Veligonda Project: మూడు దశాబ్దాల కల సాకారం... వెలిగొండ ప్రాజెక్టు ఫేజ్-1ను ప్రారంభించనున్న సీఎం చంద్రబాబు! ఫుల్ షెడ్యూల్...
పూల సుబ్బయ్య వెలిగొండ ప్రాజెక్ట్ ఫేజ్-1ను ముఖ్యమంత్రి నారా చంద్రబాబు నాయుడు ప్రారంభించి జాతికి అంకితం చేయనున్నారు. 1996లో శంకుస్థాపన చేసిన ఈ ప్రాజెక్టును కూటమి ప్రభుత్వం అత్యంత ప్రాధాన్యతతో పూర్తి చేసింది. తొలి దశలో 10.70 టీఎంసీల నీటి విడుదలతో 1.19 లక్షల ఎకరాలకు సాగునీరు, 4 లక్షల మందికి తాగునీరు అందుతుంది. పూర్తి స్థాయిలో పూర్తయితే 4.47 లక్షల ఎకరాల ఆయకట్టుతో పాటు 23 లక్షల మందికి తాగునీరు సమకూరనుంది.
ఫ్లోరైడ్ రక్కసికి శాశ్వత చెక్.. 4 జిల్లాల ప్రజల దాహం తీర్చనున్న వెలిగొండ ప్రాజెక్ట్
సీఎం చంద్రబాబు మార్కాపురం పర్యటన.. వెలిగొండ ప్రాజెక్ట్ ప్రారంభోత్సవ షెడ్యూల్ ఇదే!
తొలి దశలో 10.70 టీఎంసీల నీటి విడుదల.. 1.19 లక్షల ఎకరాలకు సాగునీరు
Prakasam: ఆంధ్రప్రదేశ్ నీటిపారుదల రంగ చరిత్రలో సువర్ణాక్షరాలతో లిఖించదగ్గ సరికొత్త అధ్యాయం ఆవిష్కృతం కాబోతోంది. ప్రకాశం, మార్కాపురం మెట్ట ప్రాంత ప్రజల చిరకాల స్వప్నం, సంజీవనిగా భావించే ప్రతిష్టాత్మక పూల సుబ్బయ్య వెలిగొండ ప్రాజెక్టు తొలి దశను ముఖ్యమంత్రి నారా చంద్రబాబు నాయుడు అధికారికంగా ప్రారంభించి జాతికి అంకితం చేయనున్నారు. తీవ్ర కరువు, తాగు-సాగునీటి కొరతతో దశాబ్దాలుగా అల్లాడుతున్న ప్రకాశం, మార్కాపురం, నెల్లూరు, వైఎస్సార్ కడప జిల్లాల పరిధిలోని కరువు పీడిత ప్రాంతాలకు ఈ ప్రాజెక్టు ప్రారంభంతో సరికొత్త జీవం లభించనుంది.
చారిత్రక నేపథ్యం - శంకుస్థాపన నుంచి ప్రారంభం దాకా
ఈ ప్రాజెక్టుకు దాదాపు 30 ఏళ్ల క్రితం అంటే 1996 మార్చి 5న ఉమ్మడి ఆంధ్రప్రదేశ్ ముఖ్యమంత్రిగా ఉన్న సమయంలో నారా చంద్రబాబు నాయుడే శంకుస్థాపన చేశారు. మూడు దశాబ్దాల సుదీర్ఘ కాలం తర్వాత మళ్లీ ఆయన చేతుల మీదుగానే తొలి దశ ప్రారంభం కానుండటం ఒక అరుదైన చారిత్రక ఘట్టంగా నిలిచింది. "వెలిగొండ జలసిరులు - అభివృద్ధికి రెక్కలు" అనే నినాదంతో ప్రభుత్వం ఈ ప్రారంభోత్సవ వేడుకలను అత్యంత ఘనంగా నిర్వహిస్తోంది. శ్రీశైలం జలాశయం నుంచి గ్రావిటీ ద్వారా కృష్ణా వరద జలాలను తరలించి నల్లమల సాగర్లో నిల్వ చేసి, ప్రధాన కాలువల ద్వారా సాగు, తాగునీటికి వినియోగించేలా ఈ ప్రాజెక్టును తీర్చిదిద్దారు.
