చలికాలం ప్రారంభమైతే చాలామంది ఆరోగ్యంపై జాగ్రత్తలు తీసుకునే పరిస్థితి వస్తుంది. ముఖ్యంగా జలుబు, దగ్గు, గొంతు ఇన్ఫెక్షన్లు ఎక్కువయ్యే సమయంలో వేడివేడి చికెన్ సూప్ తాగాలని మనసు ఆశపడుతుంది. రుచికరంగా ఉండటమే కాకుండా ఆరోగ్యానికి మేలు చేసే ఈ చికెన్ సూప్ ఇంట్లోనే తక్కువ పదార్థాలతో సులభంగా తయారుచేసుకోవచ్చు. బయట దొరికే రెస్టారెంట్ స్టైల్ ఫ్లేవర్కు ఏమాత్రం తగ్గకుండా, స్పైసీగా, హోమ్మేడ్గా, హెల్తీగా తయారు చేసే విధానాన్ని ఇప్పుడు చూద్దాం.
ముందుగా చికెన్ సూప్ తయారీకి కావాల్సిన పదార్థాల జాబితాలో చికెన్ 300 గ్రాములు, నూనె లేదా నెయ్యి 4 టేబుల్ స్పూన్లు, ఒక మధ్యస్థ ఉల్లిపాయ, సన్నగా తరిగిన క్యారెట్ ముక్కలు, కొత్తిమీర, అల్లం–వెల్లుల్లి పేస్ట్, రుచికి సరిపడా ఉప్పు, మిరియాల పొడి, సోయా సాస్, టమాటా సాస్, చిల్లీ సాస్, కొద్దిగా వెనిగర్, కార్న్ ఫ్లోర్ మరియు ఒక కోడి గుడ్డు అవసరం. కూరగాయలను ముందుగానే తరిగి సిద్ధంగా ఉంచితే వంట ప్రక్రియ మరింత ఈజీగా సాగుతుంది. చికెన్ను చిన్న ముక్కలుగా కట్ చేసుకుని కొద్దిగా వేయించి పెట్టుకుంటే సూప్కు ఫ్లేవర్ బాగా వస్తుంది.
తయారీ ప్రక్రియలో మొదట స్టవ్ మీద గిన్నె పెట్టి నూనె పోసి చికెన్ ముక్కలను వేసి బాగా వేయించాలి. చికెన్ అर्धం ఉడికే వరకు దానిని మోస్తరు మంటపై ఉంచాలి. తర్వాత ఆ చికెన్ను తీసి చిన్న చిన్న ముక్కలుగా కట్ చేసుకుని పక్కన పెట్టాలి. అదే గిన్నెలో మళ్లీ నెయ్యి లేదా నూనె వేసి చికెన్ ముక్కలను కొద్దిగా వేయించి, వెంటనే ఉల్లిపాయ, క్యారెట్, ఉప్పు వేసి కలుపుతూ రెండు మూడు నిమిషాలు వేగనివ్వాలి. అల్లం–వెల్లుల్లి పేస్ట్ వేసి సువాసన వచ్చే వరకు మగ్గించాలి. తర్వాత గిన్నెలో ఒక లీటర్ నీరు పోసి చికెన్ మొత్తం మరిగేలా ఉంచాలి. ఇది సూప్కు వెలుగు, రుచిని తీసుకొచ్చే ముఖ్య దశ.
నీళ్లు మరిగాక అందులో మిరియాల పొడి, సోయా సాస్, టమాటా సాస్, చిల్లీ సాస్, వెనిగర్ వేసి బాగా కలపాలి. ఇవే సూప్కు స్పైసీ మరియు టాంగీ ఫ్లేవర్ ఇస్తాయి. తర్వాత ఒక గుడ్డును నేరుగా సూప్లో కొట్టి రెండు నిమిషాలు ఉడికనివ్వాలి. చివరగా కార్న్ ఫ్లోర్ను నీటితో కలిపి సూప్లో జారుగా పోస్తూ కలుపుకుంటే సూప్ మందంగా, రెస్టారెంట్ స్టైల్లో తయారవుతుంది. మరో ఐదు నిమిషాలు మరిగించి, చివరిలో తాజా కొత్తిమీర చల్లితే నోరూరించే హాట్ చికెన్ సూప్ రెడీ. చలికాలంలో ఆరోగ్యంగా ఉండేలా చేసే ఈ సూప్, ఇంట్లో చిన్నా–పెద్ధలందరికీ నచ్చేలా ఉంటుంది.
