Mangalagiri: మంగళగిరిలో మోడరన్ రైతు బజార్‌కు శంకుస్థాపన.. రూ.18.55 కోట్లతో ఇంటిగ్రేటెడ్ మార్కెట్!

మంగళగిరికి మరో భారీ ప్రాజెక్టు.. 5.90 ఎకరాల్లో ఆధునిక రైతు బజార్ నిర్మాణం..

మంత్రి లోకేష్ కీలక అడుగు.. మంగళగిరిలో మోడరన్ రైతు బజార్‌కు భూమిపూజ..

మంగళగిరి: మంగళగిరి నియోజకవర్గాన్ని దేశంలోనే ఆదర్శ నియోజకవర్గంగా తీర్చిదిద్దే లక్ష్యంతో అభివృద్ధి పనులు వేగం పుంజుకుంటున్నాయి. ఇందులో భాగంగా మంగళగిరి పట్టణంలోని నిడమర్రు రైల్వే గేట్ వద్ద ఆధునిక సౌకర్యాలతో నిర్మించనున్న మోడరన్ రైతు బజార్‌కు విద్య, ఐటీ శాఖల మంత్రి నారా లోకేష్ గురువారం భూమిపూజ చేసి శంకుస్థాపన చేశారు.

శంకుస్థాపన కార్యక్రమానికి వచ్చిన మంత్రి లోకేష్‌కు టీడీపీ నాయకులు, కార్యకర్తలు, స్థానిక ప్రజలు ఘనస్వాగతం పలికారు. అనంతరం ప్రాజెక్టు శిలాఫలకాన్ని ఆవిష్కరించిన మంత్రి.. రైతు బజార్ నమూనా చిత్రాలను పరిశీలించారు. నిర్మాణానికి సంబంధించిన వివరాలను అధికారులను అడిగి తెలుసుకున్నారు.

5.90 ఎకరాల్లో రూ.18.55 కోట్లతో నిర్మాణం
మంగళగిరి ప్రజలు, రైతుల అవసరాలను దృష్టిలో పెట్టుకుని ఈ ఇంటిగ్రేటెడ్ మార్కెట్‌ను ఏర్పాటు చేస్తున్నారు. 5.90 ఎకరాల విస్తీర్ణంలో రూ.18.55 కోట్ల వ్యయంతో ప్రాజెక్టును చేపడుతున్నారు. ఈ మొత్తాన్ని అరబిందో ఫార్మా ట్రస్ట్ సీఎస్ఆర్ నిధుల ద్వారా సమకూర్చనున్నారు.

మొత్తం 71,925 చదరపు అడుగుల నిర్మాణ విస్తీర్ణంతో మార్కెట్‌ను అభివృద్ధి చేయనున్నారు. పరిశుభ్రతకు ప్రాధాన్యం ఇస్తూ వినియోగదారులకు సౌకర్యవంతంగా, పర్యావరణహితంగా మార్కెట్‌ను రూపొందించనున్నారు.

రిటైల్ మార్కెట్‌లో ప్రత్యేక స్టాళ్లు
మోడరన్ రైతు బజార్‌లో రిటైల్, హోల్‌సేల్ మార్కెట్లను సమగ్రంగా ఏర్పాటు చేయనున్నారు. రిటైల్ విభాగంలో కూరగాయల విక్రయాల కోసం 102 స్టాళ్లు ఏర్పాటు చేస్తారు. పండ్లు, పూల విక్రయాలకు మరో 54 ప్రత్యేక స్టాళ్లు అందుబాటులో ఉంటాయి. ఇతర రకాల వస్తువుల విక్రయాల కోసం 60 షాపులు నిర్మించనున్నారు. దీంతో స్థానిక వినియోగదారులకు ఒకే ప్రాంగణంలో వివిధ రకాల అవసరాలు తీర్చుకునే అవకాశం ఏర్పడుతుంది.