తొలి దశ ప్రయోజనాలు మరియు ఆయకట్టు వివరాలు
వెలిగొండ ప్రాజెక్టు మొదటి దశ ప్రారంభం ద్వారా సుమారు 10.70 టీఎంసీల కృష్ణా జలాలను నల్లమల సాగర్కు విడుదల చేయనున్నారు. దీని ద్వారా తొలి విడతలో 1.19 లక్షల ఎకరాలకు సాగునీటితో పాటు, 4 లక్షల మంది ప్రజలకు స్వచ్ఛమైన తాగునీరు అందనుంది. ఇక ఈ ప్రాజెక్టు పూర్తి స్థాయిలో అందుబాటులోకి వస్తే నాలుగు జిల్లాల్లోని 30 మండలాల పరిధిలో 4.47 లక్షల ఎకరాలకు సాగునీరు లభిస్తుంది. ముఖ్యంగా తీవ్ర ఫ్లోరైడ్ సమస్యతో బాధపడుతున్న గ్రామాలకు శాశ్వత విముక్తి కల్పిస్తూ మొత్తం 23 లక్షల మందికి రక్షిత తాగునీరు సమకూరనుంది.
సవాళ్లను అధిగమించి పనుల వేగవంతం
1996లో ప్రాజెక్టు పనులు మొదలైనప్పటికీ స్వరంగాల నిర్మాణం, ఫీడర్ కాలువలు, హెడ్ రెగ్యులేటర్లు, భూసేకరణ మరియు పునరావాసం వంటి ఎన్నో సంక్లిష్టమైన సవాళ్లు ఎదురయ్యాయి. 2024లో కూటమి ప్రభుత్వం అధికారంలోకి వచ్చిన తర్వాత వెలిగొండ ప్రాజెక్టును అత్యంత ప్రాధాన్యత ప్రాజెక్టుగా స్వీకరించి పనులను పరుగులు పెట్టించింది. టన్నెల్ పనులను రికార్డు సమయంలో పూర్తి చేయడంతో పాటు, నిర్వాసిత కుటుంబాల సంక్షేమానికి పెద్దపీట వేసింది. కేవలం 48 రోజుల వ్యవధిలోనే పునరావాసం కింద నిర్వాసితులకు రూ. 768 కోట్ల భారీ పరిహారాన్ని చెల్లించి ప్రాజెక్ట్ ప్రారంభానికి మార్గం సుగమం చేసింది.
వ్యవసాయ విప్లవం - ఆర్థిక పురోగతి
వెలిగొండ కృష్ణా జలాలు అందుబాటులోకి రావడం వల్ల రాయలసీమ, ప్రకాశం జిల్లాల సరిహద్దు ప్రాంతాల్లో వ్యవసాయ ముఖచిత్రం పూర్తిగా మారనుంది. సాగునీటి భద్రత పెరగడంతో సంప్రదాయ పంటలకే పరిమితం కాకుండా ఉద్యానవన పంటలు, కమర్షియల్ క్రాప్స్ సాగు వైపు రైతులు మొగ్గు చూపే అవకాశం ఏర్పడుతుంది. భూగర్భ జలాలు రీఛార్జ్ అవ్వడంతో పాటు అగ్రో ప్రాసెసింగ్, ఫుడ్ ప్రాసెసింగ్ పరిశ్రమలు విస్తరిస్తాయి. ఫలితంగా గ్రామీణ ప్రాంతాల్లో స్థానికంగానే ఉపాధి అవకాశాలు పెరిగి వలసలు గణనీయంగా తగ్గుతాయి.
ముఖ్యమంత్రి పర్యటన షెడ్యూల్
వెలిగొండ ప్రాజెక్ట్ ప్రారంభోత్సవంలో భాగంగా సీఎం చంద్రబాబు ఉదయం 9:30 గంటలకు ఉండవల్లి నివాసం నుంచి హెలికాప్టర్లో బయలుదేరి మార్కాపురం జిల్లా దోర్నాల మండలం గంటవానిపల్లి చేరుకుంటారు. అక్కడ ప్రాజెక్టు వద్ద ప్రత్యేక పూజా కార్యక్రమాలు నిర్వహించి, పైలాన్ను ఆవిష్కరిస్తారు. అనంతరం గేట్లు ఎత్తి ప్రాజెక్టు మొదటి దశ ద్వారా నీటిని విడుదల చేస్తారు. ఆ తర్వాత గంటవానిపల్లిలో ఏర్పాటు చేసిన భారీ బహిరంగ సభలో ప్రజలనుద్దేశించి ప్రసంగిస్తారు. 30 ఏళ్ల సంకల్పం నెరవేరుతుండటంతో ఆ ప్రాంత ప్రజల్లో పండుగ వాతావరణం నెలకొంది.
Be the first to react
