దేశవ్యాప్తంగా నిరుద్యోగ యువతకు భారత తపాలా శాఖ భారీ శుభవార్త చెప్పేందుకు సిద్ధమవుతోంది. కేంద్ర ప్రభుత్వ పరిధిలో పనిచేసే భారత తపాలా మంత్రిత్వ శాఖ 2026లో భారీ సంఖ్యలో ఉద్యోగాల భర్తీకి ఏర్పాట్లు చేస్తోంది. ప్రతి ఏడాది వేలాది మంది యువతకు ఉపాధి కల్పిస్తున్న పోస్టల్ డిపార్ట్మెంట్, వచ్చే ఏడాదిలో కూడా పెద్ద నోటిఫికేషన్ను విడుదల చేయనుంది. మొత్తం 30 వేలకుపైగా ఉద్యోగాల భర్తీకి నోటిఫికేషన్ వెలువడనున్నట్లు సమాచారం. ముఖ్యంగా గ్రామీణ యువతకు ఇది ఒక గొప్ప అవకాశంగా మారనుంది. కేంద్ర ప్రభుత్వ ఉద్యోగం కావడంతో స్థిరమైన ఉద్యోగ భద్రత, మంచి జీతభత్యాలు లభించనున్నాయి.
ఈ భారీ నియామకాలలో భాగంగా గ్రామీణ డాక్ సేవక్ (GDS) పోస్టుల భర్తీకి సంబంధించిన అధికారిక నోటిఫికేషన్ను జనవరి 15, 2026న విడుదల చేయనున్నట్లు తపాలా శాఖ వర్గాలు వెల్లడించాయి. ఈ నోటిఫికేషన్ కింద నాన్-బ్రాంచ్ పోస్టాఫీసుల్లో ఖాళీగా ఉన్న పోస్టులను భర్తీ చేస్తారు. ఇందులో బ్రాంచ్ పోస్ట్ మాస్టర్ (BPM), అసిస్టెంట్ బ్రాంచ్ పోస్ట్ మాస్టర్ (ABPM), పోస్ట్మ్యాన్ వంటి కీలక పోస్టులు ఉన్నాయి. గ్రామ స్థాయి సేవలను బలోపేతం చేయడమే లక్ష్యంగా ఈ నియామకాలు చేపడుతున్నారు. మొత్తం పోస్టుల సంఖ్య 30,000 వరకు ఉండొచ్చని అంచనా.
ఈ ఉద్యోగాలకు దరఖాస్తు చేసుకునే అభ్యర్థులు 18 నుంచి 40 ఏళ్ల మధ్య వయస్సు కలిగి ఉండాలి. అయితే ప్రభుత్వ నిబంధనల ప్రకారం రిజర్వేషన్ వర్గాలకు వయోపరిమితిలో సడలింపు ఉంటుంది. షెడ్యూల్డ్ కులం (SC), షెడ్యూల్డ్ తెగ (ST) అభ్యర్థులకు 5 సంవత్సరాలు, ఇతర వెనుకబడిన తరగతులకు (OBC) 3 సంవత్సరాలు, వికలాంగులకు 10 సంవత్సరాల వయో సడలింపు వర్తిస్తుంది. ముఖ్యంగా ఈ ఉద్యోగాలకు ఎలాంటి రాత పరీక్ష ఉండదు. కేవలం పదో తరగతిలో సాధించిన మార్కుల ఆధారంగా మెరిట్ జాబితా రూపొందించి ఎంపిక చేస్తారు. స్థానిక భాష చదవడం, రాయడం, మాట్లాడడం తెలిసి ఉండాలి. అలాగే బైక్ లేదా సైకిల్ నడపడం తప్పనిసరి అర్హతగా పేర్కొన్నారు.
దరఖాస్తు ప్రక్రియ పూర్తిగా ఆన్లైన్లో జరుగుతుంది. అభ్యర్థులు భారత తపాలా శాఖ అధికారిక వెబ్సైట్ ద్వారా దరఖాస్తు చేసుకోవాలి. దరఖాస్తు సమయంలో విద్యా అర్హత సర్టిఫికెట్లు, కుల ధృవీకరణ పత్రం, ఫోటో, సంతకం, మొబైల్ నంబర్ వంటి వివరాలు నమోదు చేయాల్సి ఉంటుంది. షెడ్యూల్డ్ కులం, షెడ్యూల్డ్ తెగ, వికలాంగులు, ట్రాన్స్జెండర్ వర్గాలకు చెందిన అభ్యర్థులు ఎలాంటి దరఖాస్తు రుసుము చెల్లించాల్సిన అవసరం లేదు. జనరల్ వర్గానికి చెందిన వారు రూ.100 ఫీజు చెల్లించాలి. పూర్తి వివరాలు అధికారిక నోటిఫికేషన్ విడుదలైన తర్వాత వెల్లడించనున్నారు.
