Pithapuram: పిఠాపురం ఆరోగ్య రంగానికి భారీ బూస్ట్.. రూ.34 కోట్లతో 100 పడకల ఏరియా ఆసుపత్రి!

పవన్ కళ్యాణ్ చొరవతో పిఠాపురంలో ఆరోగ్య విప్లవం.. భారీగా వైద్య మౌలిక వసతులు..

పిఠాపురం హెల్త్ హబ్‌గా రూపాంతరం.. ఆసుపత్రులు, ఆయుష్ సేవలకు కొత్త ఊపు..

పిఠాపురం: ఎన్నికల సమయంలో ఇచ్చిన హామీలను అమలు చేయడమే లక్ష్యంగా పిఠాపురం నియోజకవర్గంలో ఆరోగ్య రంగాన్ని సమగ్రంగా అభివృద్ధి చేస్తున్నట్లు ప్రభుత్వం తెలిపింది. ఉప ముఖ్యమంత్రి, పిఠాపురం ఎమ్మెల్యే పవన్ కళ్యాణ్ ప్రత్యేక చొరవతో ఆసుపత్రుల ఆధునికీకరణ, ప్రాథమిక ఆరోగ్య కేంద్రాల బలోపేతం, ఆయుష్ వైద్య సేవల విస్తరణ, వైద్య విద్యా సంస్థ ఏర్పాటు వంటి పనులు కొనసాగుతున్నాయి.

ప్రతి పేద కుటుంబానికి ఆర్థిక భారం లేకుండా నాణ్యమైన వైద్యం అందించాలన్న లక్ష్యంతో పిఠాపురాన్ని మోడల్ హెల్త్ హబ్‌గా తీర్చిదిద్దే దిశగా చర్యలు చేపడుతున్నారు. ఆసుపత్రులకు రోగులు సులభంగా చేరుకునేలా కనెక్టింగ్ రోడ్ల నిర్మాణంపైనా దృష్టి పెట్టారు.

100 పడకల ఏరియా ఆసుపత్రిగా అభివృద్ధి
పిఠాపురంలోని 30 పడకల పాత కమ్యూనిటీ హెల్త్ సెంటర్‌ను రూ.34 కోట్ల అంచనా వ్యయంతో 100 పడకల అత్యాధునిక ఏరియా ఆసుపత్రిగా అభివృద్ధి చేస్తున్నారు. ఎన్నికల సందర్భంగా ఇచ్చిన హామీ మేరకు ఈ పనులను వేగంగా కొనసాగిస్తున్నారు.

4.67 ఎకరాల విస్తీర్ణంలో నిర్మిస్తున్న ఈ ఆసుపత్రి పనులు ఇప్పటికే దాదాపు 50 శాతం పూర్తయ్యాయి. నిర్మాణం పూర్తయిన తర్వాత ఆధునిక ఐసీయూ, వైద్య పరీక్షల ప్రయోగశాలలు, ఆపరేషన్ థియేటర్లు అందుబాటులోకి రానున్నాయి. అలాగే 30 పడకల ప్రసూతి విభాగంతో పాటు చిన్నపిల్లల వైద్యం, కంటి వైద్యం, ఎముకల వైద్యం కోసం ప్రత్యేక విభాగాలు ఏర్పాటు చేయనున్నారు.

ఈ ఆసుపత్రి అందుబాటులోకి వస్తే పిఠాపురం పట్టణంతో పాటు పరిసరాల్లోని ఆరు మండలాలకు చెందిన సుమారు 3 లక్షల మందికి మెరుగైన ఉచిత వైద్య సేవలు మరింత చేరువ కానున్నాయి. ఆసుపత్రికి అనుబంధంగా బయోమెడికల్ వ్యర్థాల నిర్వహణ భవనం, మార్చురీ, లక్ష లీటర్ల సామర్థ్యంతో సంప్ తదితర మౌలిక సదుపాయాలను కూడా ఏర్పాటు చేస్తున్నారు.

రూ.100 కోట్లతో ప్రభుత్వ ఆయుష్ మెడికల్ కాలేజీ
పిఠాపురాన్ని వైద్య విద్యకు కూడా ముఖ్య కేంద్రంగా తీర్చిదిద్దే ప్రయత్నాలు జరుగుతున్నాయి. నేషనల్ ఆయుష్ మిషన్ కింద సుమారు రూ.100 కోట్లతో ప్రభుత్వ ఆయుష్ మెడికల్ కాలేజీ ఏర్పాటు చేయనున్నారు.

