Government: నిత్యావసరాల ధరలకు కళ్లెం.. మార్కెట్ ఇంటర్వెన్షన్‌పై ప్రభుత్వం కీలక నిర్ణయాలు!

కిలో ఉల్లిపాయలు రూ.35కే.. 1.20 లక్షల మెట్రిక్ టన్నుల కందులు కేటాయించాలని కేంద్రానికి విజ్ఞప్తి..

సబ్సిడీ ధరలకు పామాయిల్.. 10 వేల మెట్రిక్ టన్నుల KNM బియ్యం సేకరణకు ఆదేశాలు..

అమరావతి: నిత్యావసర వస్తువుల ధరలు పెరుగుతున్న నేపథ్యంలో సామాన్య ప్రజలపై అదనపు భారం పడకుండా రాష్ట్ర ప్రభుత్వం మార్కెట్ ఇంటర్వెన్షన్ చర్యలను మరింత విస్తరించనుంది. ఉల్లిపాయలు, కందిపప్పు, పామాయిల్‌తో పాటు బియ్యం ధరలను నియంత్రించేందుకు తక్షణ చర్యలు చేపట్టాలని మంత్రివర్గ ఉపసంఘం నిర్ణయించింది.

రాష్ట్ర సచివాలయంలో గురువారం జరిగిన మంత్రివర్గ ఉపసంఘం సమావేశంలో పౌరసరఫరాల శాఖ మంత్రి నాదెండ్ల మనోహర్, వ్యవసాయ శాఖ మంత్రి కింజరాపు అచ్చెన్నాయుడు, ఆర్థిక శాఖ మంత్రి పయ్యావుల కేశవ్ పాల్గొన్నారు. మార్కెట్‌లో నిత్యావసర వస్తువుల ధరలు, నిల్వలు, సరఫరా పరిస్థితిపై సమీక్షించారు.

ఇప్పటికే బియ్యం ధరలను నియంత్రించేందుకు అమలు చేస్తున్న మార్కెట్ ఇంటర్వెన్షన్ కార్యక్రమానికి అదనంగా ఉల్లిపాయలు, కందిపప్పు, పామాయిల్‌పై కూడా చర్యలు చేపట్టాలని నిర్ణయించారు. ప్రజలపై ధరల భారం పడకుండా అవసరమైన అన్ని చర్యలు తీసుకోవాలని అధికారులను మంత్రులు ఆదేశించారు.

కిలో ఉల్లిపాయలు రూ.35కే
వినియోగదారులకు కిలో ఉల్లిపాయలను రూ.35కే అందించాలని మంత్రివర్గ ఉపసంఘం నిర్ణయించింది. ఇందుకోసం అవసరమైన ఉల్లిపాయల నిల్వలను రాష్ట్రానికి కేటాయించేలా నేషనల్ కోఆపరేటివ్ కన్జూమర్స్ ఫెడరేషన్ (NCCF) దృష్టికి తీసుకెళ్లాలని అధికారులకు సూచించింది.

కేంద్రం నుంచి కేటాయించే ఉల్లిపాయల నిల్వలను రాష్ట్రవ్యాప్తంగా వినియోగదారులకు అందుబాటులోకి తీసుకురావాలని నిర్ణయించారు. ధరల పెరుగుదలతో ఇబ్బంది పడుతున్న సామాన్యులకు తక్కువ ధరకే ఉల్లిపాయలు అందేలా చర్యలు తీసుకోనున్నారు.

కందిపప్పు ధరలను నియంత్రించేందుకు కూడా మార్కెట్ ఇంటర్వెన్షన్ చేపట్టాలని మంత్రివర్గ ఉపసంఘం నిర్ణయించింది. ఇందులో భాగంగా 1.20 లక్షల మెట్రిక్ టన్నుల కందులను రాష్ట్రానికి కేటాయించాలని కేంద్ర వినియోగదారుల వ్యవహారాల శాఖను కోరారు.

