ఉద్యోగుల సంక్షేమమే సంస్థ బలానికి మూలం అన్న నమ్మకంతో అనేక మంది నాయకులు, నిర్వాహకులు పండుగలు మరియు ప్రత్యేక సందర్భాల్లో తమ సిబ్బందికి ఆప్యాయతను వ్యక్తం చేస్తుంటారు. ఆ దిశగా నూతన సంవత్సరాన్ని పురస్కరించుకుని మంగళగిరి లోని తెలుగుదేశం పార్టీ కేంద్ర కార్యాలయంలో, డిసెంబర్ 31, 2025న మాజీ ఎమ్మెల్సీ పరుచూరి అశోక్ బాబు ఆధ్వర్యంలో అక్కడ పని చేస్తున్న హౌస్ కీపింగ్ మరియు సెక్యూరిటీ సిబ్బందికి చిరు కానుకలు పంపిణీ చేశారు.
ఈ సందర్భంగా సిబ్బంది కుటుంబ అవసరాలను దృష్టిలో ఉంచుకుని ఇంట్లో రోజువారీగా ఉపయోగించే సరుకులతో కూడిన ప్యాకెట్లను అందజేశారు. నూనె, కందిపప్పు, పంచదార తదితరంగా మొత్తం తొమ్మిది రకాల నిత్యావసర వస్తువులు ఈ కానుకల్లో ఉండటం విశేషం. ఉద్యోగుల శ్రమకు గౌరవం చెల్లించడమే లక్ష్యంగా ఈ కార్యక్రమాన్ని నిర్వహించినట్లు వారు తెలిపారు.
ఈ కార్యక్రమంలో మాజీ ఎమ్మెల్సీ అశోక్ బాబు తో పాటు ఎన్నారై టీడీపీ సెల్ కోఆర్డినేటర్ చప్పిడి రాజశేఖర్, తెలుగు యువత అధికార ప్రతినిధి బండారు వంశీ కృష్ణ, పీఆర్కే ఫౌండేషన్ ఛైర్మన్ పారా రామకృష్ణ, లాయర్ పారా కిశోర్, టీడీపీ ప్రోగ్రామ్స్ కమిటీ ఇంచార్జి రాంబాబు, అసెంబ్లీ కోఆర్డినేటర్ దామోదర్ రాజు తదితర ప్రముఖులు పాల్గొన్నారు.
నూతన సంవత్సర వేళ ఈ విధమైన ఆత్మీయతను పొందినందుకు కార్యాలయ సిబ్బంది సభ్యులు ఎంతో ఆనందం వ్యక్తం చేశారు. తమపై చూపిన శ్రద్ధకు, సహాయానికి కృతజ్ఞతలు తెలుపుతూ, ఇది తమకు మరింత ఉత్సాహాన్ని ఇచ్చిందని వారు పేర్కొన్నారు.
