Nara Lokesh: రాయలసీమ పారిశ్రామిక రంగానికి పెద్ద బూస్ట్.. కడపలో వెయ్యి మందికి ఉపాధి కల్పించే మెగా ప్లాంట్!

• ఈ కార్యక్రమంలో పాల్గొన్న మంత్రులు టీజీ భరత్, సవిత, పలువురు ప్రజాప్రతినిధులు..
  
  
• ఈ విస్తరణ కోసం రూ.3,100 కోట్లు పెట్టుబడిగా పెట్టనున్న సంస్థ..

Nara Lokesh: రాయలసీమ పారిశ్రామిక రంగాన్ని సరికొత్త శిఖరాలకు తీసుకెళ్లే దిశగా కడప జిల్లాలో మరో కీలక ముందడుగు పడింది. దేశంలోనే ప్రముఖ సిమెంట్ తయారీ సంస్థగా గుర్తింపు పొందిన దాల్మియా భారత్ సిమెంట్ తన వ్యాపార కార్యకలాపాలను ఇక్కడ భారీ స్థాయిలో విస్తరించడానికి నడుం బిగించింది. జిల్లాలోని మైలవరం మండలం చిన్నకొమెర్ల గ్రామ శివార్లలో ఏకంగా రూ.3,100 కోట్ల భారీ పెట్టుబడితో నిర్మించనున్న రెండో ప్లాంట్ (లైన్-2) విస్తరణ పనులకు ఆంధ్రప్రదేశ్ ఐటీ, ఎలక్ట్రానిక్స్ మరియు విద్యాశాఖ మంత్రి నారా లోకేశ్ బుధవారం శాస్త్రోక్తంగా భూమిపూజ చేసి శంకుస్థాపన చేశారు. రాయలసీమ ముఖచిత్రాన్ని మార్చేలా రాబోతున్న ఈ మెగా ప్రాజెక్టు ద్వారా స్థానికంగా ఉన్న సుమారు వెయ్యి మంది నిరుద్యోగ యువతకు నేరుగా ఉపాధి అవకాశాలు లభించనుండటంతో ఈ ప్రాంతంలో హర్షాతిరేకాలు వ్యక్తమవుతున్నాయి.

ఈ ప్రతిష్టాత్మక శంకుస్థాపన కార్యక్రమానికి ముఖ్యఅతిథిగా విచ్చేసిన మంత్రి నారా లోకేశ్కు దాల్మియా భారత్ లిమిటెడ్ మేనేజింగ్ డైరెక్టర్, సీఈవో పునీత్ దాల్మియాతో పాటు కంపెనీ ఉన్నతాధికారులు, ప్రతినిధులు ఘనంగా పూలమాలలతో స్వాగతం పలికారు. ప్లాంట్ భూమిపూజ కార్యక్రమానికి ముందే మంత్రి లోకేశ్ కంపెనీ అడ్మినిస్ట్రేషన్ భవనాన్ని సందర్శించారు. అక్కడ అత్యాధునిక సాంకేతికతతో ఏర్పాటు చేసిన రోబో ల్యాబ్, ప్లాంట్ మొత్తాన్ని పర్యవేక్షించే సెంట్రల్ కంట్రోల్ రూమ్ను ఆయన స్వయంగా పరిశీలించారు. ఈ సందర్భంగా అక్కడ అమర్చిన లేటెస్ట్ టెక్నాలజీ పనితీరు, రోబోల వినియోగం గురించి కంపెనీ సాంకేతిక నిపుణులను అడిగి వివరాలు సేకరించారు.

ఆ తర్వాత కంపెనీ ప్రస్థానాన్ని వివరిస్తూ ఏర్పాటు చేసిన ఫోటో ఎగ్జిబిషన్తో పాటు ఆడియో విజువల్ ప్రజెంటేషన్ను మంత్రి ఆసక్తిగా వీక్షించారు. ప్లాంట్లో విధులు నిర్వహిస్తున్న కార్మికులతో మంత్రి లోకేశ్ స్వయంగా కాసేపు ముచ్చటించి, వారి యోగక్షేమాలను తెలుసుకుంటూ సరదాగా సెల్ఫీలు దిగి ఉత్సాహపరిచారు. అనంతరం పునీత్ దాల్మియాతో కలిసి వేదపండితుల మంత్రోచ్ఛారణల మధ్య భూమిపూజ నిర్వహించి, ప్లాంట్ రెండో లైన్ పనులకు అధికారికంగా శ్రీకారం చుడుతూ ప్రత్యేక శిలాఫలకాన్ని ఆవిష్కరించారు. రాబోయే రోజుల్లో ఏపీని పెట్టుబడుల స్వర్గధామంగా మార్చడమే తమ ప్రభుత్వ ధ్యేయమని, దాల్మియా వంటి దిగ్గజ సంస్థల విస్తరణ రాయలసీమ యువత భవిష్యత్తుకు బంగారు బాటలు వేస్తుందని ఈ సందర్భంగా ప్రభుత్వం ఆశాభావం వ్యక్తం చేసింది.

ఉత్పత్తి సామర్థ్యం మూడింతలు పెంపు..
దాల్మియా సిమెంట్ ప్రస్తుతం చిన్నకొమెర్లలోని ప్లాంటులో ఏటా 2.5 మిలియన్ టన్నుల క్లింకర్, 3.6 మిలియన్ టన్నుల సిమెంట్ ఉత్పత్తి చేస్తోంది. తాజాగా చేపట్టిన రెండో లైన్ విస్తరణ పూర్తయితే ఉత్పత్తి సామర్థ్యం గణనీయంగా పెరగనుంది. క్లింకర్ ఉత్పత్తి 6.1 మిలియన్ టన్నులకు, సిమెంట్ ఉత్పత్తి 9.6 మిలియన్ టన్నులకు చేరనుంది. ఇది ప్రస్తుత సామర్థ్యంతో పోలిస్తే దాదాపు మూడు రెట్లు అధికం. ఈ ప్రాజెక్టు ద్వారా ప్రత్యక్షంగా 1000 మందికి, పరోక్షంగా మరికొందరికి ఉపాధి లభిస్తుందని కంపెనీ ప్రతినిధులు తెలిపారు.

ఈ కార్యక్రమంలో రాష్ట్ర పరిశ్రమల శాఖ మంత్రి టీ.జీ. భరత్, బీసీ సంక్షేమ శాఖ మంత్రి ఎస్.సవిత, జమ్మలమడుగు ఎమ్మెల్యే సి. ఆదినారాయణ రెడ్డి, కడప ఎమ్మెల్యే రెడ్డప్పగారి మాధవి రెడ్డి, ఎమ్మెల్సీ భూమిరెడ్డి రాంగోపాల్ రెడ్డి, జమ్మలమడుగు టీడీపీ ఇన్ఛార్జ్ సీహెచ్ భూపేష్ రెడ్డి పాల్గొన్నారు. 

వీరితో పాటు జిల్లా కలెక్టర్ డాక్టర్ శ్రీధర్ చెరుకూరి, దాల్మియా భారత్ లిమిటెడ్ సీనియర్ ఎగ్జిక్యూటివ్ డైరెక్టర్ కేసీ బిర్లా, నేషనల్ మ్యానుఫ్యాక్చరింగ్ హెడ్ గణేశ్ వామనరావు, ప్లాంట్ హెడ్ అర్పన్ పరేఖ్ తదితరులు హాజరయ్యారు. ఈ భారీ పెట్టుబడితో కడప జిల్లా పారిశ్రామిక రంగంలో మరింత బలోపేతం కానుందని విశ్లేషకులు అభిప్రాయపడుతున్నారు.