అమెరికా గ్రీన్ కార్డు మరింత ఖరీదు.. EB-5 వీసా ఫీజులు భారీగా పెంపు!

అమెరికా గ్రీన్ కార్డు కోసం పెట్టుబడి పెడుతున్నారా? EB-5 ఫీజులు భారీగా పెరగనున్నాయి..

భారతీయ పెట్టుబడిదారులకు షాక్.. EB-5 వీసా ఫీజులను భారీగా పెంచిన అమెరికా..

అమెరికాలో శాశ్వత నివాసం కోసం ప్రయత్నిస్తున్న విదేశీయులకు EB-5 ఇన్వెస్టర్ వీసా మార్గం ఇకపై మరింత ఖరీదుగా మారనుంది. ముఖ్యంగా పెట్టుబడుల ద్వారా అమెరికా గ్రీన్ కార్డు పొందాలని భావిస్తున్న భారతీయ పెట్టుబడిదారులు, కుటుంబాలపై కొత్త ఫీజుల భారం పడనుంది. యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) EB-5 కార్యక్రమానికి సంబంధించిన పలు దరఖాస్తుల ఫీజులను భారీగా పెంచుతూ నిర్ణయం తీసుకుంది. కొత్త ఫీజులు నవంబర్ 30, 2026 నుంచి అమల్లోకి రానున్నాయి.

1990లో ప్రారంభమైన EB-5 ప్రోగ్రామ్

అమెరికా ఆర్థిక వ్యవస్థలో విదేశీ పెట్టుబడులను ప్రోత్సహించడం, స్థానికంగా ఉద్యోగాల కల్పనకు ఊతమివ్వడం లక్ష్యంగా 1990లో EB-5 ఇన్వెస్టర్ వీసా కార్యక్రమాన్ని ప్రారంభించారు. ఈ పథకం ద్వారా అర్హత కలిగిన విదేశీ పెట్టుబడిదారులు అమెరికాలోని వాణిజ్య సంస్థల్లో నిర్దిష్ట మొత్తాన్ని పెట్టుబడిగా పెట్టాలి. అలాగే కనీసం 10 మంది అమెరికా కార్మికులకు పూర్తికాల ఉద్యోగాలు కల్పించే నిబంధన ఉంది.

ప్రస్తుతం సాధారణ అర్హత కలిగిన వ్యాపారంలో కనీస పెట్టుబడి మొత్తం 1.05 మిలియన్ డాలర్లు. టార్గెటెడ్ ఎంప్లాయ్‌మెంట్ ఏరియా (TEA) లేదా అర్హత కలిగిన ఇన్‌ఫ్రాస్ట్రక్చర్ ప్రాజెక్టులో పెట్టుబడి పెడితే కనీస మొత్తం 8 లక్షల డాలర్లుగా ఉంది.

ఈ పెట్టుబడి, ఉద్యోగాల కల్పనకు సంబంధించిన నిబంధనలను పూర్తి చేసిన పెట్టుబడిదారుడు, వారి జీవిత భాగస్వామి, అర్హత కలిగిన పిల్లలు గ్రీన్ కార్డు కోసం దరఖాస్తు చేసుకునే అవకాశం ఉంటుంది.

ఏ ఫీజు ఎంత పెరిగింది?

USCIS తాజా నిర్ణయంతో EB-5కు సంబంధించిన కీలక ఫారాల ఫైలింగ్ ఫీజులు గణనీయంగా పెరిగాయి. సాధారణ పెట్టుబడిదారులు దాఖలు చేసే Form I-526 ఫీజు ప్రస్తుతం 3,675 డాలర్ల నుంచి 7,615 డాలర్లకు పెరగనుంది. అంటే దాదాపు రెట్టింపు కంటే ఎక్కువ.

