Motorola Edge 60: మోటరోలా షాక్...‌ ఇండియాలో పెరిగిన ఎడ్జ్ 60 ఫ్యూజన్ G-సిరీస్ ఫోన్ల ధరలు!

Motorola Edge 60: మీరు కొత్తగా మోటరోలా ఫోన్ కొనాలని ప్లాన్ చేస్తున్నారా? అయితే మీకు ఒక చేదు వార్త. ప్రముఖ మొబైల్  కంపెనీ మోటరోలా తన పాపులర్ ఫోన్ల ధరలను పెంచుతూ నిర్ణయం తీసుకుంది. ముఖ్యంగా మధ్యతరగతి ప్రజలు ఎక్కువగా ఇష్టపడే 'ఎడ్జ్ 60 ఫ్యూజన్'తో పాటు బడ్జెట్ ధరలో లభించే G సిరీస్ ఫోన్ల రేట్లు కూడా ఇప్పుడు భారీగా పెరిగాయి. మార్కెట్ నిపుణుల సమాచారం ప్రకారం, కొత్త ధరలు ఇప్పటికే కంపెనీ అధికారిక వెబ్‌సైట్‌లో అందుబాటులోకి వచ్చాయి.

మోటరోలా ఫోన్లలో బాగా అమ్ముడయ్యే Motorola Edge 60 Fusion ధర ఏకంగా 2,000 రూపాయలు పెరిగింది. గతేడాది ఏప్రిల్‌లో విడుదలైన ఈ ఫోన్, అప్పట్లో 8GB+128GB వేరియంట్ రూ. 20,999కి లభించేది, కానీ ఇప్పుడు అది రూ. 22,999కి చేరుకుంది. అలాగే 256GB మోడల్స్ కూడా ఇదే స్థాయిలో పెరిగాయి. ఒకేసారి రెండు వేల రూపాయలు పెరగడం వల్ల ఈ ఫోన్ కొనాలనుకునే వారు ఇప్పుడు కాస్త వెనకడుగు వేస్తున్నారు.

కేవలం ఖరీదైన ఫోన్లే కాదు, సామాన్యులు కొనే Moto G35, Moto G57 Power ఫోన్ల ధరలు కూడా మారాయి. మోటో G35 బేస్ వేరియంట్ ధర 500 రూపాయలు పెరిగి రూ. 12,499కి చేరగా, 8GB వేరియంట్ ధర వెయ్యి రూపాయలు పెరిగింది. అలాగే పెద్ద బ్యాటరీతో వచ్చే మోటో G57 పవర్ ధర ఇప్పుడు రూ. 14,999 నుండి రూ. 15,999కి పెరిగింది. దీనివల్ల బడ్జెట్ ఫోన్ల కోసం చూసే కస్టమర్ల జేబుకు చిల్లు పడక తప్పడం లేదు.

అయితే ఈ ధరల పెంపునకు ప్రధాన కారణం ఫోన్లలో వాడే పార్ట్స్  రేట్లు పెరగడమేనని తెలుస్తోంది. ముఖ్యంగా మెమరీ చిప్స్  డిస్‌ప్లే తయారీ ఖర్చులు పెరగడం వల్ల కంపెనీలు ఈ భారాన్ని వినియోగదారులపై వేస్తున్నాయి. కేవలం మోటరోలా మాత్రమే కాకుండా ఇటీవలే సామ్‌సంగ్, ఒప్పో, వివో వంటి కంపెనీలు కూడా తమ ఫోన్ల ధరలను కొద్దిగా పెంచిన సంగతి తెలిసిందే.

ఆన్‌లైన్ వెబ్‌సైట్లలో  ప్రస్తుతం కొన్ని ఆఫర్లు నడుస్తున్నప్పటికీ, పాత ధరలతో పోలిస్తే ఇప్పుడు ఫోన్లు కొనడం కొంత ఖర్చుతో కూడుకున్న పని. ధరలు పెరగడంపై మోటరోలా నుండి ఇంకా అధికారిక ప్రకటన రావాల్సి ఉంది. ఒకవేళ మీరు ఈ ఫోన్లను కొనాలనుకుంటే, బ్యాంక్ డిస్కౌంట్లు లేదా ఎక్స్ఛేంజ్ ఆఫర్లను ఉపయోగించుకోవడం ద్వారా కొంత డబ్బు ఆదా చేసుకోవచ్చని టెక్ నిపుణులు సూచిస్తున్నారు.

ముఖ్య గమనిక: పైన పేర్కొన్న ధరలు ప్రస్తుత మార్కెట్ పరిస్థితులు  టిప్‌స్టర్ల సమాచారం ఆధారంగా ఇవ్వబడ్డాయి. కొనే ముందు ఒకసారి అధికారిక సైట్‌లను తనిఖీ  చేసుకోవడం మంచిది.