భవిష్యత్లో ఎదురయ్యే యుద్ధ పరిస్థితులను సమర్థంగా ఎదుర్కొనేందుకు భారత సైన్యం పూర్తి స్థాయిలో సిద్ధంగా ఉందని ఆర్మీ చీఫ్ జనరల్ ఉపేంద్ర ద్వివేది స్పష్టం చేశారు. కాలం వేగంగా మారుతున్న నేపథ్యంలో యుద్ధాల స్వరూపం కూడా మారుతోందని, అందుకే సైన్యం కూడా ఆ మార్పులకు అనుగుణంగా తన ఆలోచనా విధానాన్ని, నిర్మాణాన్ని, శిక్షణను మార్చుకుంటోందని ఆయన తెలిపారు. రాజస్థాన్ రాజధాని జైపుర్లో ఘనంగా నిర్వహించిన 78వ ఆర్మీ డే పరేడ్ అనంతరం మీడియాతో మాట్లాడిన ఆయన, భారత సైన్యం భవిష్యత్ సవాళ్లను ముందుగానే అంచనా వేసుకుని ప్రణాళికాబద్ధంగా ముందుకు సాగుతోందని అన్నారు.
గత కొన్ని సంవత్సరాలుగా భారత సైన్యంలో స్పష్టమైన పరివర్తన కనిపిస్తోందని ఆర్మీ చీఫ్ చెప్పారు. కేవలం ప్రస్తుత భద్రతా సవాళ్లపైనే కాకుండా, రాబోయే దశాబ్దాల్లో ఎదురయ్యే యుద్ధాలకు కూడా సిద్ధమయ్యేలా సైన్యాన్ని తీర్చిదిద్దుతున్నామని వివరించారు. ఈ దిశగా సైన్యంలో కొత్త యూనిట్లు ఏర్పాటు చేసి, వాటికి ఆధునిక ఆయుధాలు, సాంకేతిక పరికరాలు అందిస్తూ ప్రత్యేక శిక్షణ ఇస్తున్నట్లు వెల్లడించారు. భైరవ్ బెటాలియన్, అశనీ ప్లాటూన్లు, శక్తిమాన్ రెజిమెంట్, దివ్యాస్త్ర బ్యాటరీ వంటి కొత్త యూనిట్లు ఇందుకు ఉదాహరణగా పేర్కొన్నారు. ఇవన్నీ వేగంగా స్పందించే, మిషన్ ఆధారిత బలగాలుగా పనిచేస్తాయని ఆయన చెప్పారు.
యుద్ధాల కాలవ్యవధి ఎలా ఉంటుందో ముందుగా చెప్పలేమని ఉపేంద్ర ద్వివేది వ్యాఖ్యానించారు. కొన్ని యుద్ధాలు సంవత్సరాల పాటు సాగవచ్చని, మరికొన్ని తక్కువ సమయంలోనే ముగిసే అవకాశముంటుందని తెలిపారు. ఇటీవలి అంతర్జాతీయ యుద్ధాల నుంచి భారత సైన్యం ఎన్నో పాఠాలు నేర్చుకుందని, సాంకేతికత కీలక పాత్ర పోషిస్తున్నప్పటికీ, చివరికి యుద్ధరంగంలో నిర్ణయం తీసుకునేది సైనికుడేనని ఆయన స్పష్టం చేశారు. అందుకే సైనికుడిని కేంద్రంగా ఉంచుకుని సాంకేతికతను వినియోగిస్తున్నామని చెప్పారు.
స్వదేశీ ఆయుధాల ప్రాధాన్యంపై కూడా ఆర్మీ చీఫ్ ప్రత్యేకంగా మాట్లాడారు. భారతదేశంలోనే తయారైన ఆయుధ వ్యవస్థలు, పరికరాలు ఇకపై ఒక లక్ష్యం మాత్రమే కాకుండా వ్యూహాత్మక అవసరంగా మారాయని తెలిపారు. స్వదేశీకరణ వల్ల సైన్యానికి స్వేచ్ఛ, దీర్ఘకాలిక విశ్వసనీయత, నిరంతర సరఫరా వంటి ప్రయోజనాలు కలుగుతాయని వివరించారు. సైనిక అవసరాల కోసం అభివృద్ధి చేసే మౌలిక వసతులు, సాంకేతికతలు దేశ అభివృద్ధికి కూడా ఉపయోగపడేలా ఉండాలని లక్ష్యంగా పెట్టుకున్నామని అన్నారు.
వచ్చే రెండు సంవత్సరాలను నెట్వర్కింగ్, డేటా ఆధారిత వ్యవస్థల అభివృద్ధికి అంకితం చేయనున్నట్లు ఉపేంద్ర ద్వివేది వెల్లడించారు. సైన్యంలో కమ్యూనికేషన్, సమాచార ప్రవాహం, విభాగాల మధ్య సమన్వయాన్ని మరింత బలోపేతం చేయడమే లక్ష్యమని చెప్పారు. సైన్యాన్ని ప్రజలకు మరింత దగ్గర చేయాలనే ఉద్దేశంతో ‘నో యువర్ ఆర్మీ’ మేళాలు, ‘శౌర్య సంధ్య’ వంటి కార్యక్రమాలు నిర్వహిస్తున్నామని తెలిపారు.
ఇదిలా ఉండగా జైపుర్లో నిర్వహించిన 78వ ఆర్మీ డే పరేడ్ అత్యంత ఘనంగా జరిగింది. తొలిసారిగా కంటోన్మెంట్ ప్రాంతం వెలుపల నిర్వహించిన ఈ కవాతుకు పెద్ద సంఖ్యలో ప్రజలు హాజరయ్యారు. పరేడ్లో బ్రహ్మోస్, ఆకాశ్ క్షిపణులు, అర్జున్ ట్యాంకులు, పినాక రాకెట్ వ్యవస్థలు, రోబో డాగ్స్ వంటి ఆధునిక ఆయుధాలను సైన్యం ప్రదర్శించింది. కొత్తగా ఏర్పాటు చేసిన భైరవ్ బెటాలియన్ ఈ పరేడ్లో పాల్గొనడం ప్రత్యేక ఆకర్షణగా నిలిచింది. పరేడ్ ప్రారంభంలో హెలికాప్టర్ల నుంచి పూల వర్షం కురిపించడం సైనిక దినోత్సవానికి మరింత వైభవాన్ని తీసుకొచ్చింది. భారత సైన్యం శక్తి సామర్థ్యాలకు ఈ వేడుకలు అద్దం పట్టాయని పలువురు అభిప్రాయపడ్డారు.