కేంద్రం నుంచి కందులు అందిన తర్వాత వాటిని ప్రాసెసింగ్ చేసి కందిపప్పుగా మార్చనున్నారు. అనంతరం రైతు బజార్లు, ప్రత్యేక కౌంటర్ల ద్వారా వినియోగదారులకు సరసమైన ధరలకు విక్రయించేలా చర్యలు చేపట్టాలని నిర్ణయించారు.

పామాయిల్ ధరలు కూడా పెరుగుతున్న నేపథ్యంలో తక్షణ మార్కెట్ ఇంటర్వెన్షన్ చేపట్టాలని మంత్రివర్గ ఉపసంఘం నిర్ణయించింది. NCCF ద్వారా పామాయిల్‌ను సేకరించే అవకాశాలను పరిశీలించాలని అధికారులను ఆదేశించింది.

NCCFతో సమన్వయం చేసుకుని అవసరమైన పామాయిల్‌ను సమకూర్చి వినియోగదారులకు సబ్సిడీ ధరలకు అందించేలా చర్యలు చేపట్టాలని సూచించింది.

651 ప్రత్యేక కౌంటర్లలో బియ్యం విక్రయాలు
బియ్యం ధరల పెరుగుదలను నియంత్రించేందుకు రాష్ట్రవ్యాప్తంగా ఇప్పటికే మార్కెట్ ఇంటర్వెన్షన్ కార్యక్రమం కొనసాగుతోంది. 651 ప్రత్యేక కౌంటర్లు, రైతు బజార్ల ద్వారా బియ్యాన్ని వినియోగదారులకు సరసమైన ధరలకు విక్రయిస్తున్నారు. ఇప్పటివరకు సుమారు 10,163 క్వింటాళ్ల బియ్యాన్ని విక్రయించగా, దాదాపు లక్ష మంది వినియోగదారులు ప్రయోజనం పొందినట్లు అధికారులు తెలిపారు.

10 వేల మెట్రిక్ టన్నుల KNM బియ్యం సేకరణ
వినియోగదారులు ఎక్కువగా ఇష్టపడే KNM రకం బియ్యాన్ని 10,000 మెట్రిక్ టన్నులు సేకరించాలని మంత్రివర్గ ఉపసంఘం అధికారులను ఆదేశించింది. నెల్లూరు జిల్లాలోని రైస్ మిల్లర్ల నుంచి ఈ బియ్యాన్ని సేకరించనున్నారు.

సేకరించిన బియ్యాన్ని ప్రత్యేక కౌంటర్ల ద్వారా సరసమైన ధరకు విక్రయించాలని నిర్ణయించారు. దీనివల్ల బహిరంగ మార్కెట్‌లో బియ్యం సరఫరా పెరగడంతో పాటు ధరల భారం నుంచి వినియోగదారులకు కొంత ఉపశమనం లభిస్తుందని ప్రభుత్వం భావిస్తోంది.

కృత్రిమ కొరతకు అవకాశం లేకుండా పర్యవేక్షణ
ఉల్లిపాయలు, కందిపప్పు, పామాయిల్, బియ్యం సహా నిత్యావసర వస్తువుల ధరలు, నిల్వలు, సరఫరాను ఎప్పటికప్పుడు పర్యవేక్షించాలని మంత్రివర్గ ఉపసంఘం అధికారులను ఆదేశించింది.

మార్కెట్‌లో కృత్రిమ కొరతకు అవకాశం లేకుండా సంబంధిత శాఖలు సమన్వయంతో పనిచేయాలని స్పష్టం చేసింది. అవసరమైన చోట మార్కెట్ ఇంటర్వెన్షన్‌ను సమర్థవంతంగా అమలు చేయాలని సూచించింది.

సామాన్య ప్రజలకు నిత్యావసర వస్తువులు అందుబాటు ధరల్లో లభించేలా ప్రభుత్వం అవసరమైన అన్ని చర్యలు తీసుకోవాలని మంత్రులు స్పష్టం చేశారు. ఈ సమావేశంలో సంబంధిత శాఖల అధికారులు, సిబ్బంది పాల్గొన్నారు.