Infinix Note 60 Pro: భారత్‌లోకి ఇన్ఫినిక్స్ కొత్త స్మార్ట్‌ఫోన్.. అదిరిపోయే డిజైన్, కలర్ ఆప్షన్స్ ఇవే!

Infinix Note 60 Pro:  ప్రముఖ స్మార్ట్‌ఫోన్ తయారీ సంస్థ ఇన్ఫినిక్స్, తన కొత్త మోడల్ 'నోట్ 60 ప్రో'ను భారత మార్కెట్లోకి విడుదల చేసేందుకు సర్వం సిద్ధం అవుతుంది. వచ్చే వారం ఈ ఫోన్ గ్రాండ్‌గా లాంచ్ కానుంది. ఈ క్రమంలో కంపెనీ తాజాగా ఈ ఫోన్‌కు సంబంధించిన లుక్, డిజైన్  ఏయే రంగుల్లో లభిస్తుందనే వివరాలను అధికారికంగా వెల్లడించింది. ముఖ్యంగా యువతను ఆకట్టుకునేలా ఈ ఫోన్‌ను సరికొత్త హంగులతో తీర్చిదిద్దినట్లు తెలుస్తోంది.

ఈ కొత్త ఫోన్ మొత్తం మూడు ఆకర్షణీయమైన రంగుల్లో అందుబాటులోకి రానుంది. అవేంటంటే.. డీప్ ఓషన్ బ్లూ, మోచా బ్రౌన్  సోలార్ ఆరెంజ్. గ్లోబల్ మార్కెట్‌తో పోలిస్తే ఇండియాలో తక్కువ రంగులు ఉన్నప్పటికీ, ఉన్నవి మాత్రం చాలా ప్రీమియంగా కనిపిస్తున్నాయి. ఫోన్ వెనుక భాగం ఫ్లాట్‌గా ఉండి, పట్టుకోవడానికి చాలా స్టైలిష్‌గా ఉంటుంది. ఇక కెమెరా విషయానికి వస్తే, వెనుక వైపు 50 మెగాపిక్సెల్ మెయిన్ కెమెరాను అమర్చారు. దీనికి ఆప్టికల్ ఇమేజ్ స్టెబిలైజేషన్ (OIS) సపోర్ట్ కూడా ఉంది, దీనివల్ల ఫోటోలు షేక్ అవ్వకుండా చాలా స్పష్టంగా వస్తాయి.

డిజైన్ పరంగా చూస్తే, ఈ ఫోన్‌లో ఆపిల్ ఐఫోన్‌లలో ఉండే 'కెమెరా కంట్రోల్' బటన్ వంటి ఒక ప్రత్యేక బటన్‌ను కూడా ఇచ్చినట్లు సమాచారం. ఇది ఫోన్ కుడి వైపున పవర్ బటన్ కింద ఉంటుంది. దీనివల్ల కెమెరాను ఆపరేట్ చేయడం యూజర్లకు చాలా సులభం అవుతుంది. అలాగే ఫోన్ వెనుక భాగంలో 'యాక్టివ్ మ్యాట్రిక్స్ డిస్‌ప్లే' అనే కొత్త ఫీచర్‌ను తీసుకొచ్చారు. ఇందులో ఉండే చిన్న చిన్న ఎల్‌ఈడీ లైట్లు నోటిఫికేషన్లు వచ్చినప్పుడు మెరుస్తూ యూజర్లను అలరిస్తాయి.

టెక్నికల్ అంశాల గురించి మాట్లాడితే, ఇందులో 6.78 అంగుళాల పెద్ద అమోలెడ్ (AMOLED) డిస్‌ప్లే ఉంటుంది. ఇది 144Hz రిఫ్రెష్ రేట్‌తో పనిచేస్తుంది, అంటే గేమింగ్ ఆడేటప్పుడు లేదా వీడియోలు చూసేటప్పుడు స్క్రీన్ చాలా స్మూత్‌గా ఉంటుంది. ఫోన్ వేగంగా పనిచేయడానికి ఇందులో శక్తివంతమైన స్నాప్‌డ్రాగన్ 7s జెన్ 4 చిప్‌సెట్‌ను వాడారు. బ్యాటరీ లైఫ్  ఛార్జింగ్ స్పీడ్ కూడా యూజర్ల అవసరాలకు తగ్గట్టుగా ఉంటాయని కంపెనీ ప్రతినిధులు చెబుతున్నారు.

ఈ ఇన్ఫినిక్స్ నోట్ 60 ప్రో వచ్చే సోమవారం అంటే ఏప్రిల్ 13న మధ్యాహ్నం 12 గంటలకు విడుదల కానుంది. లాంచ్ అయిన వెంటనే ప్రముఖ ఈ-కామర్స్ సైట్ ఫ్లిప్‌కార్ట్‌తో పాటు ఇన్ఫినిక్స్ అధికారిక వెబ్‌సైట్‌లోనూ కొనుగోలుకు అందుబాటులో ఉంటుంది. మధ్యతరగతి బడ్జెట్‌లో మంచి ఫీచర్లు కోరుకునే వారికి ఈ ఫోన్ ఒక మంచి ఆప్షన్ అయ్యే అవకాశం ఉంది. ధర ఎంత ఉండబోతుందనేది లాంచ్ రోజున క్లారిటీ రానుంది.