Promotions: సచివాలయ ఉద్యోగులకు తీపి కబురు... త్వరలోనే నోషనల్ ఇంక్రిమెంట్లు, ప్రమోషన్లు!

• స్వర్ణ గ్రామ, వార్డు సచివాలయ సిబ్బందికి గుడ్‌న్యూస్: మంత్రి కీలక ప్రకటన...

• గత ప్రభుత్వ తప్పులను సరిదిద్దుతాం..

• సచివాలయ సిబ్బందికి పే-స్కేల్, పదోన్నతులపై మంత్రి హామీ...

• సచివాలయ ఉద్యోగుల అంతర్‌జిల్లా బదిలీలపై కసరత్తు: త్వరలోనే స్పష్టత...

Promotions: ఆంధ్రప్రదేశ్ రాష్ట్రంలోని ‘స్వర్ణ గ్రామ, స్వర్ణ వార్డు సచివాలయాల’ ఉద్యోగులకు కూటమి ప్రభుత్వం తియ్యటి కబురు అందించింది. సచివాలయ సిబ్బంది సుదీర్ఘకాలంగా ఎదురుచూస్తున్న నోషనల్ ఇంక్రిమెంట్లు, పదోన్నతుల (ప్రమోషన్లు) అమలుపై రాష్ట్ర సాంఘిక సంక్షేమ శాఖ మంత్రి డోలా శ్రీబాల వీరాంజనేయస్వామి కీలక ప్రకటన చేశారు. గత ప్రభుత్వం చేసిన తప్పులను సరిదిద్దుతూ, సచివాలయ ఉద్యోగులందరికీ త్వరలోనే నోషనల్ ఇంక్రిమెంట్లను వర్తింపజేస్తామని మంత్రి స్పష్టం చేశారు.

గత వైఎస్సార్ కాంగ్రెస్ పార్టీ ప్రభుత్వం గ్రామ, వార్డు సచివాలయాల సిబ్బందిని కేవలం రికార్డు అసిస్టెంట్ హోదాకే పరిమితం చేసిందని మంత్రి ఆరోపించారు. దీనివల్ల ఉద్యోగులకు రావాల్సిన ప్రమోషన్లు, ఇతర ఆర్థిక ప్రయోజనాలు, వసతులు నిలిచిపోయాయని పేర్కొన్నారు. ప్రస్తుత కూటమి ప్రభుత్వం ఈ లోపాలను సవరిస్తోందని, అందులో భాగంగానే సచివాలయ ఉద్యోగుల పదోన్నతుల ప్రక్రియను పర్యవేక్షించేందుకు ఇప్పటికే ఒక ప్రత్యేక మంత్రివర్గ ఉపసంఘాన్ని (క్యాబినెట్ సబ్ కమిటీ) కూడా ఏర్పాటు చేసినట్లు మంత్రి గుర్తుచేశారు.

సచివాలయాల్లోని వివిధ విభాగాలకు చెందిన ఉద్యోగుల ప్రయోజనాలే ధ్యేయంగా ప్రభుత్వం అడుగులు వేస్తోంది. ఇప్పటికే వ్యవసాయ, పశుసంవర్ధక, పంచాయతీరాజ్, వైద్య, మరియు రెవెన్యూ శాఖలకు చెందిన 7,246 మంది సిబ్బందికి ప్రమోషన్లు కల్పించినట్లు మంత్రి వెల్లడించారు. భవిష్యత్తులో ప్రతి శాఖకు చెందిన సచివాలయ ఉద్యోగికి స్పష్టమైన ప్రమోషన్ ఛానల్ ఏర్పాటు చేయడంతో పాటు, నోషనల్ ఇంక్రిమెంట్లు కూడా ఇస్తామన్నారు. అలాగే ప్రస్తుతం రూ.15,000 కన్సాలిడేటెడ్ పే పొందుతున్న సిబ్బంది వేతన అంశాన్ని పునఃసమీక్షించి, వారికి పే స్కేల్ వర్తింపజేసేలా చర్యలు తీసుకుంటున్నట్లు తెలిపారు.

ఉద్యోగుల సంక్షేమంలో భాగంగా బదిలీలు, సెలవుల నియమాల్లో కూడా ప్రభుత్వం కీలక మార్పులు చేస్తోంది. సచివాలయ సిబ్బంది ఎదురుచూస్తున్న అంతర్‌జిల్లా బదిలీల (ఇంటర్ డిస్ట్రిక్ట్ ట్రాన్స్‌ఫర్స్) అంశాన్ని పరిశీలిస్తున్నామని, ఇప్పటికే స్పౌజ్ (భార్యాభర్తల) బదిలీలను విజయవంతంగా చేపట్టామని మంత్రి తెలిపారు. పనిభారాన్ని తగ్గించేలా చర్యలు తీసుకుంటున్నామన్నారు. ఒకవేళ ఉద్యోగికి సెలవు పెట్టడానికి సరైన కారణం ఉండి కూడా, ఉన్నతాధికారులు నిరాకరిస్తే ఆటోమేటిక్‌గా సెలవు మంజూరయ్యే డిజిటల్ సౌకర్యాన్ని తీసుకొచ్చామని, సిబ్బంది సమస్యల పరిష్కారానికి ప్రత్యేకంగా ‘గ్రీవెన్స్ సెల్’ ఏర్పాటు చేశామని స్పష్టం చేశారు.

సచివాలయ సిబ్బందితో చేయించే సర్వేల విషయంలోనూ ప్రభుత్వం ఊరట కలిగించింది. గతంలో నిర్వహించిన యూనిఫైడ్ సర్వే వంటి పద్ధతులను నిలిపివేశామని, అయితే విపత్తులు సంభవించినప్పుడు మాత్రం ప్రజల కోసం సిబ్బంది అందరూ కలిసి పనిచేయాల్సి ఉంటుందని మంత్రి స్పష్టం చేశారు. వీటితో పాటు ప్రభుత్వ గురుకులాలు, హాస్టళ్లలో పారిశుద్ధ్య నిర్వహణకు అవుట్‌సోర్సింగ్ సిబ్బందిని నియమించామని, విద్యార్థుల ఆరోగ్య భద్రత కోసం రూ.5 కోట్లతో ‘సాంత్వన’ పథకాన్ని అమలు చేస్తున్నామని, దివ్యాంగులు, వృద్ధులు, హిజ్రాలకు టిడ్కో ఇళ్లలో గ్రౌండ్ ఫ్లోర్‌లోనే ఇళ్లను కేటాయిస్తామని మంత్రి వివరించారు.