Donald Trump: మా సైన్యానికి ఎవరూ సాటిరారు.. ట్రంప్ సంచలన ప్రకటన.. టెహ్రాన్కు 10 రోజుల డెడ్ లైన్!
Donald Trump: ఇరాన్తో యుద్ధంలో అమెరికా "పూర్తిగా గెలిచింది" అని, ఆ దేశ సైనిక సామర్థ్యాన్ని దాదాపు నాశనం చేశామని అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. అయితే, తదుపరి చర్యలకు ముందు చర్చల కోసం టెహ్రాన్కు 10 రోజుల గడువు ఇచ్చినట్లు ఆయన వెల్లడించారు.
- Gulf: ఫోన్ ఇంటర్వ్యూలో యుద్ధ విశేషాలు: ఇరాన్ కమ్యూనికేషన్ నెట్వర్క్లను కూల్చేశామన్న అమెరికా..
- పశ్చిమాసియాలో ముగిసిన యుద్ధం?: ఇరాన్ నాయకత్వాన్ని దెబ్బతీశామన్న డొనాల్డ్ ట్రంప్..
Donald Trump: పశ్చిమాసియాలో కొనసాగుతున్న భీకర యుద్ధంపై అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. ఇరాన్తో జరుగుతున్న పోరాటంలో అమెరికా దళాలు ఇప్పటికే "పూర్తి విజయం" సాధించాయని, ఆ దేశ సైనిక సామర్థ్యాన్ని దాదాపుగా తుడిచిపెట్టేశామని ఆయన ప్రకటించారు. ఫాక్స్ న్యూస్ ఛానెల్కు ఇచ్చిన ఫోన్ ఇంటర్వ్యూలో ట్రంప్ మాట్లాడుతూ, అమెరికా జరిపిన మెరుపు దాడుల వల్ల ఇరాన్ యుద్ధం చేసే సత్తాను పూర్తిగా కోల్పోయిందని విశ్లేషించారు. ఇరాన్ నౌకాదళం, వాయుసేనతో పాటు ఆ దేశపు కీలక క్షిపణి ప్రయోగ కేంద్రాలు, కమ్యూనికేషన్ నెట్వర్క్లు ధ్వంసమయ్యాయని ఆయన వివరించారు. ఈ సైనిక చర్యల ద్వారా ఇరాన్ నాయకత్వాన్ని కూడా బలహీనపరిచామని, సైనికపరంగా ఆ దేశాన్ని కోలుకోలేని దెబ్బ తీశామని ట్రంప్ స్పష్టం చేశారు.
అయితే, ప్రస్తుత పరిస్థితుల్లో తదుపరి దాడులకు వెళ్లకుండా టెహ్రాన్ ప్రభుత్వానికి 10 రోజుల గడువు ఇచ్చినట్లు ట్రంప్ వెల్లడించారు. చర్చల కోసం కొంత సమయం కావాలని ఇరాన్ కోరడంతోనే ఈ నిర్ణయం తీసుకున్నట్లు ఆయన తెలిపారు. ప్రస్తుతం రెండు దేశాల మధ్య చర్చలు సజావుగా సాగుతున్నాయని చెబుతూనే, ఒకవేళ ఈ చర్చలు ఫలించకపోతే తీవ్ర పరిణామాలు ఉంటాయని గట్టి హెచ్చరిక జారీ చేశారు. నిర్దేశించిన గడువులోగా ఇరాన్ తన పద్ధతి మార్చుకోకపోతే, ఆ దేశంలోని విద్యుత్ కేంద్రాలను (Power Plants) పూర్తిగా నాశనం చేస్తానని ట్రంప్ హెచ్చరించారు. అమెరికా సైనిక శక్తికి ఎవరూ సాటిరారని, శాంతి స్థాపన కోసం అవసరమైతే మరిన్ని కఠిన నిర్ణయాలు తీసుకోవడానికి వెనుకాడబోమని ఆయన పునరుద్ఘాటించారు.
ఇరాన్ వంటి దేశాల చేతిలో అణ్వాయుధాలు ఉండటం ప్రపంచానికే ముప్పు అని ట్రంప్ ఈ సందర్భంగా అభిప్రాయపడ్డారు. ఒక ఉన్మాది లేదా ప్రమాదకర సిద్ధాంతాలు కలిగిన వారి చేతికి అణ్వాయుధాలు చిక్కకుండా చూడటమే తమ ప్రధాన లక్ష్యమని ఆయన వివరించారు. ఒకవేళ అమెరికా సకాలంలో స్పందించి దాడులు చేయకపోయి ఉంటే, ఈపాటికి ఇరాన్ అణ్వాయుధాన్ని తయారు చేసి ఉపయోగించేదని ఆయన వ్యాఖ్యానించారు. తన ప్రభుత్వం తీసుకున్న సైనిక చర్యలపై వస్తున్న విమర్శలను తోసిపుచ్చిన ట్రంప్, ప్రపంచంలోనే అత్యంత శక్తివంతమైన సైన్యం తమ వద్ద ఉందని గర్వంగా ప్రకటించారు. ఈ 10 రోజుల గడువు ముగిసిన తర్వాత ఇరాన్ ఇచ్చే సమాధానంపైనే పశ్చిమాసియా భవిష్యత్తు ఆధారపడి ఉంటుందని అంతర్జాతీయ విశ్లేషకులు భావిస్తున్నారు.
Be the first to react