హోల్‌సేల్ మార్కెట్‌తో రైతులకు ప్రయోజనం
హోల్‌సేల్ విభాగంలో సరుకుల రాకపోకలకు అనుగుణంగా 18 అన్‌లోడింగ్ ప్లాట్‌ఫామ్‌లు, కూరగాయల విక్రయాల కోసం 23 షాపులు ఏర్పాటు చేయనున్నారు. అదేవిధంగా మార్కెట్‌లో కోల్డ్ స్టోరేజీ, వెజిటబుల్ వాష్ ఏరియాలు, అడ్మినిస్ట్రేషన్, మెయింటెనెన్స్ విభాగాలు, క్యాంటీన్, మరుగుదొడ్లు వంటి సౌకర్యాలు కల్పించనున్నారు. మార్కెట్‌కు వచ్చే ప్రజలు, వ్యాపారులు, రైతులకు ఇబ్బందులు లేకుండా మౌలిక వసతులు ఏర్పాటు చేయనున్నారు.

వాహనాలకు ప్రత్యేక పార్కింగ్
కూరగాయలు, ఇతర సరుకులను తరలించే వాహనాలతో పాటు ద్విచక్ర, నాలుగు చక్రాల వాహనాల కోసం ప్రత్యేక పార్కింగ్ సదుపాయం కల్పించనున్నారు. దీంతో మార్కెట్ పరిసరాల్లో ట్రాఫిక్ సమస్యలను తగ్గించేందుకు అవకాశం ఉంటుంది.

మోడరన్ రైతు బజార్ పూర్తయితే రైతులకు తమ ఉత్పత్తులను విక్రయించేందుకు మెరుగైన వేదిక లభించడంతో పాటు, వినియోగదారులకు పరిశుభ్రమైన వాతావరణంలో కూరగాయలు, పండ్లు, పూలు, ఇతర నిత్యావసర వస్తువులు అందుబాటులోకి రానున్నాయి.

కార్యక్రమానికి ప్రముఖుల హాజరు
శంకుస్థాపన కార్యక్రమంలో అరబిందో ఫార్మా ట్రస్ట్ వైస్ ప్రెసిడెంట్ జీ. భీముడు, ఎంటీఎంసీ కమిషనర్ షేక్ అలీమ్ బాషా, పద్మశాలీ వెల్ఫేర్ అండ్ డెవలప్‌మెంట్ కార్పొరేషన్ ఛైర్మన్ నందం అబద్దయ్య, ఏపీఎంఎస్ఐడీసీ ఛైర్మన్ చిల్లపల్లి శ్రీనివాసరావు, టీటీడీ బోర్డు సభ్యురాలు తమ్మిశెట్టి జానకీ దేవి పాల్గొన్నారు.

టీడీపీ పొలిట్‌బ్యూరో సభ్యులు గుత్తికొండ ధనుంజయరావు, గుంటూరు పార్లమెంట్ టీడీపీ ప్రధాన కార్యదర్శి పోతినేని శ్రీనివాసరావు, మంగళగిరి పట్టణ టీడీపీ అధ్యక్షుడు పడవల మహేష్, రూరల్ అధ్యక్షుడు పల్లబోతుల శ్రీనివాసరావు, తాడేపల్లి పట్టణ టీడీపీ అధ్యక్షుడు వల్లభనేని వెంకట్రావు, దుగ్గిరాల మండల టీడీపీ అధ్యక్షురాలు కేశంనేని శ్రీ అనిత తదితరులు హాజరయ్యారు.

మంగళగిరిలో ఇప్పటికే కొనసాగుతున్న అభివృద్ధి పనులకు ఈ ఆధునిక రైతు బజార్ మరో కీలక ప్రాజెక్టుగా నిలవనుంది. రైతులు, వ్యాపారులు, వినియోగదారులకు ఒకే వేదికపై మెరుగైన మార్కెట్ సౌకర్యాలు కల్పించడమే దీని ప్రధాన లక్ష్యం.