Ministry of Petroleum Orders: దేశంలోని గ్యాస్ వినియోగదారులకు కేంద్ర ప్రభుత్వం ఒక ముఖ్యమైన హెచ్చరిక జారీ చేసింది. మీ ఇంట్లో పైపుల ద్వారా వచ్చే గ్యాస్ (PNG) కనెక్షన్ తీసుకునే సదుపాయం ఉండి కూడా, ఇంకా సిలిండర్లనే వాడుతుంటే ఇకపై అవి రావు. పైప్లైన్ గ్యాస్ అందుబాటులో ఉన్న ప్రాంతాల్లో మూడు నెలల లోపు ఆ కనెక్షన్కు మారిపోవాలని, లేదంటే ఎల్పీజీ సిలిండర్ల సరఫరాను నిలిపివేస్తామని ప్రభుత్వం స్పష్టం చేసింది. ఈ మేరకు పెట్రోలియం శాఖ నిత్యావసరాల చట్టం కింద కొత్త ఉత్తర్వులు జారీ చేసింది.
పశ్చిమాసియా దేశాల్లో, ముఖ్యంగా ఇరాన్ వంటి ప్రాంతాల్లో యుద్ధ వాతావరణం నెలకొనడం వల్ల అంతర్జాతీయంగా గ్యాస్ సరఫరాకు ఆటంకాలు ఏర్పడుతున్నాయి. ఈ ఇబ్బందులను అధిగమించేందుకు కేంద్రం పీఎన్జీ (PNG) వాడకాన్ని పెంచాలని నిర్ణయించింది. పట్టణ ప్రాంతాల్లో ఇప్పటికే గ్యాస్ పైప్లైన్ వ్యవస్థ సిద్ధంగా ఉంది కాబట్టి, ప్రజలు సిలిండర్ల మీద ఆధారపడటం తగ్గించాలని ప్రభుత్వం భావిస్తోంది. దీనివల్ల విదేశాల నుంచి గ్యాస్ దిగుమతి చేసుకునే భారం కూడా తగ్గుతుందని అంచనా వేస్తున్నారు.
పైప్లైన్ గ్యాస్ వాడటం వల్ల సామాన్యులకు కూడా అనేక లాభాలు ఉన్నాయి. ప్రతి నెలా సిలిండర్ బుక్ చేసుకోవడం, అది ఎప్పుడు వస్తుందో అని ఎదురుచూడటం వంటి తలనెప్పులు ఉండవు. పైపుల ద్వారా 24 గంటల పాటు గ్యాస్ అందుబాటులో ఉంటుంది. అంతేకాకుండా, సిలిండర్ డెలివరీ చేసేటప్పుడు అయ్యే అదనపు ఖర్చులు కూడా మిగులుతాయి. ఈ మార్పును ప్రోత్సహించడానికి రాష్ట్ర ప్రభుత్వాలు కూడా వినియోగదారులకు కొన్ని రాయితీలు ఇచ్చే ఆలోచనలో ఉన్నాయి.
అయితే, కొన్ని పాత ఇళ్లలో లేదా సాంకేతిక సమస్యలు ఉన్న చోట పైప్లైన్ వేయడం కుదరకపోవచ్చు. అలాంటి వారు మాత్రమే సిలిండర్లను వాడుకోవడానికి అనుమతి ఉంటుంది. కానీ, ఇందుకు సంబంధిత గ్యాస్ కంపెనీ నుంచి 'నో అబ్జెక్షన్ సర్టిఫికేట్' (NOC) తీసుకోవాల్సి ఉంటుంది. అపార్ట్మెంట్లు లేదా హౌసింగ్ సొసైటీలు పైప్లైన్ పనులను అడ్డుకుంటే, ఆ ప్రాంతం మొత్తానికి సిలిండర్ల సరఫరా ఆపేస్తామని ప్రభుత్వం కఠినంగా హెచ్చరించింది.
మరోవైపు, సోషల్ మీడియాలో వస్తున్న కొన్ని పుకార్లపై కూడా కేంద్రం క్లారిటీ ఇచ్చింది. గ్యాస్ సిలిండర్ బుకింగ్ గడువును 35 రోజులకు పెంచారన్న వార్తల్లో నిజం లేదని తెలిపింది. ప్రస్తుతం ఉన్న నిబంధనల ప్రకారమే పట్టణాల్లో 25 రోజులకు, గ్రామాల్లో 45 రోజులకు ఒకసారి సిలిండర్ బుక్ చేసుకోవచ్చని పెట్రోలియం శాఖ వెల్లడించింది. మొత్తం మీద, రాబోయే రోజుల్లో పట్టణాల్లో సిలిండర్ల హడావుడి తగ్గి, అందరి ఇళ్లలో పైప్లైన్ గ్యాస్ వెలిగేలా ప్రభుత్వం అడుగులు వేస్తోంది.
