అమెరికాలో స్థిరపడాలన్న కలలతో హెచ్–1బీ (H-1B) వీసాకు దరఖాస్తు చేసుకునే విదేశీ నిపుణులకు ట్రంప్ ప్రభుత్వం మరోసారి పెద్ద షాక్ ఇచ్చింది. కొత్త హెచ్–1బీ వీసా దరఖాస్తులపై ఏకంగా 1 లక్ష డాలర్లు (భారత కరెన్సీలో సుమారు రూ.85 లక్షలు) ఫీజుగా వసూలు చేయడానికి ఫెడరల్ కోర్టు అనుమతి ఇచ్చింది. ఈ భారీ ఫీజు పెంపును వ్యతిరేకిస్తూ యూఎస్ ఛాంబర్ ఆఫ్ కామర్స్ దాఖలు చేసిన పిటిషన్ను ఫెడరల్ న్యాయమూర్తి బెరిల్ హోవెల్ తిరస్కరించారు. జాతీయ భద్రత, ఆర్థిక ప్రయోజనాల పరిరక్షణ దృష్ట్యా ఇలాంటి విధాన నిర్ణయాలు తీసుకునే పూర్తి అధికారం అధ్యక్షుడికే ఉందని కోర్టు స్పష్టం చేసింది.
ప్రస్తుతం హెచ్–1బీ వీసాకు దరఖాస్తు ఫీజులు 2,000 డాలర్ల నుంచి 5,000 డాలర్ల మధ్యలోనే ఉన్నాయి. అయితే వాటిని ఒక్కసారిగా లక్ష డాలర్ల వరకు పెంచడం వల్ల అమెరికాలోని చిన్న, మధ్యతరహా ఐటీ సంస్థలు తీవ్ర ఇబ్బందులు ఎదుర్కొనే అవకాశముందని నిపుణులు హెచ్చరిస్తున్నారు. విదేశీ టెక్నికల్ టాలెంట్ను నియమించుకోవడం చిన్న కంపెనీలకు అసాధ్యంగా మారుతుందని వాణిజ్య మండళ్లు ఆందోళన వ్యక్తం చేస్తున్నాయి. మరోవైపు, అమెరికా పౌరులకు ఉద్యోగాల్లో ప్రాధాన్యం ఇవ్వాలన్న ట్రంప్ ప్రభుత్వం లక్ష్యానికి ఈ నిర్ణయం అనుకూలంగా మారిందని విశ్లేషకులు చెబుతున్నారు.
ఫీజుల పెంపుతో పాటు హెచ్–1బీ వీసాల ఎంపిక విధానంలోనూ కీలక మార్పులు తీసుకురానున్నారు. ఇప్పటివరకు అమలులో ఉన్న లాటరీ విధానాన్ని పూర్తిగా రద్దు చేసి, దాని స్థానంలో వెయిటెడ్ సెలక్షన్ మోడల్ను ప్రవేశపెట్టనున్నారు. ఇకపై అత్యధిక నైపుణ్యాలు కలిగి, అధిక వేతనం పొందే అభ్యర్థులకే వీసాలు దక్కేలా ఈ విధానం రూపొందించబడుతోంది. ఈ కొత్త నిబంధనలు 2026 ఫిబ్రవరి 26 నుంచి అమల్లోకి రానున్నట్లు ప్రభుత్వం ప్రకటించింది.
ఈ కోర్టు తీర్పుపై అమెరికా ఐటీ కంపెనీలు తీవ్ర అసంతృప్తిని వ్యక్తం చేస్తున్నాయి. ఈ నిర్ణయాల వల్ల అమెరికా టెక్నాలజీ రంగం గ్లోబల్ పోటీలో వెనుకబడే ప్రమాదం ఉందని హెచ్చరిస్తున్నాయి. ఫీజుల పెంపు వల్ల ప్రతిభావంతులైన విదేశీ నిపుణులు ఇతర దేశాల వైపు మళ్లే అవకాశం ఉందని అభిప్రాయపడుతున్నాయి. ఈ తీర్పును సవాల్ చేస్తూ పైకోర్టుకు వెళ్లేందుకు పలు సంస్థలు సిద్ధమవుతున్నాయి. డెమొక్రటిక్ పాలిత రాష్ట్రాలు, కార్మిక సంఘాలు కూడా ఈ నిర్ణయానికి వ్యతిరేకంగా నిలవడంతో, ఈ వివాదం చివరకు అమెరికా సుప్రీంకోర్టుకు చేరే అవకాశముందని న్యాయ నిపుణులు అంచనా వేస్తున్నారు.
