మాస్ హీరో బాలయ్య సత్తా అంతర్జాతీయ స్థాయిలో! ట్రంపుకి కౌంటర్ గా ఇరాన్ అఫీషియల్ వీడియో!

• గ్లోబల్ పాలిటిక్స్‌లోకి 'టాలీవుడ్' మాస్ పంచ్: డోనాల్డ్ ట్రంప్‌నకు బాలయ్య వీడియోతో ఇరాన్ కౌంటర్!
  
  
• USA: ఇది బాలీవుడ్ కాదు.. పక్కా టాలీవుడ్.. గర్వపడుతున్న తెలుగు ఫ్యాన్స్...

Iran war: తెలుగు సినిమా ఖ్యాతి అంతర్జాతీయ సరిహద్దులను దాటి ఎల్లలు దాటుతోంది. ఒకప్పుడు ప్రాంతీయ ఆడియన్స్‌కే పరిమితమైన మన మాస్ డైలాగులు, అదిరిపోయే యాక్షన్ బ్లాక్స్ ఇప్పుడు అంతర్జాతీయ దౌత్య సంబంధాల వేదికగా మారడం అందరినీ ఆశ్చర్యపరుస్తోంది. నందమూరి బాలకృష్ణ నటించిన ‘భగవంత కేసరి’ సినిమాలోని ఒక మాస్ యాక్షన్ సీక్వెన్స్ ద్వారా అగ్రరాజ్యం అధినేత డోనాల్డ్ ట్రంప్‌నకు ఇరాన్ రాయభార కార్యాలయం కౌంటర్ ఇవ్వడం ప్రస్తుతం సోషల్ మీడియాలో సంచలనంగా మారింది.

ఐక్యరాజ్యసమితిలో ట్రంప్ వ్యాఖ్యలు.. వివాదానికి బీజం
ఇటీవల ఐక్యరాజ్యసమితి జనరల్ అసెంబ్లీ (UNGA) వేదికగా అమెరికా మాజీ అధ్యక్షుడు డోనాల్డ్ ట్రంప్ ఇరాన్‌ను ఉద్దేశించి తీవ్రమైన హెచ్చరికలు జారీ చేశారు. అంతర్జాతీయ ఒప్పందాల విషయంలో ఇరాన్ వెనక్కి తగ్గకపోతే తీవ్ర పరిణామాలు ఉంటాయని, ఇప్పటికే ఆ దేశాన్ని ఆర్థికంగా ఒంటరి చేశామని స్పష్టం చేశారు. ట్రంప్ చేసిన ఈ వ్యాఖ్యలు ప్రపంచవ్యాప్తంగా దౌత్యపరమైన దుమారాన్ని రేపాయి.

ఇరాన్ రాయభార కార్యాలయం వినూత్న పంచ్..
ట్రంప్ హెచ్చరికలకు బదులిచ్చే క్రమంలో జింబాబ్వేలోని ఇరాన్ ఎంబసీ (Iran Embassy in Zimbabwe) సరికొత్త మార్గాన్ని ఎంచుకుంది. సాధారణంగా రాజనీతిజ్ఞులు అధికారిక ప్రకటనలు విడుదల చేస్తుంటారు, కానీ ఇరాన్ ఎంబసీ మాత్రం బాలకృష్ణ నటించిన 'భగవంత కేసరి' చిత్రంలోని 58 సెకండ్ల యాక్షన్ సీక్వెన్స్‌ను తమ అధికారిక సామాజిక మాధ్యమాల్లో షేర్ చేసింది.

వ్యంగ్యాస్త్రాలు: "ఇరాన్‌ను పూర్తిగా నాశనం చేయడం గురించి ట్రంప్ మాట్లాడుతున్నారు. అయితే ఇరాన్ తనను తాను కాపాడుకోలేని నిస్సహాయ దేశం కాదనే విషయం వారికి తెలుసు. ఆ నిజాన్ని గ్రహించినప్పటి నుంచే వారు హాలీవుడ్ చూడటం మానేసి, భారతీయ సినిమాలు చూడటం మొదలుపెట్టారు" అంటూ ఇరాన్ ఎంబసీ ట్రంప్‌పై విరుచుకుపడింది.

'ఇది బాలీవుడ్ కాదు.. పక్కా టాలీవుడ్': గర్వపడుతున్న తెలుగు ఫ్యాన్స్...
ఇరాన్ రాయభార కార్యాలయం ఈ వీడియోను పోస్ట్ చేస్తూ, దానిని ఒక 'బాలీవుడ్' సినిమాగా పేర్కొనడంతో నెటిజన్ల నుంచి విశేష స్పందన వచ్చింది. ఈ పోస్ట్ నిమిషాల్లో వైరల్ కావడంతో తెలుగు సినీ అభిమానులు కామెంట్లలో దండయాత్ర చేశారు.

"ఇది బాలీవుడ్ కాదు, పక్కా టాలీవుడ్! అక్కడున్నది మన నటసింహం నందమూరి బాలకృష్ణ" అంటూ గర్వంగా స్పందిస్తూ పోస్టును సరిదిద్దారు. అంతర్జాతీయ పొలిటికల్ సెటైర్‌లో మన తెలుగు సినిమా సీన్ నిలవడం నిజంగా విశేషమని విశ్లేషకులు భావిస్తున్నారు.

దర్శకుడు అనిల్ రావిపూడి తెరకెక్కించిన 'భగవంత కేసరి' చిత్రం 2023లో విడుదలవు బాక్సాఫీస్ వద్ద 100 కోట్లకు పైగా వసూళ్లు సాధించింది. శ్రీలీల, కాజల్ అగర్వాల్, అర్జున్ రాంపాల్ నటించిన ఈ చిత్రం, తమన్ సంగీతంతో అప్పట్లో భారీ విజయాన్ని అందుకుంది. కానీ ఈ స్థాయిలో గ్లోబల్ పొలిటికల్ మీమ్‌గా మారడం మాత్రం ఒక సరికొత్త రికార్డు అని చెప్పవచ్చు.