Chandrababu: రాష్ట్రంలో నిరంతరం 'జలధార-జలహారతి - సీఎం చంద్రబాబు!

• ఎల్ నినో భయాల వేళ సీఎం చంద్రబాబు బిగ్ డెసిషన్!.. నీటి సంరక్షణపై అధికారులకు సంచలన ఆదేశాలు!..

• రాష్ట్రంలో నిరంతరం 'జలధార-జలహారతి'!.. నీటి ఎద్దడికి చెక్ పెట్టేందుకు సీఎం వేసిన మాస్టర్ ప్లాన్ ఇదే!

Chandrababu: ఆంధ్రప్రదేశ్ వ్యాప్తంగా ఎల్ నినో (El Nino) ప్రభావం వల్ల భవిష్యత్తులో వర్షాభావ పరిస్థితులు ఎదురైనా తాగునీరు, సాగునీటి కొరత రాకుండా ముందస్తు చర్యలు చేపట్టాలని ముఖ్యమంత్రి నారా చంద్రబాబు నాయుడు ఆదేశించారు. జలవనరుల నిర్వహణపై సచివాలయంలో ఉన్నతాధికారులతో సమీక్ష నిర్వహించిన ఆయన, నీటి సంరక్షణ, భూగర్భ జలాల పెంపే ధ్యేయంగా'జలధార' మరియు 'జలహారతి' కార్యక్రమాలను ఏడాది పొడవునా నిరంతరం నిర్వహించాలని స్పష్టం చేశారు.

రాష్ట్రంలో ప్రతి నీటి బొట్టునూ సమర్థవంతంగా సద్వినియోగం చేసుకోవాలని సీఎం చంద్రబాబు అధికారులకు దిశానిర్దేశం చేశారు. వాతావరణంలో సంభవిస్తున్న మార్పులు, ఎల్ నినో పరిస్థితుల వల్ల నీటి కొరత ఏర్పడే ప్రమాదం ఉందన్న హెచ్చరికల నేపథ్యంలో చెరువులు, కుంటలు, నీటి నిల్వ జలాశయాలను ముందస్తుగానే వర్షపు నీటితో నింపాలని సూచించారు. వర్షపాతం తక్కువగా నమోదయ్యే ప్రాంతాలలో నీటి లభ్యతను పెంచేందుకు సమగ్ర ప్రణాళికతో ముందుకు వెళ్లాలని పేర్కొన్నారు.

భూగర్భ జలమట్టాలను పెంచేందుకు రీఛార్జ్ వెల్స్ (రైన్ వాటర్ హార్వెస్టింగ్) నిర్మాణం, చెక్‌డ్యామ్‌ల మరమ్మతులు మరియు నీటి నిల్వ నిర్మాణాలను వేగవంతం చేయాలని అధికారులను ఆదేశించారు. ప్రతి గ్రామంలో పాత చెరువుల పూడికతీత పనులను ఉపాధి హామీ పథకంతో అనుసంధానించి పూర్తి చేయాలని, నీటి వృథాను అరికట్టేందుకు ఆధునిక సాంకేతిక పరిజ్ఞానాన్ని, మైక్రో ఇరిగేషన్‌ను విస్తృతంగా ఉపయోగించుకోవాలని సీఎం తెలిపారు.

'జలహారతి' కార్యక్రమం ద్వారా నీటి సంరక్షణపై ప్రజల్లో, రైతుల్లో చైతన్యం తీసుకురావాలని సీఎం పిలుపునిచ్చారు. నదులు, కాలువలు, జలాశయాలలో ప్రాజెక్టుల నిర్వహణను మెరుగుపరచి, చివరి ఆయకట్టు వరకు సాగునీరు అందేలా చర్యలు తీసుకోవాలన్నారు. వర్షాభావ పరిస్థితులు ఎదురైనా సరే, రాష్ట్రంలో వ్యవసాయానికి మరియు తాగునీటి అవసరాలకు ఎలాంటి ఇబ్బందులు తలెత్తకుండా జలవనరుల శాఖ నిరంతరం అప్రమత్తంగా ఉండాలని ముఖ్యమంత్రి స్పష్టం చేశారు.