24 మంది సభ్యులతో జూనియర్ మహిళల హాకీ జట్టును ఎంపిక చేసిన హాకీ ఇండియా..
జూనియర్ ఆసియా కప్ సన్నాహాల్లో భాగంగా భారత జట్టు యూకే టూర్..
న్యూఢిల్లీ: రాబోయే అంతర్జాతీయ పోటీలకు సన్నద్ధం కావడంలో భాగంగా హాకీ ఇండియా జూనియర్ మహిళల జట్టును యూకే పర్యటనకు ప్రకటించింది. జూలై 5 నుంచి 14 వరకు జరిగే ఈ పర్యటన కోసం 24 మంది సభ్యులతో కూడిన జట్టును ఎంపిక చేశారు.
కొత్త కోచ్ టిమ్ వైట్ మార్గదర్శకత్వంలో భారత జట్టు యూకేలోని స్కాట్లాండ్, ఇంగ్లండ్ ప్రాంతాల్లో ఏడు మ్యాచ్లు ఆడనుంది. రాబోయే జూనియర్ ఆసియా కప్ వంటి కీలక అంతర్జాతీయ టోర్నీలకు ఆటగాళ్లను సిద్ధం చేయడమే ఈ పర్యటన ప్రధాన ఉద్దేశ్యం.
ఈ జట్టుకు కెప్టెన్గా ఖైదెం షిలీమా చాను వ్యవహరించనున్నారు. గోల్ కీపర్లుగా నిధి, ఎంగిల్ హర్ష రాణి మింజ్లు జట్టులో ఉన్నారు.
డిఫెన్స్ విభాగంలో పూజా సాహూ, సుప్రియా, మధు, ఎఫ్. లాల్బీ అక్సియామి, లాల్నెహ్పుయి, పార్వతి టోప్నో చోటు దక్కించుకున్నారు. మిడ్ఫీల్డ్ విభాగంలో కెప్టెన్ చానుతో పాటు తనూజా టోప్పో, సుప్రియా కుజూర్, పూజా మాలిక్, బినిమా ధన్, గీతా యాదవ్, రోష్ని ఐంద్, తనుశ్రీ దినేష్ కడు ఉన్నారు.
ఈ తొమ్మిది రోజుల పర్యటనలో భాగంగా భారత జట్టు మొదట స్కాట్లాండ్ సీనియర్ మహిళల జట్టుతో రెండు మ్యాచ్లు ఆడనుంది. ఈ మ్యాచ్లు ఎడిన్బర్గ్ యూనివర్సిటీలో జరగనున్నాయి.
ఆ తర్వాత లిల్లేషాల్ నేషనల్ స్పోర్ట్స్ సెంటర్లో అమెరికా, ఇంగ్లండ్, బెల్జియం జూనియర్ జట్లతో భారత యువ హాకీ జట్టు తలపడనుంది.
యువ ఆటగాళ్లకు అంతర్జాతీయ స్థాయి అనుభవం అందించడంతో పాటు, భవిష్యత్ పోటీలకు బలమైన జట్టును తీర్చిదిద్దే లక్ష్యంతో హాకీ ఇండియా ఈ పర్యటనను నిర్వహిస్తోంది. భారత జూనియర్ మహిళల జట్టు యూకే పర్యటనలో మంచి ప్రదర్శన చేయాలని అభిమానులు ఆశిస్తున్నారు.
Be the first to react
