవిస్తున్నారు. ఆశ్రయం లేదా పని కల్పించే వారికి 15 ఏళ్ల జైలు, భారీ జరిమానాలు విధిస్తామన్న హెచ్చరికలతో స్థానిక దుకాణదారులు సైతం వీరిని పనుల నుంచి తొలగిస్తుండటంతో, స్వదేశానికి రాలేక అక్కడ తలదాచుకోలేక తీవ్రమైన మానసిక వేదనను అనుభవిస్తున్నారు.