కళాశాల నిర్మాణం, అనుబంధ సదుపాయాల కోసం అవసరమైన భూసేకరణ పనులను వేగవంతం చేశారు. కళాశాల ఏర్పాటుతో వైద్య విద్యకు కొత్త అవకాశాలు రావడంతో పాటు స్థానికంగా ఉపాధి అవకాశాలు కూడా పెరిగే అవకాశం ఉంది.

గ్రామాలకు చేరువలో ప్రాథమిక వైద్యం
పట్టణాలకే వైద్య సేవలను పరిమితం చేయకుండా గ్రామీణ ప్రాంతాల్లోనూ ఆరోగ్య సదుపాయాలను బలోపేతం చేస్తున్నారు. యు.కొత్తపల్లి మండలం కొమరగిరి, గొల్లప్రోలు మండలం చేబ్రోలులో రూ.50 లక్షల చొప్పున నిర్మించిన ప్రాథమిక ఆరోగ్య కేంద్రాల పనులు పూర్తయ్యాయి. ప్రస్తుతం అవి ప్రజలకు అందుబాటులో ఉన్నాయి.

విరవాడలో రూ.30 లక్షలతో నిర్మిస్తున్న ప్రభుత్వ ఆయుష్ డిస్పెన్సరీ పనులు కూడా తుది దశకు చేరుకున్నాయి. దీంతో గ్రామీణ ప్రజలకు స్థానికంగానే ప్రాథమిక వైద్య సేవలు, ఆయుష్ చికిత్సలు అందే అవకాశం ఏర్పడనుంది.

కాకినాడలో క్యాన్సర్ చికిత్సకు అధునాతన కేంద్రం
పిఠాపురం నియోజకవర్గానికే కాకుండా మొత్తం కాకినాడ జిల్లా ప్రజలకు మెరుగైన వైద్య సేవలు అందించడంపై కూడా దృష్టి సారిస్తున్నారు. పవన్ కళ్యాణ్ చొరవతో కాకినాడ ప్రభుత్వ సర్వజన ఆసుపత్రిలో రూ.36.6 కోట్లతో అధునాతన క్యాన్సర్ చికిత్సా కేంద్రం ఏర్పాటు కానుంది. ఇందులో సీటీ సిమ్యులేటర్, హెచ్‌డీఆర్ బ్రాకీథెరపీ, డోసిమెట్రీ వంటి ఆధునిక వైద్య పరికరాలను అందుబాటులోకి తీసుకురానున్నారు.

క్యాన్సర్‌ను ప్రారంభ దశలోనే గుర్తించేందుకు మొబైల్ క్యాన్సర్ స్క్రీనింగ్ వాహనం కూడా ఏర్పాటు చేయనున్నారు. దీని ద్వారా గ్రామీణ ప్రాంతాలకు వెళ్లి ప్రజలకు స్క్రీనింగ్ సేవలు అందించే అవకాశం ఉంటుంది.

ఆరోగ్య రంగానికి సమగ్ర ప్రణాళిక
ప్రాథమిక ఆరోగ్య కేంద్రాల నుంచి ప్రత్యేక వైద్య సేవల వరకు మొత్తం ఆరోగ్య వ్యవస్థను బలోపేతం చేసేలా ఈ కార్యక్రమాలను చేపడుతున్నారు. కొత్త ఆసుపత్రులు, ఆయుష్ సేవలు, వైద్య విద్య, క్యాన్సర్ చికిత్స, రవాణా సౌకర్యాలను ఒకదానితో ఒకటి అనుసంధానించడం ద్వారా ప్రజలకు మెరుగైన వైద్యం అందించాలన్నది ప్రభుత్వ లక్ష్యంగా కనిపిస్తోంది.

పేదలు, గ్రామీణ ప్రజలు ఖరీదైన వైద్యం కోసం దూర ప్రాంతాలకు వెళ్లాల్సిన పరిస్థితి తగ్గేలా స్థానికంగానే నాణ్యమైన వైద్య సేవలను అందుబాటులోకి తీసుకురావడంపై ప్రత్యేక దృష్టి పెట్టారు.

పిఠాపురంలో కొనసాగుతున్న ఈ ఆరోగ్య మౌలిక వసతుల అభివృద్ధి పూర్తయితే నియోజకవర్గంతో పాటు కాకినాడ జిల్లా ప్రజలకు కూడా వైద్య సేవల్లో గణనీయమైన మార్పు వచ్చే అవకాశం ఉంది. నాణ్యమైన వైద్యం ప్రతి ఒక్కరి హక్కు అనే లక్ష్యాన్ని ఆచరణలోకి తీసుకెళ్లేందుకు ఈ చర్యలు దోహదపడతాయని అధికారులు భావిస్తున్నారు.