రీజనల్ సెంటర్ ద్వారా పెట్టుబడి పెట్టే వారు దాఖలు చేసే Form I-526E ఫీజు 3,675 డాలర్ల నుంచి 7,850 డాలర్లకు పెరగనుంది. ఈ రెండు ఫారాలకు అదనంగా 75 డాలర్ల టెక్నాలజీ ఫీజు కూడా చెల్లించాల్సి ఉంటుంది.

షరతులతో కూడిన గ్రీన్ కార్డు స్థితిని తొలగించేందుకు దాఖలు చేసే Form I-829 ఫీజు 3,750 డాలర్ల నుంచి 5,000 డాలర్లకు పెరగనుంది.

రీజనల్ సెంటర్లకు సంబంధించిన ఫీజుల్లోనూ భారీ మార్పులు చోటుచేసుకున్నాయి. Form I-956 ఫీజు 17,795 డాలర్ల నుంచి ఏకంగా 44,115 డాలర్లకు చేరనుంది. అదే విధంగా పెట్టుబడి ప్రాజెక్టు ఆమోదానికి ఉపయోగించే Form I-956F ఫీజు 17,795 డాలర్ల నుంచి 42,675 డాలర్లకు పెరగనుంది. అయితే అన్ని ఫీజులూ పెరగలేదు. Form I-956G వార్షిక ఫీజును USCIS 3,035 డాలర్ల నుంచి 2,165 డాలర్లకు తగ్గించింది.

ఫీజులు ఎందుకు పెంచుతున్నారంటే..

ఫీజుల పెంపుపై USCIS తన ప్రకటనలో వివరణ ఇచ్చింది. తమ ఏజెన్సీకి ప్రధానంగా దరఖాస్తుదారులు చెల్లించే ఫీజుల ద్వారానే నిధులు సమకూరుతున్నాయని తెలిపింది. దరఖాస్తుల పరిశీలన, నేపథ్య తనిఖీలు, అర్హత నిర్ధారణ, మోసాలను గుర్తించడం, కార్యక్రమ నిర్వహణ వంటి ప్రక్రియలకు అయ్యే వ్యయాలను భర్తీ చేయడానికి ఫీజుల సవరణ అవసరమైందని పేర్కొంది.

భారతీయ పెట్టుబడిదారులపై అదనపు భారం

గత దశాబ్ద కాలంలో భారత్ నుంచి EB-5 వీసాకు డిమాండ్ గణనీయంగా పెరిగింది. అమెరికాలో పెట్టుబడి పెట్టడంతో పాటు కుటుంబంతో కలిసి శాశ్వత నివాసానికి అవకాశం ఉండటంతో భారతీయ పెట్టుబడిదారులు ఈ కార్యక్రమంపై ఆసక్తి చూపుతున్నారు.

దరఖాస్తుల సంఖ్య పెరగడంతో గ్రీన్ కార్డు కోసం వేచి ఉండే సమయం కూడా ప్రభావితమైంది. ఇప్పుడు దరఖాస్తు ఫీజులు భారీగా పెరగడంతో ఇప్పటికే పెద్ద మొత్తంలో పెట్టుబడి పెట్టాల్సిన భారతీయులకు అదనంగా ప్రభుత్వ ఫీజుల భారం కూడా పెరగనుంది.

అమెరికా గ్రీన్ కార్డు కోసం EB-5 మార్గాన్ని పరిశీలిస్తున్న వారు పెట్టుబడి మొత్తంతో పాటు ఫైలింగ్ ఫీజులు, ఇతర ప్రభుత్వ ఛార్జీలు, ప్రాజెక్టు సంబంధిత ఖర్చులు వంటి అంశాలను కూడా ముందుగానే పరిగణనలోకి తీసుకోవాల్సిన పరిస్థితి ఏర్పడింది. కొత్త ఫీజులు నవంబర్ 30, 2026 నుంచి అమల్లోకి రానున్న నేపథ్యంలో దరఖాస్తుదారులు తాజా USCIS నిబంధనలను పరిశీలించి నిర్ణయం తీసుకోవడం ముఖ్యం.