Handicrafts: ఏపీ హస్తకళలకు కొత్త రూపం.. ఆధునిక డిజైన్లపై 770 మంది కళాకారులకు శిక్షణ!

770 మంది కళాకారులకు ప్రత్యేక శిక్షణ.. రూ.1.35 కోట్లతో కేంద్రం సహకారం..

200 మందికి శిక్షణతో పాటు ఆధునిక పనిముట్లు.. కళాకారుల ఆదాయం పెంపే లక్ష్యం..

అమరావతి: మారుతున్న ప్రజల అభిరుచులకు అనుగుణంగా ఆంధ్రప్రదేశ్ సంప్రదాయ హస్తకళలకు కొత్త రూపు ఇవ్వాలని కేంద్ర, రాష్ట్ర ప్రభుత్వాలు నిర్ణయించాయి. సంప్రదాయ కళారూపాలను కాపాడుతూనే ఆధునిక డిజైన్ల తయారీలో కళాకారులకు శిక్షణ ఇవ్వనున్నారు. తద్వారా హస్తకళాకారులకు మెరుగైన ఉపాధి, ఆదాయం, ఆర్థిక భరోసా కల్పించడమే లక్ష్యంగా కార్యక్రమాలను చేపడుతున్నారు.

రాష్ట్రవ్యాప్తంగా వివిధ హస్తకళారూపాలను తయారు చేస్తున్న 770 మంది కళాకారులకు శిక్షణ ఇవ్వనున్నట్లు రాష్ట్ర చేనేత, జౌళి శాఖ మంత్రి ఎస్. సవిత తెలిపారు. ఇందుకోసం కేంద్ర ప్రభుత్వం రూ.1,35,16,314 నిధులను మంజూరు చేసిందని చెప్పారు. ఇందులో మొదటి విడతగా రూ.1.01 కోట్లు విడుదల చేసినట్లు వెల్లడించారు. ఈ మేరకు శుక్రవారం మంత్రి సవిత ప్రకటన విడుదల చేశారు.

ఆంధ్రప్రదేశ్‌లోని వివిధ జిల్లాల్లో ప్రత్యేక గుర్తింపు పొందిన హస్తకళలను తయారు చేస్తున్న కళాకారులను గుర్తించి వారికి కొత్త డిజైన్లు, ఆధునిక తయారీ విధానాలపై శిక్షణ ఇవ్వాలని కేంద్ర, రాష్ట్ర ప్రభుత్వాలు నిర్ణయించాయని మంత్రి తెలిపారు.

కళారూపాన్ని బట్టి నెల రోజుల నుంచి రెండు నెలల వరకు శిక్షణ కార్యక్రమాలు నిర్వహించనున్నారు. ఇప్పటికే సంప్రదాయ కళల్లో నైపుణ్యం ఉన్న కళాకారులకు మరింత మెరుగైన శిక్షణ అందించడం ద్వారా వారి ఉత్పత్తులకు మార్కెట్‌లో డిమాండ్ పెంచే ప్రయత్నం చేస్తున్నారు.

ముఖ్యమంత్రి చంద్రబాబు నాయుడు నాయకత్వంలోని కూటమి ప్రభుత్వం చేనేత రంగానికి ఆర్థిక ప్రయోజనాలు కల్పించడంతో పాటు చేనేత ఉత్పత్తుల విక్రయాలను పెంచేందుకు పలు కార్యక్రమాలు చేపడుతోందని మంత్రి చెప్పారు. అదే తరహాలో హస్తకళాకారులకు కూడా ఆర్థిక భరోసా కల్పించేందుకు ఈ శిక్షణ కార్యక్రమాలను చేపడుతున్నట్లు తెలిపారు.

రెండు రకాలుగా శిక్షణ 
రాష్ట్రంలోని వివిధ క్లస్టర్లలో ఉన్న హస్తకళాకారులకు ప్రధానంగా రెండు విధాలుగా శిక్షణ ఇవ్వనున్నారు. గురు-శిష్య హస్త శిల్ప్ ప్రశిక్షణ్ (GHPP) కార్యక్రమం ద్వారా రెండు నెలల పాటు శిక్షణ అందిస్తారు. డిజైన్ డెవలప్‌మెంట్ వర్క్‌షాప్స్ (DDW) ద్వారా నెల రోజుల పాటు శిక్షణ నిర్వహిస్తారు.

అయితే DDWలోని కొయ్యబొమ్మల తయారీకి సంబంధించిన శిక్షణను రెండు నెలల పాటు అందించనున్నారు. ఈ కార్యక్రమాల ద్వారా సంప్రదాయ నైపుణ్యాలను కాపాడుతూ వాటిని ఆధునిక మార్కెట్ అవసరాలకు అనుగుణంగా అభివృద్ధి చేయడంపై దృష్టి పెట్టనున్నారు.

