TTD Update: తిరుమలలో బ్రహ్మోత్సవాల కలకల: పార్కింగ్, ట్రాఫిక్ నియంత్రణపై టీటీడీ బిగ్ మాస్టర్ ప్లాన్!

• Devotional: ఏర్పాట్లపై వివిధ శాఖల అధికారులతో సమీక్ష నిర్వహించిన టీటీడీ జేఈవో శరత్...
  
  
• అన్ని శాఖలు సమన్వయంతో పనిచేసి భక్తులకు మెరుగైన సేవలు అందించాలని సూచన..

TTD Update: కలియుగ దైవం తిరుమల శ్రీ వేంకటేశ్వర స్వామివారి సాలకట్ల, నవరాత్రి బ్రహ్మోత్సవాల ఆధ్యాత్మిక వేడుకలు సమీపిస్తుండటంతో తిరుమల తిరుపతి దేవస్థానం (TTD) మాస్టర్ ప్లాన్‌ సిద్ధం చేసింది. బ్రహ్మోత్సవాల సమయంతో పాటు పురట్టాసి మాసం శనివారాలలో తిరుమల, తిరుపతి క్షేత్రాలకు విపరీతంగా తరలివచ్చే భక్తుల రద్దీని దృష్టిలో ఉంచుకుని, వారికి ఎలాంటి అసౌకర్యం కలగకుండా కట్టుదిట్టమైన ఏర్పాట్లు చేయాలని టీటీడీ సంయుక్త కార్యనిర్వహణాధికారి (JEO) డాక్టర్ ఎ. శరత్ స్పష్టం చేశారు.

తిరుపతిలోని టీటీడీ పరిపాలనా భవనంలో ఇంజినీరింగ్, ఆరోగ్యం, విజిలెన్స్ మరియు ప్రజా సంబంధాల అధికారులతో జేఈవో శరత్ ఉన్నతస్థాయి సమీక్షా సమావేశం నిర్వహించారు. ఉత్సవాలను విజయవంతం చేసేందుకు అన్ని శాఖలు సమన్వయంతో విధులను నిర్వహించాలని దిశానిర్దేశం చేశారు.

ట్రాఫిక్ నియంత్రణ, భక్తుల సౌకర్యార్థం ప్రత్యేక హోల్డింగ్ పాయింట్లు..
బ్రహ్మోత్సవాల వేళ తిరుపతి నగరంతో పాటు తిరుమలకు ప్రైవేటు, ఆర్టీసీ వాహనాలు భారీగా వచ్చే అవకాశం ఉన్నందున పార్కింగ్ మేనేజ్‌మెంట్‌పై టీటీడీ ప్రధానంగా దృష్టి సారించింది.

భారీ పార్కింగ్ స్థలాలు: తిరుపతి నగర శివారు ప్రాంతాలతో పాటు కపిలతీర్థం, అలిపిరి బైపాస్ మార్గాల్లో ముందస్తుగా పార్కింగ్ స్థలాలను గుర్తించి సిద్ధం చేయాలని ఆదేశించారు.

హోల్డింగ్ పాయింట్లు & క్యూఆర్ కోడ్‌లు: వాహనాల రద్దీని క్రమబద్ధీకరించడానికి కీలక కూడళ్ల వద్ద హోల్డింగ్ పాయింట్లు ఏర్పాటు చేస్తున్నారు. భక్తులు సులభంగా దారులు, పార్కింగ్ స్థలాలను కనుగొనేలా క్యూఆర్ (QR) కోడ్‌లతో కూడిన డిజిటల్ సూచిక బోర్డులను ఏర్పాటు చేయనున్నారు.

మొబైల్ మరుగుదొడ్లు, తాగునీరు: పార్కింగ్ స్థలాలు మరియు హోల్డింగ్ సెంటర్ల వద్ద పరిశుభ్రతకు ప్రాధాన్యతనిస్తూ, నిరంతరం స్వచ్ఛమైన తాగునీరు అందుబాటులో ఉంచాలని, సరిపడా మొబైల్ టాయిలెట్లను ఏర్పాటు చేసి పర్యవేక్షించాలని ఆరోగ్య శాఖ అధికారులకు సూచించారు.

విద్యుత్ కాంతులు.. తిరుపతి నగరానికి ఆధ్యాత్మిక శోభ..
తిరుపతి నగరాన్ని ఆధ్యాత్మిక వాతావరణం ఉట్టిపడేలా తీర్చిదిద్దేందుకు ప్రత్యేక చర్యలు తీసుకుంటున్నారు. ప్రధాన రద్దీ ప్రాంతాలు, బస్టాండ్లు, రైల్వే స్టేషన్ పరిసరాల్లో భారీ స్వాగత తోరణాలు, ఎల్ఈడీ ఫ్లెక్సీలను అమర్చనున్నారు. local గా ఉన్న టీటీడీ అనుబంధ ఆలయాలు, శ్రీనివాసం, విష్ణునివాసం వంటి ప్రధాన భవనాలను విద్యుత్ దీపాలతో సుందరంగా అలంకరించాలని ఇంజినీరింగ్ విభాగం ఆదేశాలు అందుకుంది.

అదనపు సహాయ కేంద్రాలు.. శ్రీవారి సేవకుల సేవలు విస్తృతం..
క్యూలైన్లలో ఉన్న భక్తులకు ఎప్పటికప్పుడు సమాచారాన్ని అందిస్తూ మార్గదర్శనం చేసేందుకు పబ్లిక్ రిలేషన్స్ (PR) విభాగం ఆధ్వర్యంలో అదనపు సహాయ కేంద్రాలను (Information Counters) ప్రారంభించనున్నారు.

సహాయ కేంద్రాల ఏర్పాటు: ఆర్టీసీ బస్టాండ్, రైల్వే స్టేషన్, అలిపిరి నడక మార్గం, శ్రీనివాసం, విష్ణునివాసం కాంప్లెక్స్‌లలో ఈ కేంద్రాలు అందుబాటులో ఉంటాయి.

శ్రీవారి సేవకులు: భక్తులకు అన్నప్రసాదం, మంచినీరు పంపిణీ చేయడంతో పాటు సహాయ కేంద్రాల్లో సేవలు అందించేందుకు భారీ సంఖ్యలో శ్రీవారి సేవకులను కేటాయిస్తున్నట్లు పీఆర్వో డాక్టర్ టి. రవి వెల్లడించారు.

మహతి కళాక్షేత్రం, రామచంద్ర పుష్కరిణి వేదికలపై బ్రహ్మోత్సవాల సందర్భంగా నిర్వహించే ధార్మిక, సాంస్కృతిక కార్యక్రమాలకు విస్తృత ప్రచారం కల్పించనున్నారు. ఈ సమీక్షా సమావేశంలో టీటీడీ ఎస్‌ఈ-1 మనోహరం, ఎలక్ట్రికల్ ఎస్‌ఈ వెంకటేశ్వర్లు, డీఈలు రవిశంకర్ రెడ్డి, సరస్వతి, విజిలెన్స్ అధికారి గిరిధర్, అదనపు ఆరోగ్య అధికారి డాక్టర్ సునీల్ తదితరులు పాల్గొన్నారు.