దిత్వా తుపాను తీవ్ర వాయుగుండంగా బలహీనపడినప్పటికీ, దాని అవశేష ప్రభావం ఆంధ్రప్రదేశ్ దక్షిణ కోస్తాంధ్ర జిల్లాలను అతలాకుతలం చేస్తూనే ఉంది. ముఖ్యంగా బాపట్ల జిల్లాలోని వాడరేవు, రామాపురం వంటి సముద్ర తీర ప్రాంతాల్లో అలలు ఉవ్వెత్తున ఎగసిపడుతూ భయాందోళనలు రేపుతున్నాయి. వాడరేవు బీచ్ వద్ద సముద్రం దాదాపు నాలుగు అడుగుల మేర ముందుకు చొచ్చుకొచ్చి పరిసర ప్రాంతాలకు చేరుకోవడంతో స్థానికులు ఆందోళనకు గురయ్యారు. అలల తీవ్రతను దృష్టిలో ఉంచుకుని అధికారులు వాడరేవు, రామాపురం, కటారివారిపాలెం, పొట్టి సుబ్బయ్యపాలెం బీచ్లను పూర్తిగా మూసివేశారు. తీరప్రాంతాలకు వెళ్లే మార్గాల్లో పోలీసుల ఆధ్వర్యంలో బారికేడ్లు ఏర్పాటు చేసి పర్యాటకులను, స్థానికులను ఆ ప్రాంతాలకు వెళ్లకుండా కఠినమైన చర్యలు చేపట్టారు.
నైరుతి బంగాళాఖాతంలో ఏర్పడి చెన్నై సమీపంలో కేంద్రీకృతమైన ‘దిత్వా’ తుపాను క్రమంగా బలహీనపడుతున్నప్పటికీ, దాని ప్రభావం దక్షిణ ఆంధ్రప్రదేశ్పై గణనీయంగానే ఉంది. ప్రస్తుతం ఈ తుపాను చెన్నైకి 50 కిలోమీటర్ల దూరంలో కేంద్రీకృతమై ఉందని ఐఎండీ అధికారులు తెలిపారు. రాబోయే 12 గంటల్లో ఇది సాధారణ వాయుగుండంగా మారే అవకాశం ఉన్నప్పటికీ, తుపాను మిగులు ప్రభావం కారణంగా నెల్లూరు, తిరుపతి, చిత్తూరు, ప్రకాశం, బాపట్ల జిల్లాలపై వచ్చే మూడు రోజులు భారీ వర్షాలు కురిసే అవకాశముందని వారు హెచ్చరించారు. బలమైన గాలులు, ఎత్తైన అలలు, తీర ప్రాంతాల్లో సముద్రం ముందుకు చేరే ప్రమాదం కొనసాగుతుందని అధికార యంత్రాంగాన్ని అప్రమత్తంగా ఉండాలని సూచించారు.
ఇక నెల్లూరు జిల్లాలో దిత్వా ప్రభావం సోమవారం రోజంతా వెల్లడైంది. ఉదయం నుండి రాత్రి వరకు ఎడతెరిపిలేని భారీ వర్షాలు కురవడంతో జనజీవనం పూర్తిగా స్తంభించింది. నగరంలోని అయ్యప్పగుడి వద్ద ప్రధాన రహదారి పూర్తిగా నీటమునగడంతో వాహనదారులు తీవ్ర ఇబ్బందులు ఎదుర్కొన్నారు. తల్పగిరి కాలనీ, ఆర్టీసీ కాలనీ, లోతట్టు బస్తీలు జలమయం కావడంతో అనేక కుటుంబాలు తాత్కాలికంగా సురక్షిత ప్రాంతాలకు తరలించబడ్డాయి. నగర అవసరమైన సేవలైన విద్యుత్ సరఫరా, రవాణా వ్యవస్థలు అంతరాయం కలగడంతో ప్రజలు ఇబ్బందులు పడుతున్నారు.
నెల్లూరు జిల్లాలోని కావలి మండలంలో అత్యధికంగా 13 సెంటీమీటర్ల వర్షపాతం నమోదు కాగా, సంగం, బుచ్చిరెడ్డిపాలెం, కోవూరు, ఆత్మకూరు, ఉడతలపల్లి వంటి పలు ప్రాంతాల్లో కుండపోత వర్షాలు కురిశాయి. సోమశిల, కండలేరు జలాశయాలు ఇప్పటికే నిండుకుండలా మారడంతో అధికారులు అప్రమత్తత చర్యలుగా వరద నీటిని పెన్నా నదిలోకి విడుదల చేస్తున్నారు. పెన్నా, స్వర్ణముఖి, కందలేరు నదుల పరివాహక ప్రాంతాల గ్రామాలకు ప్రత్యేక హెచ్చరికలు జారీ చేశారు. కలెక్టరేట్లో కంట్రోల్ రూమ్ ఏర్పాటు చేసి అధికారులు గంట గంటకు పరిస్థితిని సమీక్షిస్తూ రక్షణ చర్యలు చేపడుతున్నారు.