200 మందికి శిక్షణ.. పనిముట్ల పంపిణీ 
GHPP కింద పలు ప్రత్యేక హస్తకళలపై కళాకారులకు శిక్షణ ఇవ్వనున్నారు. ఇందులో చెక్క బ్లాక్ తయారీ, కలంకారి బ్లాక్ ప్రింటింగ్, దుర్గి రాతి శిల్పం, అగరుబత్తి తయారీ, తాటి ఆకుల కళ, కొబ్బరి చిప్పల కళ, శ్రీకాళహస్తి కలంకారి తదితర కళలు ఉన్నాయి.

DDW కింద చెక్క శిల్పం, టెర్రకోట బొమ్మలు, లేస్, హ్యాండ్‌మేడ్ నిటెడ్ గూడ్స్, అల్లగడ్డ రాతి శిల్పం, శ్రీకాళహస్తి కలంకారి, వెదురు-చెరకు కళలు, సవర గిరిజన చిత్రకళ, బొబ్బిలి వీణ, ఇమిటేషన్ జ్యువెలరీ వంటి కళారూపాల తయారీపై శిక్షణ ఇవ్వనున్నారు.

అనంతపురం, పల్నాడు, అనకాపల్లి క్లస్టర్లకు చెందిన 200 మంది కళాకారులకు ప్రత్యేక శిక్షణతో పాటు ఆధునిక పనిముట్లు అందించనున్నారు. ఒక్కో క్లస్టర్ నుంచి 50 మంది చొప్పున ఎంపిక చేసి శిక్షణ ఇవ్వనున్నారు.

వీరికి అరటి ఫైబర్, చెరకు-వెదురు, వుడ్ టర్నింగ్, ల్యాకర్‌వేర్, దుర్గి రాతి శిల్పం వంటి కళల్లో శిక్షణ అందించడంతో పాటు Improved Tool Kit Distribution Programme (ITDP) కింద పనిముట్లు పంపిణీ చేయనున్నారు.

15కుపైగా జిల్లాల కళాకారులకు ప్రయోజనం 
ఈ శిక్షణ కార్యక్రమాలు రాష్ట్రంలోని పలు జిల్లాల్లోని హస్తకళాకారులకు ఉపయోగపడనున్నాయి. కృష్ణా, గుంటూరు, ఎన్టీఆర్, అనకాపల్లి, డాక్టర్ బీఆర్ అంబేద్కర్ కోనసీమ, తిరుపతి, అన్నమయ్య, చిత్తూరు, తూర్పుగోదావరి, నంద్యాల, అల్లూరి సీతారామరాజు, పార్వతీపురం మన్యం, విజయనగరం, అనంతపురం, పల్నాడు తదితర జిల్లాల కళాకారులకు ఈ కార్యక్రమాల ద్వారా ప్రయోజనం కలగనుంది.

ప్రాంతాల ప్రత్యేకతను కాపాడుతూనే అక్కడి కళాకారుల నైపుణ్యాన్ని ఆధునిక అవసరాలకు అనుగుణంగా తీర్చిదిద్దేందుకు క్లస్టర్ల వారీగా శిక్షణ నిర్వహించనున్నారు.

సంప్రదాయ హస్తకళలకు జాతీయ స్థాయిలో మరింత గుర్తింపు తీసుకురావడంతో పాటు కళాకారుల ఆదాయాన్ని పెంచడమే ప్రభుత్వ ప్రధాన లక్ష్యమని మంత్రి సవిత తెలిపారు.

సంప్రదాయ కళలను కాపాడటం మాత్రమే కాకుండా వాటికి ఆధునిక డిజైన్లను జోడించడం, మెరుగైన శిక్షణ ఇవ్వడం, నాణ్యమైన పనిముట్లు అందించడం ద్వారా కళాకారులకు ఆర్థికంగా అండగా నిలవాలని ప్రభుత్వం భావిస్తోందన్నారు.

హస్తకళల తయారీని కేవలం వారసత్వ వృత్తిగా కాకుండా ఉపాధి, ఆదాయాన్ని అందించే స్థిరమైన అవకాశంగా మార్చేందుకు ఈ కార్యక్రమాలు దోహదపడతాయని పేర్కొన్నారు. త్వరలోనే శిక్షణ కార్యక్రమాలకు సంబంధించిన పూర్తి వివరాలను వెల్లడిస్తామని మంత్రి సవిత తెలిపారు.

సంప్రదాయ కళకు ఆధునిక రూపం.. కళాకారుడి చేతికి నైపుణ్యం.. కుటుంబానికి మెరుగైన ఆదాయం అనే లక్ష్యంతో ఈ కార్యక్రమాలను ముందుకు తీసుకెళ్లనున్నట్లు ఆమె స్పష్టం చేశారు.