ప్రియమైన ఆంధ్రప్రవాసి పాఠక భక్తులారా,
సాక్షాత్తు వ్యాస భగవానుని కృపా ప్రసాదంతో, గీతామాత ఆరాధనకు మనకు లభించిన ఈ పవిత్ర అవకాశాన్ని మీతో పంచుకోవడం ఆనందకరమైన కర్తవ్యంగా భావిస్తున్నాం..
సాక్షాత్తు భగవంతుని వ్యక్తస్వరూపము, మూర్తి స్వరూపమైన శ్రీమద్భగవద్గీత మానవాళికి అందిన రోజు గీతా జయంతి రోజు. డిసెంబర్ ఒకటవ తేదీకి గీతా జయంతి వస్తుంది. ఈ గీతా జయంతి సందర్భంగా, పూజ్య శ్రీ గురుదేవుల ఆశీస్సులతో శ్రీమద్భగవద్గీత అష్టోత్తర శతనామావళిలోని ఈరోజు 12వ రోజు నామాన్ని మీ ముందుకు తీసుకొస్తున్నాము.
ప్రతి నామం వెనుక ఉన్న అర్థం, ఆధ్యాత్మికత, భక్తి సారాన్ని తెలుసుకొని మనం గీతామాతను మరింతగా ఆరాధించుకుందాం. ఈ పవిత్ర ప్రయత్నంలో భాగంగా, ఆంధ్రప్రవాసి Devotional విభాగంలో ప్రతి రోజు ఒక నామాన్ని మీకు అందజేస్తూ, మన గీతామాత కరుణకు అంజలి ఘటిస్తున్నాము.
ఓం వ్యాసదేవాయ నమః
పూజ్యశ్రీ భవఘ్నీ గురుదేవుల వారి అనుగ్రహం తో
శ్రీమద్భగవద్గీత అష్టోత్తరశత నామావళి
12. ఓం అద్వైత స్వరూపిణ్యై నమః
అర్థం: న + ద్వైతము = అద్వైతము. ద్వైతము కానిది అద్వైతము. ‘ద్వి’ అనగా రెండు అని అర్థం. రెండవది లేనిది అద్వైతము. అది ఏకమైనట్టిది.
ఏకమేవా-ద్వితీయం బ్రహ్మ -ఛాందోగ్యోపనిషత్తు.
ఒకే ఒక్కటి, రెండవది లేనట్టిది బ్రహ్మ / పరమాత్మ.
సృష్టి మొత్తం ఏకైక పరమాత్మ స్వరూపమే. ఈ సృష్టిలోని 84 లక్షల జీవరాశులలో ఉన్నది ఏకమే. పరమాత్మ స్వరూపమే. జీవుడు పరమాత్మ వేరు కాదని, ఇద్దరూ ఒకటే అని, పరమాత్మకు భిన్నంగా ఏదీ లేదని చెప్పేది అద్వైతము.
‘బ్రహ్మ సత్యం జగన్మిథ్యా జీవో బ్రహ్మైవ నాపరః’ -శంకర భగవత్పాదులు
జగత్తు మిథ్య; పరమాత్మే సత్యం; జీవుడు పరమాత్మ స్వరూపమే, వేరొకటి కాదు.
1. తత్త్వమసి (ఆ బ్రహ్మమే నీవై ఉన్నావు) -ఛాందోగ్యోపనిషత్తు.
2. అహం బ్రహ్మాస్మి (నేను బ్రహ్మమునై ఉన్నాను) -బృహదారణ్యకోపనిషత్తు.
ఈ ఉపనిషద్ మహావాక్యాలు కూడా అద్వైతాన్నే ప్రబోధిస్తున్నాయి.
శ్రీమద్భగవద్గీత అద్వైతామృత వర్షిణి. భగవద్గీత ఏకమైనట్టి, రెండవదే లేనట్టి అద్వైత జ్ఞానం. ‘మత్తః పరతరం నాన్యత్ కించిదస్తి ధనంజయ’. నాకంటే అన్యమైనది ఏదీ లేదు అంటున్నారు పరమాత్మ.
ఉపనిషత్ సారం, అద్వైత స్వరూపం అయిన గీతామాతకు సర్వస్య శరణాగతితో నమస్కరిస్తున్నాను.
ఈ జన్మను సార్థకం, సఫలం చేసుకోవటానికి ప్రతి క్షణం గీతామాతను గుర్తు చేసుకొంటూ, ఇంతటి అనుగ్రహాన్ని ప్రసాదించిన సాక్షాత్తు విష్ణు స్వరూపులైన వ్యాసదేవులకు హృదయపూర్వక కృతజ్ఞతలు.
ఈక్రింది telegram channel లింకు ద్వారా మనం పూజ్య శ్రీ భవఘ్ని గురుదేవుల వారి సత్సంగాలు శ్రవణం చేయవచ్చు
లింకు లో జాయిన్ అవండి
ఇంతటి మహత్తరమైన అవకాశాన్ని మనకందించిన గురుదేవుల వారికి అమ్మకు కృతజ్ఞతలు తెలియజేస్తూ
జై గురుదేవ్
నామం 10 :Bhagavad Gita : ఈ జన్మను సార్థకం, సఫలం చేసుకోవటానికి ప్రతి క్షణం.. కర్మ, భక్తి, జ్ఞాన యోగాల మార్గదర్శిని గీతా - 10!
నామం 7 : Bhagavad Gita: ధర్మార్థ కామ మోక్షాలను ప్రసాదించే.. కర్మ, భక్తి, జ్ఞాన యోగాల మార్గదర్శిని గీతా-7!
