హైదరాబాద్లోని శంషాబాద్ అంతర్జాతీయ విమానాశ్రయంలో మరోసారి బాంబు బెదిరింపులు కలకలం సృష్టించాయి. నెదర్లాండ్కు వెళ్లాల్సిన ఓ అంతర్జాతీయ విమానంలో బాంబు ఉందంటూ ఎయిర్పోర్టు అధికారులకు మెయిల్ రావడంతో వెంటనే భద్రతా చర్యలు కట్టుదిట్టం చేశారు. ఈ ఘటనతో ప్రయాణికులు, విమానాశ్రయ సిబ్బంది ఒక్కసారిగా ఆందోళనకు గురయ్యారు.
బాంబు బెదిరింపు సమాచారం అందిన వెంటనే విమానయాన అధికారులు అప్రమత్తమయ్యారు. నెదర్లాండ్కు వెళ్లే ఆ విమానాన్ని అత్యవసరంగా ల్యాండ్ చేయించి, భద్రతా విభాగాలకు సమాచారం అందించారు. ప్రయాణికుల భద్రతను దృష్టిలో ఉంచుకుని వారిని సురక్షితంగా విమానం నుంచి దించేశారు.
అనంతరం బాంబ్ స్క్వాడ్, డాగ్ స్క్వాడ్తో పాటు ఇతర భద్రతా బృందాలు విమానాన్ని పూర్తిస్థాయిలో తనిఖీ చేశాయి. విమానం లోపల, లగేజీ విభాగాల్లో ముమ్మరంగా పరిశీలనలు నిర్వహించారు. ప్రాథమిక తనిఖీల్లో ఎలాంటి అనుమానాస్పద వస్తువులు లభించలేదని అధికారులు తెలిపారు.
ఈ ఘటన నేపథ్యంలో శంషాబాద్ విమానాశ్రయంలో భద్రతను మరింత కఠినతరం చేశారు. ప్రవేశ ద్వారాల వద్ద అదనపు తనిఖీలు చేపట్టడంతో పాటు, ప్రయాణికుల కదలికలపై ప్రత్యేక నిఘా పెట్టారు. ఎయిర్పోర్ట్ కార్యకలాపాలు కొంతసేపు ఆలస్యమైనప్పటికీ, పరిస్థితి అదుపులోకి వచ్చిందని అధికారులు స్పష్టం చేశారు.
ఈ ఏడాది మాత్రమే శంషాబాద్ విమానాశ్రయానికి 20కి పైగా బాంబు బెదిరింపు మెయిల్స్ రావడం. ఎక్కువగా ఇవన్నీ ఫేక్ కాల్స్ లేదా మెయిల్సేనని గతంలో నిర్ధారణ అయినప్పటికీ, ప్రతి సమాచారం పట్ల అత్యంత జాగ్రత్తగా వ్యవహరిస్తున్నామని భద్రతా అధికారులు తెలిపారు. ప్రయాణికుల భద్రతే తమ ప్రధాన లక్ష్యమని స్పష్టం చేశారు.
