తిరుమల శ్రీ వేంకటేశ్వర స్వామి వారి సన్నిధిలో వైకుంఠ ద్వార దర్శనాలు అత్యంత వైభవంగా కొనసాగుతున్నాయి. వైకుంఠ ఏకాదశి సందర్భంగా దేశం నలుమూలల నుంచి భక్తులు భారీగా తరలివచ్చారు. “గోవిందా.. గోవిందా..” నామస్మరణతో తిరుమల గిరులు మార్మోగుతున్నాయి. డిసెంబర్ 30 నుంచి జనవరి 1 వరకు కేవలం మూడు రోజుల్లోనే సుమారు 1 లక్షా 77 వేల మంది భక్తులు స్వామివారిని దర్శించుకున్నట్లు టీటీడీ అధికారులు వెల్లడించారు. ఇదే సమయంలో దాదాపు 33 వేల వాహనాలు తిరుమల కొండపైకి చేరుకోవడం భక్తుల రద్దీ తీవ్రతకు నిదర్శనంగా నిలిచింది.
భక్తుల సంఖ్య పెరగడంతో హుండీ ఆదాయం కూడా రికార్డు స్థాయికి చేరుకుంది. డిసెంబర్ 30న రూ. 2.25 కోట్ల హుండీ ఆదాయం నమోదుకాగా, వైకుంఠ ఏకాదశి రోజైన డిసెంబర్ 31న ఏకంగా రూ. 4.79 కోట్ల ఆదాయం వచ్చినట్లు టీటీడీ వెల్లడించింది. నూతన సంవత్సర వేడుకల వేళ కూడా భక్తుల తాకిడి కొనసాగుతూనే ఉంది. ఈ ఆదాయం శ్రీవారి సేవలు, అన్నదానం, వసతి సౌకర్యాల అభివృద్ధికి వినియోగించనున్నట్లు అధికారులు తెలిపారు.
ఇక క్యూలైన్లలో గంటల తరబడి వేచి ఉండే భక్తుల ఇబ్బందులను తగ్గించేందుకు టీటీడీ వినూత్న చర్యలకు శ్రీకారం చుట్టింది. ఎండలో, రద్దీలో అలసిపోయే భక్తుల దాహార్తిని తీర్చేందుకు ‘మొబైల్ వాటర్ డిస్పెన్సింగ్’ విధానాన్ని అమలు చేస్తోంది. శ్రీవారి సేవకులు తమ వీపుకు వాటర్ క్యాన్లను ధరించి, గ్లాసుల ద్వారా భక్తులకు తక్షణమే నీరు అందిస్తున్నారు. వైకుంఠ ద్వార దర్శనం ముగించుకుని బయటకు వచ్చే భక్తులకు ఈ సేవ ఎంతో ఉపశమనం కలిగిస్తోంది. ఈ కొత్త విధానంపై భక్తుల నుంచి ప్రశంసలు వెల్లువెత్తుతున్నాయి.
ప్రస్తుతం టోకెన్లు లేని భక్తులను కూడా సర్వదర్శనానికి అనుమతిస్తూ టీటీడీ సౌలభ్యాలు కల్పిస్తోంది. ఆక్టోపస్ భవనం, నారాయణగిరి ఉద్యానవనం మీదుగా క్యూలైన్లను క్రమబద్ధీకరించి, వైకుంఠం క్యూకాంప్లెక్స్–2 ద్వారా దర్శనానికి పంపుతున్నారు. ఇదిలా ఉండగా, చెన్నైకి చెందిన భక్తుడు పొన్నయ నాగేశ్వరన్ టీటీడీ శ్రీ వేంకటేశ్వర ప్రాణదాన ట్రస్టుకు రూ.50 లక్షల విరాళాన్ని ప్రకటించడం విశేషం. ఈ విరాళానికి సంబంధించిన డీడీని ఆయన టీటీడీ ఛైర్మన్ బీఆర్ నాయుడుకు అందజేశారు. భక్తుల విశ్వాసం, భక్తితో తిరుమల మరోసారి భక్తి శిఖరాలను తాకుతోంది.
