- మళ్లీ ఐబొమ్మలో యథేచ్ఛగా అప్లోడ్ అవుతున్న సినిమాలు, ఓటీటీ కంటెంట్..
- Cinema: దీని రవి ఉన్నాడా లేక మరెవరైనా ఆపరేట్ చేస్తున్నారా అనేది సస్పెన్స్..
iBomma: తెలుగు సినీ పరిశ్రమను దశాబ్దాలుగా పీడిస్తున్న పైరసీ భూతం 'ఐబొమ్మ' (iBomma) రూపంలో మళ్లీ ప్రత్యక్షమవ్వడం టాలీవుడ్లో తీవ్ర కలకలం రేపుతోంది. ఈ నెట్వర్క్ నిర్వాహకుడు ఐబొమ్మ రవి అరెస్టుతో పైరసీకి శాశ్వతంగా అడ్డుకట్ట పడిందని భావించిన సినీ పెద్దలకు తాజా పరిణామాలు గట్టి షాక్ ఇస్తున్నాయి. కొన్ని నెలల క్రితం సైబరాబాద్ పోలీసులు అత్యంత చాకచక్యంగా వ్యవహరించి రవిని అదుపులోకి తీసుకున్నప్పుడు పరిశ్రమ వర్గాలు ఊపిరి పీల్చుకున్నాయి. అయితే, ఆయన బెయిల్పై విడుదలైన కొద్ది రోజులకే వెబ్సైట్ మళ్లీ యాక్టివ్ కావడమే కాకుండా, కొత్త సినిమాలను యథేచ్ఛగా అప్లోడ్ చేస్తుండటం గమనార్హం.
ప్రస్తుతం థియేటర్లలో విజయవంతంగా ప్రదర్శితమవుతున్న చిత్రాలతో పాటు, ప్రముఖ ఓటీటీ వేదికలపైకి వచ్చిన సరికొత్త కంటెంట్ను కూడా ఐబొమ్మ తన డొమైన్లను మారుస్తూ ప్రేక్షకులకు అందుబాటులోకి తెస్తోంది. ఐబొమ్మ నిర్వాహకుడు రవి ప్రస్తుతం పోలీసు నిఘాలో ఉన్నప్పటికీ సైట్ మళ్లీ ప్రత్యక్షమవ్వడం విస్తుగొలుపుతోంది. ఈ పైరసీ వెనుక కేవలం రవి మాత్రమే ఉన్నాడా లేదా ఏదైనా అంతర్జాతీయ నెట్వర్క్ దీనిని నడిపిస్తోందా అనే కోణంలో పోలీసులు లోతైన దర్యాప్తు చేస్తున్నారు. పదేపదే డొమైన్లను మారుస్తూ పోలీసుల కళ్లుగప్పుతున్న ఈ సైట్ను శాశ్వతంగా ఎలా కట్టడి చేయాలనేది ఇప్పుడు టాలీవుడ్కు పెద్ద సవాలుగా మారింది.
సినిమా రంగంపై ఆధారపడి బతుకుతున్న వేలాది మంది కార్మికుల పొట్టకొడుతున్న ఈ పైరసీ వెనుక ఉన్న అసలు సూత్రధారుల కోసం సైబర్ క్రైమ్ పోలీసులు వేట సాగిస్తున్నారు. ఇతర దేశాల్లోని సర్వర్ల ద్వారా ఈ సైట్ ఆపరేట్ అవుతుండటంతో సాంకేతికంగా దీనిని అడ్డుకోవడం క్లిష్టంగా మారుతోంది. రవి విడుదలైన తక్కువ కాలంలోనే సైట్ మళ్ళీ తన కార్యకలాపాలు ప్రారంభించడం వెనుక మరెవరైనా ఉన్నారా అన్న సందేహాలు కూడా వ్యక్తమవుతున్నాయి.
