Manali: రిమోట్ జాబ్ తో మనాలికి మకాం.. తెలియకుండానే నెలకు రూ.30 వేల పొదుపు చేసిన కార్పొరేట్ జంట!

రిమోట్ జాబ్తో ప్రశాంత జీవితం.. మనాలిలో భారీగా తగ్గిన నెలవారీ ఖర్చులు..

డబ్బు కోసం కాదు.. జీవనశైలి కోసం మారాం.. బోనస్గా రూ.30 వేల ఆదా..

నగర జీవితం అంటే అధిక ఖర్చులు, పరుగుల జీవితం, ఒత్తిడి అన్నీ సహజమే. అయితే ఒక కార్పొరేట్ జంట తీసుకున్న చిన్న నిర్ణయం వారి జీవనశైలినే మార్చడమే కాకుండా, ప్రతి నెలా వేల రూపాయల పొదుపును కూడా తీసుకొచ్చింది. ఆశ్చర్యకరమైన విషయం ఏమిటంటే.. డబ్బు ఆదా చేయాలనే ఉద్దేశంతో వారు ఈ నిర్ణయం తీసుకోలేదని చెబుతున్నారు.

అంజలి, నమన్ అనే దంపతులు ప్రస్తుతం హిమాచల్ ప్రదేశ్లోని మనాలిలో ఉంటూ తమ కార్పొరేట్ ఉద్యోగాలను రిమోట్ విధానంలో కొనసాగిస్తున్నారు. వీరిద్దరూ నిర్వహిస్తున్న ఇన్స్టాగ్రామ్ ఖాతా @anjali.aur.namanలో తమ అనుభవాన్ని పంచుకున్నారు. నగర జీవితానికి దూరంగా, ప్రశాంతంగా జీవించాలనే ఉద్దేశంతోనే మనాలికి వెళ్లామని, కానీ ఊహించని విధంగా ప్రతి నెలా రూ.30 వేలకుపైగా ఆదా అవుతోందని వారు వెల్లడించారు.

మనాలికి మారిన తర్వాత వారి ఇంటి అద్దె భారీగా తగ్గింది. నగరంలో నెలకు రూ.45 వేల అద్దె చెల్లించగా, మనాలిలో అదే రూ.28 వేలకు తగ్గడంతో నెలకు రూ.17 వేల వరకు ఆదా అవుతోంది.

అలాగే ప్రతిరోజూ కార్యాలయానికి వెళ్లాల్సిన అవసరం లేకపోవడంతో ప్రయాణ ఖర్చుల్లో నెలకు మరో రూ.3 వేల పొదుపు అవుతోంది. కార్యాలయ సహచరులతో బయట భోజనాలు, డిన్నర్లపై ఖర్చు చేసే సుమారు రూ.5 వేల ఖర్చు కూడా తగ్గిపోయింది. రోజూ కాఫీలు, చిన్న చిన్న స్నాక్స్ కోసం అయ్యే ఖర్చు కూడా లేకపోవడంతో మరో రూ.2,500 వరకు మిగులుతోంది.

అయితే తమకు అత్యంత ఆశ్చర్యం కలిగించిన విషయం వారాంతపు ఖర్చులేనని అంజలి చెప్పారు. నగరంలో ఉన్నప్పుడు ఒత్తిడి నుంచి బయటపడేందుకు ప్రతి నెలా రూ.5 వేల నుంచి రూ.6 వేల వరకు చిన్న చిన్న ట్రిప్లకు వెచ్చించేవారని, ఇప్పుడు మనాలిలోనే ప్రకృతి మధ్య జీవిస్తుండటంతో ఆ ఖర్చు పూర్తిగా తగ్గిపోయిందని తెలిపారు.

"డబ్బు ఆదా చేయాలనే ఉద్దేశంతో మేము రిమోట్ వర్క్ను ఎంచుకోలేదు. భిన్నమైన జీవనశైలిని అనుభవించాలని మాత్రమే మనాలికి వచ్చాం. డబ్బు ఆదా కావడం అదనపు లాభంగా మారింది" అని అంజలి వీడియోలో పేర్కొన్నారు. ఈ వీడియోకు "Saved ₹30,000 living in Manali" అనే క్యాప్షన్ను జత చేశారు.

ఈ వీడియో సోషల్ మీడియాలో పెద్ద చర్చకు దారితీసింది. నగర జీవన ఖర్చులు, రిమోట్ వర్క్ ప్రయోజనాలపై నెటిజన్లు తమ అభిప్రాయాలను వ్యక్తం చేస్తున్నారు.

ఒక నెటిజన్ స్పందిస్తూ, "మెట్రో నగరంలోనే పెరిగాను. మనాలిలాంటి ప్రశాంత ప్రాంతంలో సాయంత్రాలు చాలా నిశ్శబ్దంగా అనిపించవా? అప్పుడప్పుడూ ప్రశాంతత అవసరమే కానీ, జీవితాన్ని పూర్తిగా అక్కడికి మార్చుకోవడం అందరికీ సాధ్యం కాకపోవచ్చు" అని వ్యాఖ్యానించారు.

మరో నెటిజన్ "మనాలిలో ఉంటూ నెలకు రూ.30 వేల పొదుపు చేయడం అనేది చాలా మంది కార్పొరేట్ ఉద్యోగుల కల" అని రాశారు. ఇంకొకరు "నగర జీవితం వల్ల కలిగే ఒత్తిడిని తగ్గించుకోవడానికే నగరంలో మళ్లీ డబ్బు ఖర్చు చేయాల్సి వస్తుంది" అని వ్యాఖ్యానించగా, మరొకరు "ఎక్కడి నుంచైనా పని చేసే అవకాశం ఉంటే మంచి జీవనశైలితో పాటు ఖర్చులు కూడా తగ్గుతాయి. అదే అసలైన ప్రయోజనం" అని అభిప్రాయపడ్డారు.

రిమోట్ వర్క్ వల్ల ఉద్యోగాన్ని కొనసాగిస్తూనే ప్రశాంతమైన జీవనశైలిని ఎంచుకోవచ్చని, దానితో పాటు అనుకోకుండా ఆర్థిక ప్రయోజనాలు కూడా లభించవచ్చని ఈ కార్పొరేట్ జంట అనుభవం పలువురిలో చర్చనీయాంశంగా మారింది.