శుక్ర మౌఢ్యమి కాలం ఈ నెల 26 నుంచి ప్రారంభం కానుందని, ఇది వచ్చే సంవత్సరం ఫిబ్రవరి 17 వరకు కొనసాగుతుందని పండితులు తెలిపారు. మొత్తం 83 రోజులపాటు ఈ శుక్ర మౌఢ్యమి ప్రభావం ఉంటుందని వేదస్మార్త గురురాజు శర్మ వివరించారు. పండితుల ప్రకారం శుక్ర మౌఢ్యమి సమయంలో శుక్ర గ్రహం సూర్యునికి అత్యంత సమీపంగా ఉండటం వల్ల తన ప్రభావాన్ని కోల్పోతుంది. శుక్రుడు హిందూ శాస్త్రాల ప్రకారం శుభకార్యాలకు పాలకుడిగా పరిగణిస్తారు. అందువల్ల ఈ కాలంలో కొత్తగా శుభారంభాలు చేయడం మంచిది కాదని చెబుతున్నారు.
ఈ కాలంలో ముఖ్యంగా వివాహాలు, గృహప్రవేశాలు, వాహనాల కొనుగోలు, బోర్లు తవ్వించడం, శుభ ప్రారంభాలు, కొత్త వ్యాపారాలు మొదలుపెట్టడం, భవన నిర్మాణం ప్రారంభించడం వంటి శుభకార్యాలు చేయకూడదని సూచించారు. అలాగే చిన్న పిల్లల పుట్టువెంట్రుకలు తీయడం, చెవి పోకులు వేయించడం వంటి కర్మలకు కూడా ముహూర్తాలు ఇవ్వరు.
శాస్త్రాల ప్రకారం శుక్రుడు సౌందర్యం, ప్రేమ, కళలు, విలాసాలు మరియు కుటుంబ జీవనానికి సూచికగా పరిగణించబడతాడు. శుక్ర గ్రహం బలహీనమైనప్పుడు ఈ విషయాలకు సంబంధించిన శుభకార్యాలు ప్రారంభించడం మంచిది కాదని జ్యోతిష్య శాస్త్రం చెబుతోంది.
అయితే ఈ కాలంలో పూర్తిగా అన్ని కార్యక్రమాలు ఆగిపోవాలన్న నియమం లేదు. నిత్యారాధనలు, ఉపనయనాలు, సీమంతం (బేబీ షవర్) వంటి పుణ్యకార్యాలు శుక్ర మౌఢ్యమి ప్రభావానికి లోబడవని పండితులు పేర్కొన్నారు. అనారోగ్యం, అత్యవసరం, ప్రాణాపాయం వంటి సందర్భాల్లో చేసేవాటికి ఈ దోషం వర్తించదని కూడా స్పష్టం చేశారు.
అదేవిధంగా యాత్రలు అత్యవసర అవసరాల మేరకే చేసుకోవాలని, కానీ ప్రత్యేక ముహూర్తాల కోసం జరిపే ధార్మిక లేదా శుభయాత్రలను ఈ కాలంలో నివారించాలన్నారు. కొన్ని ప్రాంతాల్లో ఈ కాలాన్ని శుభాలు వాయిదా వేసుకునే సమయంగా భావిస్తారు. శుక్ర మౌఢ్యమి 2025 ఫిబ్రవరి 17తో ముగిశాక మళ్లీ శుభకార్యాల కోసం ముహూర్తాలు విస్తృతంగా లభ్యమవుతాయని పండితులు తెలిపారు.
